ഗോവ > ഐഎസ്എല്ലിലെ ആവേശപ്പോരിൽ ഈസ്റ്റ് ബംഗാളിനെ ഒരു ഗോളിന് തോൽപ്പിച്ച് കേരള ബ്ലാസ്റ്റേഴ്സ് പോയിന്റ് പട്ടികയിൽ മൂന്നാം സ്ഥാനത്ത്. ബാംബൊലിം പ്രതിരോധക്കാരൻ എണെസ് സിപോവിച്ചിന്റെ ഗോളിലാണ് ബ്ലാസേ്റ്റഴ്സിന്റെ ജയം. ഇതോടെ 15 കളികളിൽ 7 വിജയങ്ങളുമായി 29 പോയിന്റാണ് ഇവാൻ വുകോമനോവിച്ചിന്റെ സംഘത്തിനുള്ളത്. 29 പോയിന്റുള്ള ഹെെദരാബാദ് എഫ്സിയാണ് ഒന്നാമത്. 26 പോയിന്റുള്ള എടികെ മോഹൻ ബഗാൻ രണ്ടാമതും.
കളിയിൽ പൂർണ നിയന്ത്രണം കിട്ടിയിട്ടും ഗോൾമുഖത്തെ പതർച്ചയാണ് ആദ്യപകുതിയിൽ ബ്ലാസ്റ്റേഴ്സിന് വിനയായത്. ഈസ്റ്റ് ബംഗാൾ പ്രതിരോധവും മികച്ചുനിന്നു. അൽവാരോ വാസ്കസും അഡ്രിയാൻ ലൂണയും നിരവധിതവണ ഈസ്റ്റ് ബംഗാൾ മേഖലയിൽ പന്തെത്തിച്ചു. സഹൽ അബ്ദുൾ സമദിന്റെയും പുയ്ട്ടിയുടെയും ഷോട്ടുകൾക്ക് ലക്ഷ്യമില്ലാതായി. ഒരു മത്സരത്തിന്റെ ഇടവേളയ്ക്കുശേഷം തിരിച്ചെത്തിയ ജോർജ് ഡയസും ആദ്യഘട്ടത്തിൽ മങ്ങി.
രണ്ടാംപകുതിയുടെ തുടക്കത്തിൽത്തന്നെ ബ്ലാസ്റ്റേഴ്സ് നല്ല നീക്കങ്ങൾ നടത്തി. നാല് മിനിറ്റിനുള്ളിൽ ഗോളും നേടി. പുയ്ട്ടിയയുടെ കോർണറിൽ തലവച്ച് സിപോവിച്ച് ബ്ലാസ്റ്റേഴ്സിന് ജയമൊരുക്കി. തുടർന്നും കളിയിൽ പൂർണ നിയന്ത്രണം നേടിയെങ്കിലും ഒറ്റഗോളിൽ ബ്ലാസ്റ്റേഴ്സ് കളി അവസാനിപ്പിച്ചു.
പത്തൊമ്പതിന് എടികെ മോഹൻ ബഗാനുമായാണ് അടുത്ത മത്സരം.
