കൊച്ചി
മോഡലുകളുടെ അപകടമരണത്തിൽ കുറ്റപത്രം ഈയാഴ്ച സമർപ്പിക്കും. കേസിൽ ഫോർട്ട് കൊച്ചി നമ്പർ 18 ഹോട്ടലുടമ റോയ് വയലാട്ട്, സൈജു തങ്കച്ചൻ എന്നിവർ ഉൾപ്പെടെ എട്ട് പ്രതികളാണുള്ളത്. പ്രേരണാക്കുറ്റം, മനഃപൂർവമല്ലാത്ത നരഹത്യ, തെളിവ് നശിപ്പിക്കൽ എന്നീ വകുപ്പുകളാണ് ഇവർക്കെതിരെ ചുമത്തിയിരിക്കുന്നത്. നവംബർ ഒന്നിന് രാത്രി ഒന്നോടെ എറണാകുളത്തുണ്ടായ വാഹനാപകടത്തിലാണ് മിസ് കേരള 2019 അൻസി കബീറും റണ്ണറപ്പ് അഞ്ജന ഷാജനും മരിച്ചത്.
അതിനിടെ, റോയ് ജെ വയലാട്ട്, സൈജു എം തങ്കച്ചൻ എന്നിവർക്കെതിരെ കഴിഞ്ഞ ദിവസമുണ്ടായ പീഡനപരാതിയുടെ അടിസ്ഥാനത്തിൽ പൊലീസ് തിങ്കൾ, ചൊവ്വ ദിവസങ്ങളിലായി കൂടുതൽപ്പേരെ ചോദ്യം ചെയ്യും. പെൺകുട്ടികളെ കൊച്ചിയിലെത്തിച്ച് ഇവർക്ക് കൈമാറിയ കോഴിക്കോട് സ്വദേശിനി അഞ്ജലി റീമ ദേവിന്റെ ലഹരിമരുന്ന് മാഫിയാ ബന്ധവും അന്വേഷിക്കുന്നുണ്ട്. പ്രായപൂർത്തിയാകാത്ത പെൺകുട്ടികളെ മയക്കുമരുന്നിന് അടിമകളാക്കിയശേഷം ലൈംഗികചൂഷണം നടത്തുന്ന റാക്കറ്റ്, നമ്പർ 18 ഹോട്ടൽ കേന്ദ്രീകരിച്ച് പ്രവർത്തിച്ചിരുന്നെന്നാണ് പൊലീസിന് ലഭ്യമായ വിവരം.
പ്രായപൂർത്തിയാകാത്ത മകൾക്കുനേരെ ലൈംഗികാതിക്രമം നടത്തിയെന്ന കോഴിക്കോട് സ്വദേശിനിയുടെ പരാതിയിലാണ് റോയ് വയലാറ്റിനെതിരേ ഫോർട്ട് കൊച്ചി പൊലീസ് പോക്സോ കേസ് രജിസ്റ്റർ ചെയ്തത്. നിലവിൽ പരാതികൾ നൽകിയവർക്കുപുറമെ, ഇരകളാക്കപ്പെട്ട വേറെയും നിരവധി പെൺകുട്ടികളുണ്ടെന്ന് കണ്ടെത്തിയിട്ടുണ്ട്. ഇവരുടെയെല്ലാം മൊഴി രേഖപ്പെടുത്തും.
