‘ആ അബദ്ധം കാണിച്ചോട്ടെ’; ആരോഗ്യ രംഗത്തെക്കുറിച്ച് അന്നേ കണക്കിന് മറുപടി പറഞ്ഞിരുന്നു; യോഗിയോട് കെകെ ശൈലജ

തിരുവനന്തപുരം: കേരളം പോലെയാകാതിരിക്കാൻ ‘ശ്രദ്ധിച്ചു’ വോട്ട് ചെയ്യണമെന്ന ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്‍റെ പ്രസ്താവനയ്ക്ക് മറുപടിയുമായി എംഎൽഎ ടീച്ചർ. ആ അബദ്ധം കാണിച്ചോട്ടെ യുപി മുഖ്യമന്ത്രീ എന്ന് പറഞ്ഞ് ഫേസ്ബുക്ക് പോസ്റ്റിലൂടെയാണ് മുൻ ആരോഗ്യമന്ത്രിയുടെ പ്രതികരണം.

അബദ്ധം കാണിച്ചാൽ യുപി കേരളമാകുമെന്ന് ഉത്തർപ്രദേശ് മുഖ്യമന്ത്രി പറയുന്നു. മനുഷ്യവികസന സൂചികയിലും ആരോഗ്യ-വിദ്യാഭ്യാസമേഖലകളിലും ദാരിദ്ര്യ നിർമാർജ്ജനത്തിലും ഇന്ത്യയിൽ ഒന്നാമതായി നിൽക്കുന്ന കേരളത്തെ പോലെയാകാൻ പാവപ്പെട്ട ജനങ്ങൾ കൊതിക്കുന്നുണ്ടാകുമെന്ന് ശൈലജ ടീച്ചർ പറഞ്ഞു.

Also Read :
മൂന്ന് വർഷം മുൻപ് യോഗി കേരളത്തിലൂടെ കടന്നു പോകുമ്പോൾ ആരോഗ്യരംഗത്ത് കേരളം യുപിയെ കണ്ട് പഠിക്കണമെന്ന് പറഞ്ഞിരുന്നു. അന്ന് മാധ്യമങ്ങൾ നമ്മുടെ ജില്ലാതല ആശുപത്രിയും ഗോരഖ്പൂരിലെ മെഡിക്കൽ കോളേജും താരതമ്യം ചെയ്ത് യുപിയുടെ ആരോഗ്യരംഗത്തെ പോരായ്മകൾ നിരത്തി കണക്കിന് മറുപടി പറഞ്ഞിരുന്നു. അതിന് ശേഷമാണ് ഓക്സിജൻ കിട്ടാതെ രോഗികൾ പിടഞ്ഞു മരിക്കുന്നതും കുട്ടികളുടെ കൂട്ടമരണങ്ങളും കൊവിഡ് ബാധിതരുടെ മുതദേഹങ്ങൾ ഗംഗയിൽ ഒഴുകി നടക്കുന്നതുമെല്ലാം യുപിയിൽ നിന്ന് വാർത്തയായതെന്നും കെകെ ശൈലജ ചൂണ്ടിക്കാട്ടി.

യുപിയിലെ ജനങ്ങളെ രക്ഷിക്കാൻ കേരളത്തിലേതുപോലെ ജനങ്ങൾക്ക് വേണ്ടിയുള്ള ആസൂത്രണവും കരുതലും വേണമെന്നത് ചർച്ചയായത് നന്നായെന്നും സിപിഎം കേന്ദ്ര കമ്മിറ്റി അംഗ കൂടിയായ ശൈലജ ടീച്ചർ പറഞ്ഞു. യുപിയിലെ ഒന്നാംഘട്ട വോട്ടെടുപ്പിന് തൊട്ടുമുൻപായി കഴിഞ്ഞദിവസമായിരുന്നു യോഗി ആദിത്യനാഥ് വിവാദ പ്രസ്താവന നടത്തിയത്.

Also Read :
സൂക്ഷിക്കുക, നിങ്ങള്‍ക്ക്‌ തെറ്റിയാല്‍, ഈ അഞ്ച് വര്‍ഷത്തെ അധ്വാനം നശിച്ചുപോകും. ഉത്തര്‍ പ്രദേശ് കശ്മീരോ ബംഗാളോ കേരളമോ ആകാന്‍ അധിക സമയം എടുക്കില്ലെന്നായിരുന്നു യോഗി ആദിത്യനാഥിന്‍റെ പ്രസ്താവന. ഇതിന് പിന്നാലെ തന്നെ യോഗിയ്ക്ക് മറുപടിയുമായി മുഖ്യമന്ത്രി പിണറായി വിിജയൻ രംഗത്തെത്തിയിരുന്നു. ട്വിറ്ററിലൂടെ, ഹിന്ദിയിലും ഇംഗ്ലീഷിലുമായിരുന്നു പിണറായി മറുപടി നൽകിയത്. പ്രതിപക്ഷ നേതാവ് വിഡി സതീശൻ ഉൾപ്പെടെയുള്ള നേതാക്കളും യോഗിയുടെ പ്രസ്താവനയ്ക്കെതിരെ രംഗത്ത് വന്നിരുന്നു.