ഔദ്യോഗിക മരണ കണക്കിൽ ഉൾപ്പെടാതെ പോയ മരണങ്ങൾ കൂട്ടത്തോടെ റിപ്പോർട്ട് ചെയ്തപ്പോഴാണ് ഇരട്ടിപ്പ് സംഭവിച്ചത്. 2020 ജനുവരി 30 മുതൽ 2021 ജൂൺ 17 വരെയുള്ള കാലയളവിലെ 527 മരണങ്ങളാണ് ഇരട്ടിച്ചതെന്ന് ആരോഗ്യ സെക്രട്ടറി ഡിഎംഒമാർക്ക് നൽകിയ കാരണം കാണിക്കൽ നോട്ടീസിൽ പറയുന്നു.
കോഴിക്കോട്, തൃശൂർ, എറണാകുളം, ആലപ്പുഴ, തിരുവനന്തപുരം ജില്ലകളിലെ മരണങ്ങളാണ് പട്ടികയിൽ ചേർത്തപ്പോൾ ഇരട്ടിച്ചത്. ആരോഗ്യ വകുപ്പ് ഡയറക്ടറുടെ റിപ്പോർട്ട് അനുസരിച്ച് 7023 മരണങ്ങൾ പട്ടികയിൽ ചേർക്കാൻ ഉണ്ടായിരുന്നു. എന്നാൽ ജില്ലയിലെ മരണങ്ങൾ ക്രോഡീകരിച്ചപ്പോൾ മരണം 8500 നു മുകളിലെത്തി. തുടർന്നു നടത്തിയ പരിശോധനയിലാണ് 527 മരണങ്ങൾ ഇരട്ടിച്ചതായി കണ്ടെത്തിയത്.
കൊവിഡ് റിപ്പോർട്ടിങ് രംഗത്തുണ്ടായിരുന്ന ഡിഎംഒ മാർക്ക് സംഭവിച്ച പിഴവാണ് ഇരട്ടിപ്പിനു പിന്നിലെന്നാണ് ആരോഗ്യ സെക്രട്ടറി പറയുന്നത്. കാരണം കാണിക്കൽ നോട്ടീസിന് 15 ദിവസത്തിനുള്ളിൽ മറുപടി പറയണം. മറുപടി തൃപ്തികരമല്ലെങ്കിൽ നടപടി സ്വീകരിക്കുമെന്ന് നോട്ടീസിൽ പറയുന്നു. ഇരട്ടിച്ചവ ലിസ്റ്റിൽ നിന്നും എത്രയും വേഗം ഒഴിവാക്കണമെന്ന് ആരോഗ്യ സെക്രട്ടറി ആവശ്യപ്പെട്ടു.
