തിരുവനന്തപുരത്തു നിന്ന് കാസര്‍കോട് അതിവേഗം എത്താൻ സിൽവര്‍ലൈൻ തന്നെ വേണമെന്നില്ലെന്നും ഇന്ത്യൻ റെയിൽവേയുടെ വന്ദേഭാരത് ട്രെയിനുകള്‍ സിൽവര്‍ലൈൻ പദ്ധതിയ്ക്ക് ബദലാകുമെന്നും ശശി തരൂര്‍ പറഞ്ഞു. മുഖ്യമന്ത്രി മുന്നോട്ടു വെക്കുന്ന വികസന ആവശ്യം തനിക്ക് മനസ്സിലാകുന്നുണ്ടെന്നും എന്നാൽ കേരളത്തിൽ അതിവേഗയാത്ര സാധ്യമാക്കാൻ സിൽവര്‍ലൈൻ പദ്ധതി തന്നെ വേണമെന്നില്ലെന്നും ശശി തരൂര്‍ വ്യക്തമാക്കി.
Also Read:
നിലവിലെ റെയിൽപാത വികസിപ്പിക്കയാണ് പ്രധാനമെന്നാണ് ശശി തരൂര്‍ അഭിപ്രായപ്പെട്ടത്. 180 കിലോമീറ്റര്‍ വരെയാണ് വന്ദേ ഭാരത് ട്രെയിനുകളുടെ വേഗത. എന്നാൽ കേരളത്തിലെ റെയിൽ പാത അതിവേഗ ട്രെയിനുകള്‍ക്ക് യോജിച്ചതല്ലെന്നാണ് കേരള സര്‍ക്കാര്‍ ഉയര്‍ത്തുന്ന വാദം. എന്നാൽ വന്ദേ ഭാരത് ട്രെയിനുകള്‍ ഓടിക്കാനായി നിലവിലുള്ള റെയിൽപാത വികസിപ്പിക്കുകയാണ് വേണ്ടതെന്ന് ശശി തരൂര്‍ വ്യക്തമാക്കി. ഇതിനായി കേന്ദ്രസര്‍ക്കാരും സംസ്ഥാന സര്‍ക്കാരും തമ്മിൽ ചര്‍ച്ച നടത്തണമെന്നും ശശി തരൂര്‍ ആവശ്യപ്പെട്ടു.
മുൻപ് സിൽവര്‍ലൈൻ പദ്ധതി സംബന്ധിച്ച് ശശി തരൂര്‍ നടത്തിയ പ്രസ്താവന വിവാദമായിരുന്നു. പദ്ധതിയ്ക്കെതിരെ യുഡിഎഫ് പ്രതിഷേധവുമായി മുന്നോട്ടു പോകുകയാണെങ്കിലും ശശി തരൂര്‍ നടത്തിയ പ്രസ്താവന അതിവേഗ റെയിൽപാതയ്ക്ക് അനുകൂലമായിരുന്നു. തരൂരിനെതിരെ കോൺഗ്രസ് നേതാക്കള്‍ അടക്കം രംഗത്തു വന്നതോടെ പ്രസ്താവന വിവാദമാകുകയായിരുന്നു. എന്നാൽ കേന്ദ്ര ബജറ്റിൽ 400 വന്ദേ ഭാരത് ട്രെയിനുകള്‍ സംബന്ധിച്ച പ്രഖ്യാപനം വന്നതിനു പിന്നാലെ തരൂര്‍ നിലപാട് തിരുത്തി രംഗത്തെത്തുകയായിരുന്നു.
Also Read:
സിൽവര്‍ലൈൻ പദ്ധതിയെ താൻ ഒരു ഘട്ചത്തിലും പിന്തുണച്ചിട്ടില്ലെന്നും പദ്ധതിയെപ്പറ്റി പഠിച്ചിട്ട് പ്രതികരിക്കാമെന്നതായിരുന്നു തന്‍റെ നിലപാടെന്നും തരൂര്‍ വ്യക്തമാക്കി.
അതേസമയം, കെ റെയിൽ വിഭാവനം ചെയ്യുന്ന സിൽവര്‍ലൈൻ പദ്ധതിയ്ക്ക് തത്വത്തിലുള്ള അനുമതി മാത്രമാണ് നൽകിയിട്ടുള്ളതെന്നാണ് കേന്ദ്രസര്‍ക്കാര്‍ വിശദീകരിക്കുന്നത്. അന്തിമ അനുമതി നല്‍കണമെങ്കിൽ വിശദമായ ഡിപിആര്‍ നല്‍കണമെന്നും നിലവിലെ സാഹചര്യത്തിൽ പദ്ധതിയ്ക്കു വേണ്ടി ഭൂമി ഏറ്റെടുക്കാൻ സാധിക്കില്ലെന്നും കേന്ദ്ര റെയിൽവേ മന്ത്രാലയം വ്യക്തമാക്കി.
