ദീര്‍ഘദൂരയാത്രകള്‍ക്കായി ഇറങ്ങുന്നവര്‍ യാത്രാരേഖകള്‍ കൈയ്യിൽ കരുതണമെന്നും അവശ്യ സര്‍വീസ് ജീവനക്കാര്‍ തിരിച്ചറിയൽ കാര്‍ഡ് ഉപയോഗിക്കണമെന്നും പോലീസ് അറിയിച്ചിട്ടുണ്ട്. ഭക്ഷ്യവസ്തുക്കള്‍ വിൽക്കുന്ന കടകള്‍ക്ക് തുറന്നു പ്രവര്‍ത്തിക്കാൻ അനുമതിയുണ്ട്. ഹോട്ടലുകള്‍ തുറക്കുമെങ്കിലും പാഴ്സൽ നൽകാനും ഹോം ഡെലിവറിയ്ക്കും മാത്രമാണ് അനുമതിയുള്ളത്. വാഹനങ്ങള്‍ കര്‍ശന പരിശോധനയ്ക്ക് വിധേയമാക്കുമെന്നും പോലീസ് അറിയിച്ചിട്ടുണ്ട്. നിയന്ത്രണങ്ങള്‍ ലംഘിക്കുന്നവര്‍ക്കെതിരെ നടപടി സ്വീകരിക്കും. പ്രധാന റൂട്ടുകളിലും റെയിൽവേ സ്റ്റേഷനുകള്‍ അടക്കമുള്ള കേന്ദ്രങ്ങളിലേയ്ക്കും കെഎസ്ആര്‍ടിസി സര്‍വീസ് നടത്തും.
Also Read:
അതേസമയം, സംസ്ഥാനത്ത് കൊവിഡ് 19 മൂന്നാം തരംഗം കുറയുകയാണെന്നാണ് സംസ്ഥാന സര്‍ക്കാര്‍ വിലയിരുത്തൽ. കേസുകളുടെ എണ്ണം കുറയുന്ന സാഹചര്യത്തിൽ കൂടുതൽ ഇളവുകള്‍ കൊണ്ടുവരാമെന്നാണ് സര്‍ക്കാര്‍ നിലപാട്. ഫെബ്രുവരി 14 മുതൽ സ്കൂളുകളും നഴ്സറികളും തുറക്കാൻ അനുമതി നല്‍കിയിട്ടുണ്ട്. രോഗികളുടെ എണ്ണം കുറഞ്ഞതോടെ തിരുവനന്തപുരം അടക്കം എല്ലാ ജില്ലകളെയും സി കാറ്റഗറിയിൽ നിന്നു നീക്കിയിട്ടുണ്ട്.
തിരുവനന്തപുരം ജില്ലയിലും കൂടുതൽ ഇളവുകള്‍ നൽകിയിട്ടുണ്ട്. ആറ്റുകാൽ പൊങ്കാലയ്ക്ക് ക്ഷേത്രപരിസരത്ത് 200 പേര്‍ക്കാണ് അനുമതി. എന്നാൽ പൊതുജനങ്ങള്‍ കഴിഞ്ഞ തവണത്തേതു പോലെ വീട്ടുപരിസരത്ത് പൊങ്കാലയിടണം. റോഡിൽ പൊങ്കാലയിടാൻ ഇത്തവണയും അനുമതിയില്ല.
Also Read:
കഴിഞ്ഞ രണ്ടാഴ്ചയായി നടത്തി വരുന്ന ഞായറാഴ്ച നിയന്ത്രണങ്ങളുടെ തുടര്‍ച്ചയാണ് ഇന്നത്തെ നിയന്ത്രണങ്ങളും. ഈ മാസം പകുതിയോടെ സംസ്ഥാനത്ത് കൊവിഡ് 19 കേസുകളുടെ എണ്ണത്തിൽ വലിയ കുറവുണ്ടാകുമെന്നാണ് സര്‍ക്കാര്‍ പ്രതീക്ഷിക്കുന്നത്. കേരളത്തിൽ രേഖപ്പെടുത്തുന്ന പ്രതിദിന കൊവിഡ് കേസുകളുടെ എണ്ണത്തിലും ടിപിആറിലും കുറവുണ്ടാകുന്നുണ്ട്. എന്നാൽ കഴിഞ്ഞ ദിവസം ചേര്‍ന്ന കൊവിഡ് 19 അവലോകന യോഗത്തിൽ ഈ ഞായറാഴ്ച കൂടി നിയന്ത്രണങ്ങള്‍ തുടരാൻ തീരുമാനിക്കുകയായിരുന്നു.
