മലപ്പുറം: മേൽമുറി പ്രിയദർശിനി കോളേജിലെ കുട്ടികൾക്കുനേരെ കത്തിവീശിയ മേൽമുറി 27 സ്വദേശി നടുത്തൊടി ജുനൈദുള്ള(29)യെ മലപ്പുറം പോലീസ് അറസ്റ്റുചെയ്തു.
കുട്ടികൾ പരാതിനൽകാൻ തയ്യാറാകാതിരുന്നതിനാൽ പോലീസ് സ്വമേധയാ ആണ് കേസെടുത്തത്. ഇയാളെ ഗുണ്ടാപട്ടികയിൽ ഉൾപ്പെടുത്തുകയുംചെയ്തു. വ്യാഴാഴ്ചയാണ് ഒന്നാംവർഷ ബിരുദ വിദ്യാർഥികളും അവസാനവർഷ വിദ്യാർഥികളും തമ്മിലുള്ള വാക്കേറ്റം സംഘർഷത്തിൽ കലാശിച്ചത്.
വിഷയത്തിൽ ഇടപെടാനെത്തിയ കോളേജിന് പുറത്തുനിന്നുള്ള ജുനൈദുള്ള വിദ്യാർഥികൾക്കുനേരെ കത്തിവീശുകയായിരുന്നു. വിദ്യാർഥികൾക്കുനേരെ ആക്രോശിച്ച്, അരയിൽ തിരുകിയ കത്തി പുറത്തെടുത്തു വീശുന്നതും കൈയേറ്റംചെയ്യുന്നതും കൂടിനിന്നവർ മൊബൈൽഫോണിൽ പകർത്തുകയായിരുന്നു. വീഡിയോ സമൂഹമാധ്യമത്തിൽ പ്രചരിച്ചിരുന്നു.
