സ്വർണ്ണക്കടത്ത് കേസിൽ തനിക്കെതിരെ ഉയർന്ന ആരോപണങ്ങളിൽ തന്‍റെ ഭാഗം ശിവശങ്കർ പുസ്തകത്തിലൂടെ വിശദീകരിക്കുകയാണെന്നാണ് റിപ്പോർട്ടുകൾ. മുഖ്യമന്ത്രിയെയും തന്നെയും ഈ കേസുമായി ബന്ധപ്പെടുത്താനുള്ള നീക്കങ്ങള്‍ പല ഭാഗത്തുനിന്നും ഉണ്ടായി. ബാഗേജ് പിടിച്ചപ്പോൾ തന്നെ കെ സുരേന്ദ്രനും പിന്നെ ചെന്നിത്തലയും മുഖ്യമന്ത്രിയുടെ ഓഫീസിൽ നിന്നും വിട്ടുകിട്ടാൻ ശ്രമിച്ചെന്ന ആക്ഷേപം ഉയർത്തി. സ്വർണ്ണം അയച്ചവരെ രക്ഷിച്ച് തന്നെ കുടുക്കാൻ ഗൂഢാലോചന ഉണ്ടായെന്നും ശിവശങ്കർ പറയുന്നു.
Also Read :
അന്വേഷണ ഏജൻസികളുടെ ആദ്യഘട്ടത്തിലെ ചോദ്യം ചെയ്യലിനെ പ്രശംസിച്ച ശിവശങ്കർ പിന്നീട് ഏജൻസികൾ നയം മാറ്റുകയായിരുന്നെന്നും ആരോപിക്കുന്നുണ്ട്. 90 ദിവസം തന്നെ ചോദ്യം ചെയ്തപ്പോൾ കേസിൽ മുഖ്യമന്ത്രിയെ വലിച്ചിഴക്കാൻ ഏജൻസികൾക്ക് മേൽ സമ്മർദ്ദം ഉണ്ടായെന്ന് മനസ്സിലായെന്നും അദ്ദേഹം പറയുന്നു. മണിക്കൂറോളം ചോദ്യംചെയ്ത അന്വേഷണ ഏജന്‍സികള്‍ക്ക് സ്വര്‍ണക്കടത്തുമായി തന്നെ ബന്ധപ്പെടുത്തുന്ന വ്യക്തമായ തെളിവുകളൊന്നും ലഭിച്ചില്ല.
നയതന്ത്രബാഗേജ് കസ്റ്റംസ് തടഞ്ഞുവെച്ചപ്പോൾ സ്വപ്ന സഹായം ചോദിച്ചെങ്കിലും നൽകിയില്ലെന്നും ശിവശങ്കർ പറയുന്നു. ബാഗേജ് വിട്ടുകിട്ടാൻ സഹായിക്കണമെന്ന് സ്വപ്ന സുരേഷ് വിളിച്ച് ആവശ്യപ്പെട്ടിരുന്നു. ഡ്യൂട്ടി അടയ്ക്കാതെ കൊണ്ടുവന്നവയാണ് പിടിച്ചുവച്ചിരിക്കുന്നതെന്നാണ് പറഞ്ഞത്. എന്നാല്‍ കസ്റ്റംസുമായി ബന്ധപ്പെട്ട കാര്യങ്ങളില്‍ താന്‍ ഇടപെടില്ലെന്ന് മറുപടി നൽകി. പിന്നീട് സ്വപ്നയും ഭർത്താവും ഫ്ലാറ്റിലെത്തി ഇതേ ആവശ്യം ഉന്നയിച്ചപ്പോളും ഇടപെടാനാകില്ലെന്ന് തന്നെയാണ് പറഞ്ഞതെന്നും ശിവശങ്കർ പറയുന്നു.
Also Read :
സ്വപ്നയുമായി മൂന്ന് വർഷത്തെ പരിചയം ഉണ്ട്. സ്വർണ്ണക്കടത്തിൽ പങ്കുണ്ടെന്ന് അറിഞ്ഞപ്പോൾ ഞെട്ടിപ്പോയെന്നും ശിവശങ്കർ പറയുന്നു. തന്‍റെ ജന്മദിനത്തില്‍ സമ്മാനമായി സ്വപ്ന നല്‍കിയ ഒരു ഐഫോണ്‍ ആണ് പിന്നീട് വിവാദത്തിന് ഇടയാക്കിയത്. കൈക്കൂലിയായി ലഭിച്ച ഫോൺ സമ്മാനായി തരിക, ഇത്തരമൊരു ചതി തന്നോട് സ്വപ്ന ചെയ്യുമെന്ന് പ്രതീക്ഷിച്ചിരുന്നില്ലെന്നും ശിവശങ്കര്‍ പുസ്തകത്തിൽ പറയുന്നതായി വിവിധ മാധ്യമങ്ങൾ റിപ്പോർട്ട് ചെയ്തു.
സ്വപ്നയുടെ ബയോഡാറ്റയിലെ റഫറൻസ് പേരുകളിലെ ഒന്ന് തന്‍റേതായിരുന്നു എന്നല്ലാതെ, അവരെ ജോലിക്കെടുക്കണമെന്ന് എവിടെയും നിർദേശിച്ചിട്ടില്ലെന്നും ശിവശങ്കർ പുസ്തകത്തിൽ വിശദീകരിക്കുന്നുണ്ട്. ശനിയാഴ്ചയാണ് ‘അശ്വത്ഥാമാവ് വെറും ഒരു ആന’ എന്ന പുസ്തകം പ്രസിദ്ധീകരിക്കുന്നത്.
