സില്‍വര്‍ ലൈന്‍ പദ്ധതിക്ക് കേന്ദ്രം പച്ചക്കൊടി കാണിച്ചിട്ടില്ല, ധനമന്ത്രി ജനങ്ങളെ തെറ്റിദ്ധരിപ്പിക്കുകയാണെന്നും കണ്ണൂർ എംപി കൂടിയായ സുധാകരന്‍ പറഞ്ഞു. കേന്ദ്രത്തിൽ നിന്ന് തത്വത്തിൽ അംഗീകാരംലഭിച്ചെന്ന് പറഞ്ഞ് ധനമന്ത്രി നടത്തിയത് ദുർവ്യാഖ്യാനമാണെന്നും അദ്ദേഹം ആരോപിച്ചു.
Also Read :
“കേരളത്തിലെ ജനങ്ങളെ കബളിപ്പിക്കുകയാണ് അദ്ദേഹം ചെയ്തത്. സില്‍വര്‍ലൈന്‍ പദ്ധതി കേരളത്തിന് പറ്റിയതല്ല. ശാസ്ത്രീയ സാങ്കേതിക പഠനം പോലും നടത്തിയിട്ടില്ല. പദ്ധതി പരിസ്ഥിതി പ്രശ്‌നങ്ങളുണ്ടാക്കും, കാര്‍ഷിക മേഖലയെ തകര്‍ക്കും” സുധാകരന്‍ പറഞ്ഞതായി വിവിധ മാധ്യമങ്ങൾ റിപ്പോർട്ട് ചെയ്തു.
കേന്ദ്രാനുമതിയില്ലാതെ പദ്ധതിക്ക് സ്ഥലം ഏറ്റെടുക്കാനും കല്ലിടാനും പോയ സംസ്ഥാന സര്‍ക്കാരിന്‍റെ തലയ്ക്ക് ഭ്രാന്താണോ എന്നും സുധാകരന്‍ ചോദിച്ചു. കേരളത്തില്‍ ആരും പദ്ധതിയെ അനുകൂലിക്കുന്നില്ലെന്നും കോണ്‍ഗ്രസിന് കെ-റെയില്‍ നിലപാടില്‍ മാറ്റമില്ലെന്നും അദ്ദേഹം പറഞ്ഞു.
Also Read :
ചെറിയ ഇടനാഴിയായ കേരളത്തിൽ വലിയ വികസനത്തിന് പരിധിയുണ്ടെന്നും കെപിസിസി അധ്യക്ഷൻ പറയുന്നു. കവളപ്പാറയിൽ പ്രളയബാധിതരായവർക്ക് വീട് വെച്ച് നല്‍കാന്‍ സർക്കാരിന് കഴിഞ്ഞിട്ടില്ല. ശാസ്ത്ര സാഹിത്യ പരിഷത്ത് പോലും പല്ലും നഖവും ഉപയോഗിച്ച് എതിർക്കുന്ന പദ്ധതിയുമായി സർക്കാർ മുന്നോട്ട് പോകുകയാണെന്നും സുധാകരന്‍ കുറ്റപ്പെടുത്തി. പദ്ധതിയെ എതിർക്കാൻ ഏതറ്റം വരെയും പോകുമെന്നും സുധാകരന്‍ പറഞ്ഞു.
കെ റെയിൽ പദ്ധതി നാടിന് ഗുണകരമാണെന്ന് ബോധ്യപ്പെടുത്തിയാൽ പിന്തുണയ്ക്കുമെന്നായിരുന്നു കെ സുധാകരൻ ഇന്നലെ പറഞ്ഞത്. നമ്മുടെ നാട്ടിൽ ആദ്യമായി വരുന്ന സംരംഭം എന്ന നിലയ്ക്ക് അതിന്റെ എല്ലാ വശങ്ങളും പഠിച്ച് ജനങ്ങളെ സത്യാവസ്ഥ ബോധ്യപ്പെടുത്തണം. പദ്ധതി നടപ്പാക്കരുതെന്ന് സർക്കാരിനോട് പറഞ്ഞിട്ടില്ല. ജനങ്ങളുടെ ആശങ്ക മാറ്റണം. സാമ്പത്തിക ചെലവ് സർക്കാരിന് താങ്ങാൻ സാധിക്കില്ല. ഭൂമി ഏറ്റെടുക്കുന്നതിനെതിരെ കോടതിയെ സമീപിക്കും. ഡിപിആറിന്റെ അഭാവം പദ്ധതിയിലുണ്ടെന്നും ധാർഷ്ട്യം ഒഴിവാക്കണമെന്നും അദ്ദേഹം പറഞ്ഞിരുന്നു.
