സംസ്ഥാനത്ത് കൊവിഡ് 19 മൂന്നാം തരംഗത്തിൻ്റെ ഗുരുതരസാഹചര്യം അവസാനിക്കുകയാണെന്നാണ് ആരോഗ്യവകുപ്പിൻ്റെ വിലയിരുത്തൽ. നിലവിൽ സംസ്ഥാനത്തെ ഐസിയു കിടക്കകളിൽ 42.47 ശതമാനം കിടക്കകളിൽ മാത്രമാണ് രോഗികളുള്ളത്. ഇവരിൽ കൊവിഡ് രോഗികളും ഉള്‍പ്പെടും. 84 ശതമാനത്തോളം വെൻ്റിലേറ്ററുകളും ഒഴിവുണ്ടെന്നും മന്ത്രി വ്യക്തമാക്കി.
Also Read:
അതേസമയം, അന്താരാഷ്ട്ര യാത്രക്കാരുടെ ക്വാറൻ്റൈനിൽ സംസ്ഥാന സര്‍ക്കാര്‍ ഇളവ് നല്‍കി. ഏഴു ദിവസത്തിൽ താഴെ ഹ്രസ്വകാലത്തേയ്ക്ക് സംസ്ഥാനത്ത് എത്തുന്ന അന്താരാഷ്ട്ര യാത്രക്കാര്‍ക്ക് ക്വാറൻ്റൈൻ ആവശ്യമില്ലന്ന് ആരോഗ്യമന്ത്രി അറിയിച്ചു. എന്നാൽ ഇവര്‍ കേന്ദ്രസര്‍ക്കാരിൻ്റെ പരിശോധനാ മാനദണ്ഡങ്ങള്‍ പാലിക്കണമെന്നും കൊവിഡ് മാനദണ്ഡങ്ങള്‍ കര്‍ശനമായി പാലിക്കണമെന്നും മന്ത്രി അറിയിച്ചു. ഏഴു ദിവസത്തിനുള്ളിൽ കേരളത്തിൽ നിന്നു തിരിച്ച് വിദേശത്തേയ്ക്ക് മടങ്ങുന്നവര്‍ക്കു മാത്രമാണ് ഇളവുള്ളത്. അതേസമയം, ഇതിനിടയിൽ കൊവിഡ് 19 പോസിറ്റീവാണെന്നു കണ്ടെത്തിയാൽ ആരോഗ്യസ്ഥാപനങ്ങളെ അറിയിച്ച് ചികിത്സ ലഭ്യമാക്കണമെന്നും മന്ത്രി പറഞ്ഞു.
Also Read:
അതേസമയം, ഒമിക്രോൺ സാഹചര്യം തുടരുന്നതിനാൽ സംസ്ഥാനത്തെ ആശുപത്രികള്‍ക്കും സര്‍ക്കാര്‍ മാര്‍ഗനിര്‍ദേശങ്ങള്‍ പുറത്തിറക്കിയിട്ടുണ്ട്. അത്യാഹിത വിഭാഗത്തിലോ ഒപിയിലോ ചികിത്സയ്ക്ക് എത്തുന്ന എല്ലാ രോഗികള്‍ക്കും കൊവിഡ് പരിശോധന ആവശ്യമില്ലെന്നും കൊവിഡ് 19 രോഗലക്ഷണങ്ങളുണ്ടെങ്കിൽ മാത്രം പരിശോധന നടത്തിയാൽ മതിയെന്നുമാണ് നിര്‍ദേശം. കൂടാതെ തുടര്‍ചികിത്സയുടെ ഭാഗമായി കൊവിഡ് 19 പരിശോധന വേണമെന്ന് ഡോക്ടര്‍ നിര്‍ദേശിച്ചാലും പരിശോധന നടത്താം.
എല്ലാ ആശുപത്രികളിലും കൊവിഡ് 19 ചികിത്സയ്ക്കായി മാത്രം പ്രത്യേക ഇടം ക്രമീകരിക്കണമെന്നും ആരോഗ്യപ്രവര്‍ത്തകര്‍ കൊവിഡ് മാനദണ്ഡങ്ങള്‍ പാലിക്കണമെന്നും ആരോഗ്യമന്ത്രി അറിയിച്ചു. ഒപിയിലും അത്യാഹിതവിഭാഗത്തിലും ഒരു കവാടം മാത്രമേ പാടുള്ളൂ.
ആരോഗ്യപ്രവര്‍ത്തകര്‍ എല്ലാവരും എൻ95 മാസ്ക്, സര്‍ജിക്കൽ ഗൗൺ, ഫേസ് ഷീൽഡ് എന്നിവ ധരിക്കണമെന്നും അതീവ ഗുരുതരാവസ്ഥയിലുള്ള കൊവിഡ് രോഗികളെ ചികിത്സിക്കുമ്പോള്‍ മാത്രം പിപിഇ കിറ്റ് മതിയെന്നും ആരോഗ്യമന്ത്രി അറിയിച്ചു. സൗകര്യങ്ങളുണ്ടായിട്ടും ആശുപത്രികള്‍ ചികിത്സ നിഷേധിച്ചാൽ കര്‍ശന നടപടിയെടുക്കുമെന്നും ആരോഗ്യമന്ത്രി അറിയിച്ചു. സ്വകാര്യ ആശുപത്രികളിൽ ചികിത്സയിൽ തുടരുന്ന രോഗികള്‍ക്ക് കൊവിഡ് 19 സ്ഥിരീകരിച്ചാലും ഡയാലിസിസ് മുടക്കരുതെന്നും മന്ത്രി നിര്‍ദേശം നല്‍കി.
വരുന്ന മൂന്നാഴ്ചയ്ക്കുള്ളിൽ സംസ്ഥാനത്ത് കൊവിഡ് 19 രോഗവ്യാപനം നന്നായി കുറയുമെന്ന് ആരോഗ്യമന്ത്രി മുൻപ് വ്യക്തമാക്കിയിരുന്നു. ഇതിനോടകം തന്നെ രാജ്യത്ത് പ്രതിദിന കൊവിഡ് 19 കേസുകള്‍ രണ്ട് ലക്ഷത്തിൽ താഴെയെത്തിയിട്ടുണ്ട്. പല സംസ്ഥാനങ്ങളും കൊവിഡ് നിയന്ത്രണങ്ങളിൽ ഇളവ് പ്രഖ്യാപിച്ചു.
