മീൻ പൊരിച്ചതും കൂടെ കുറെ പച്ചക്കറികളും ആയിരിക്കും ‘വെജിറ്റബിൾ ഫിഷ് ഫ്രൈ’ എന്ന് നിങ്ങൾ കരുതുന്നുണ്ടെങ്കിൽ നിങ്ങൾക്ക് തെറ്റി. 100 ശതമാനം വെജിറ്റേറിയൻ ഭക്ഷണമാണ് വെജിറ്റബിൾ ഫിഷ് ഫ്രൈ. എന്നാൽ രുചിയോ അസ്സൽ മീൻ വറുത്തതിൻ്റേത് തന്നെ. ആഹാ, ഒന്ന് ട്രൈ ചെയ്താൽ കൊള്ളാം എന്നുണ്ടോ? എങ്കിൽ ഡൽഹിയിലേക്ക് വച്ചുപിടിച്ചോ.
ഈസ്റ്റ് ഡൽഹിയിലെ ഖന്ന തന്തൂരി ജംഗ്ഷൻ എന്ന് പേരുള്ള ഭക്ഷണശാലയിലാണ് തനി വെജിറ്റേറിയൻ ഫിഷ് ഫ്രൈ വിളമ്പുന്നത്. ഫുഡി ഇൻകാർനേറ്റ് എന്ന പേരിൽ ഒരു ഫുഡ് ബ്ലോഗ് നടത്തുന്ന അമർ സിരോഹിയാണ് വെജിറ്റബിൾ ഫിഷ് ഫ്രൈ പരിചയപ്പെടുത്തിയിരിക്കുന്നത്. ‘ശുദ്ധമായ വെജിറ്റേറിയൻ ഫിഷ് ഫ്രൈ’ എന്ന കുറിപ്പോടെ അമർ സിരോഹി പോസ്റ്റ് ചെയ്ത വിഡിയോയിൽ എങ്ങനെയാണ് ഈ വിഭവം തയ്യാറാക്കുന്നത് എന്ന് വിവരിക്കുന്നുണ്ട്.
സോയ, ഇഞ്ചി, വെളുത്തുള്ളി എന്നിവ ചേർത്താണ് മീനിന്റെ ആകൃതിയിൽ അടിസ്ഥാന കൂട്ട് തയ്യാറാക്കുന്നത്. കോൺഫ്‌ളവറും വിവിധ മസാലകളും ചേർത്ത മിശ്രിതത്തിൽ മുക്കിയ ശേഷം ബ്രെഡ്, കോൺ ഫ്‌ളേക്‌സ് പൊടിച്ചതും കൂട്ടി എണ്ണയിൽ വറുത്തെടുക്കുന്നു. പിന്നീട് ചാട്ട് മസാല ചേർത്ത് അലങ്കരിച്ച ശേഷം തന്തൂരി മയോ, പുതിന ചട്നി, റെഡ് ചില്ലി സോസ്, മയോ എന്നിവയ്‌ക്കൊപ്പമാണ് വെജിറ്റേറിയൻ ഫിഷ് ഫ്രൈ വിളമ്പുന്നത്. ഒരു വെജിറ്റേറിയൻ ഫിഷ് ഫ്രൈയ്ക്ക് 250 രൂപ രൂപയാണ് വില.
വിഭവം വെജിറ്റേറിയൻ ആണെങ്കിലും നോൺ വെജ് രുചിയാണെന്ന് ഷെഫ് പറയുന്നത് വിഡിയോയിൽ കാണാം. അമർ സിരോഹി ഇക്കാര്യം രുചിച്ചു നോക്കി ഉറപ്പിക്കുന്നുമുണ്ട്. പലരും ഈ വിഭവം രുചിച്ചു നോക്കണം എന്ന ആഗ്രഹം പ്രകടിപ്പിച്ചപ്പോൾ മീൻ ആരാധകനായ ഒരാളുടെ പ്രതികരണം ഇങ്ങനെ, ” വെജിറ്റൽ ബിരിയാണി എന്നൊരു സംഭവം ഇല്ലാത്തതുപോലെ സോയ കൊണ്ടുള്ള മീനും ഇല്ല. ഇത് രുചികരമായിരിക്കും. പക്ഷെ വെജിറ്റൽ ഫിഷ് ഫ്രൈ എന്നൊരു വിഭവം ഇല്ല. ഉണ്ടാകാൻ പാടില്ല”.
