വ്യക്തിപരമായ അധിക്ഷേപം വേണ്ടെന്ന് സിപിഎം; ലോകായുക്ത വിവാദത്തിൽ ഒറ്റപ്പെട്ട് ജലീൽ

തിരുവനന്തപുരം: ലോകായുക്ത ജസ്റ്റിസ് സിറിയക് ജോസഫിനെതിരെ ആരോപണവുമായി എത്തിയ കെടി ജലീൽ ഒറ്റപ്പെടുന്നു. ജസ്റ്റിസ് സിറിയക് ജോസഫിനെതിരെ വ്യക്തിപരമായ അധിക്ഷേപം വേണ്ടെന്നു സിപിഎം നലപാടെടുത്തതോടെ കെടി ജലീൽ വിഷയത്തിൽ സ്വയം പ്രതിരോധിക്കേണ്ടി വരും. ലോകായുക്തയുടെ അധികാരങ്ങൾ വെട്ടിച്ചുരുക്കാനുള്ള നീക്കവുമായി സംസ്ഥാന സർക്കാർ മുന്നോട്ടു പോകുന്നതിനിടെയാണ് പുതിയ വിവാദം.

Also Read:

ലോകായുക്തയുടെ പേരെടുത്തു പറയാതെ ജസ്റ്റിസ് സിറിയക് ജോസഫിനെതിരെ കെടി ജലീൽ കടുത്ത വിമര്ർശനം ഉന്നയിച്ചത് പ്രതിപക്ഷത്തു നിന്നടക്കം വിമർശനത്തിന് ഇടയാക്കിയിരുന്നു. ഇതു സംബന്ധിച്ച വാർത്താ റിപ്പോർട്ടുകൾക്കു പിന്നാലെ താൻ ഉദ്ദേശിച്ചത് സിറിയക് ജോസഫിനെത്തന്നെയാണെന്ന് വിശദീകരിച്ച് കെടി ജലീൽ രംഗത്തെത്തുകയായിരുന്നു. തക്ക പ്രതിഫലം കിട്ടിയാൽ ആര്‍ക്കു വേണ്ടിയും എന്തു കടുംകൈയ്യും ചെയ്തു കൊടുക്കുന്ന ആളാണ് സിറിയക് ജോസഫ് എന്നായിരുന്നു മുൻമന്ത്രി ജലീലിൻ്റെ വിവാദം. യുഡിഎഫ് നേതാവിനെ കേസിൽ നിന്ന് രക്ഷപെടുത്തുന്നതിൻ്റെ പ്രതിഫലമായി സഹോദരൻ്റെ ഭാര്യയ്ക്ക് ഉന്നത പദവി വിലപേശി വാങ്ങിയെന്നും ജലീൽ ആരോപിച്ചു. അതേസമയം, പുതിയ സാഹചര്യത്തിലും ലോകായുക്തയ്ക്കെതിരെ ആരോപണങ്ങള്‍ തുടരുകയാണ് കെ ടി ജലീൽ.

Also Read:

അതേസമയം, ഒന്നാം പിണറായി സര്‍ക്കാരിൻ്റെ കാലത്ത് നിയമിതനായ ലോകായുക്തയ്ക്കെതിരെ പാര്‍ട്ടി എംഎൽഎ തന്നെ രംഗത്തു വരുന്നത് സിപിഎമ്മിനും രാഷ്ട്രീയമായി തിരിച്ചടിയാണ്. എന്നാൽ ജലീൽ സിപിഎമ്മിൻ്റെ ചാവേറാണെന്നും ലോകായുക്തയുടെ അടി കാണ്ടതു കൊണ്ടാണ് വീര്യം കൂടുന്നതെന്നുമാണ് പ്രതിപക്ഷനേതാവ് വിഡി സതീശൻ്റെ വിമര്‍ശനം.

ജലീലിൻ്റെ വിമ‍ര്‍ശനം സിപിഎം ഏറ്റെടുക്കുന്നില്ലെങ്കിലും തള്ളിക്കളയേണ്ടതില്ലെന്നാണ് സിപിഎം നിലപാട്. ജലീൽ നടത്തിയത് വ്യക്തിപരമായ അഭിപ്രായപ്രകടനം മാത്രമാണെന്നാണ് സിപിഎം വിലയിരുത്തുന്നത്. എന്നാൽ ജസ്റ്റിസ് സിറിയക് ജോസഫിനെതിരെയുള്ള വ്യക്തിപരമായ കാര്യങ്ങളല്ല നിയമഭേദഗതിയ്ക്ക് പിന്നിൽ എന്നാണ് സിപിഎം വ്യക്തമാക്കുന്നത്. സിറിയക് ജോസഫിനു പകരം ആരാണ് ലോകായുക്ത സ്ഥാനത്തുള്ളതെങ്കിലും സംസ്ഥാന സര്‍ക്കാര്‍ ഈ നീക്കം നടത്തുമായിരുന്നുവെന്നും സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ വിശദീകരിച്ചു.

ലോകായുക്ത നിയമത്തിലെ പഴുതുകളാണ് നിയമഭേദഗതിയിലേയ്ക്ക് വഴിവെച്ചതെന്ന് കോടിയേരി വിശദീകരിച്ചു. രാഷ്ട്രീയമായി ഈ വിവാദത്തെ കൈകാര്യം ചെയ്യേണ്ടതില്ലെന്നും ലോകായുക്തയ്ക്കതിരായ നടപടി ജലീലിനോ ഏതെങ്കിലും രാഷ്ട്രീയ നേതാവിനോ എതിരായ വ്യക്തിപരമായ അനുഭവങ്ങളല്ലെന്നും കോടിയേരി വിശദീകരിച്ചു.

ലോകായുക്ത നിയമത്തിലെ 14-ാം വകുപ്പിൽ ചില പഴുതുകളുണ്ടെന്നും ഇത് സര്‍ക്കാരിൻ്റെ പ്രവര്‍ത്തനങ്ങളെ അട്ടിമറിക്കാൻ പോലും ഉപയോഗിക്കപ്പെടാമെന്നുമാണ് സിപിഎം ചൂണ്ടിക്കാണിക്കുന്നത്. ലോകായുക്തയായി ഏതൊരു വ്യക്തി നിയമിക്കപ്പെട്ടാലും ഇതിനുള്ള സാധ്യതകളുണ്ട്. ഇക്കാര്യം മുന്നിൽക്കണ്ടാണ് സര്‍ക്കാര്‍ നീക്കമെന്നാണ് സിപിഎം നേതൃത്വത്തിൻ്റെ വിശദീകരണം.

ലോകായുക്ത നിയമനത്തിൽ രാഷ്ട്രീയ പരിഗണനയില്ലെന്നും നിയമം അനുസരിച്ചു മാത്രമാണ് ഇത്തരം നിയമനങ്ങള്‍ നടത്തുന്നതെന്നും കോടിയേരി ബാലകൃഷ്ണൻ വിശദീകരിച്ചു.