കൊച്ചി: ആയുർവേദ തിരുമ്മൽ കേന്ദ്രത്തിലെ ജീവനക്കാരിയെ സഹപ്രവർത്തകൻ മർദിക്കുകയും ലൈംഗികാതിക്രമത്തിന് ശ്രമിച്ചതായും പരാതി. കൊച്ചി കലൂരിൽ പ്രവർത്തിക്കുന്ന ആയുർവേദ തിരുമ്മൽ കേന്ദ്രത്തിലാണ് സംഭവം. ഇതിന്റെ സി സി ടി വി ദൃശ്യങ്ങൾ പുറത്ത് വന്നു.
കണ്ണൂർ പയ്യാവൂർ സ്വദേശിയായ അജിത്ത് നാരായണനെതിരെയാണ് യുവതി പരാതി നൽകിയിരിക്കുന്നത്. അതേസമയം ലൈംഗികാതിക്രമം നടത്തിയിട്ടും പോലീസ് പ്രതിയെ പിടികൂടാതെ ഒളിച്ചുകളിക്കുകയാണെന്ന് യുവതി ആരോപിക്കുന്നു.
ഇക്കഴിഞ്ഞ തിങ്കളാഴ്ചയായിരുന്നു സംഭവം. തിരുമ്മൽ കേന്ദ്രത്തിലെത്തിയ ക്ലയന്റ് പരാതിപ്പെട്ടെന്ന് ആരോപിച്ച് യുവതിയുടെ സഹപ്രവർത്തകനായ അജിത്ത് നാരായണൻ ക്ഷോഭിക്കുകയും തുടർന്ന് യുവതിയുമായി വാക്കുതർക്കമുണ്ടാവുകയുമായിരുന്നു. ഇതിന് പിന്നാലെ. യുവതിയുടെ മുഖത്തടിക്കുകയും കയറിപ്പിടിക്കാൻ ശ്രമിക്കുകയും ചെയ്തുവെന്നാണ് പരാതി. തുടർന്ന് അജിത്ത് നാരായണൻ മർദിക്കുന്നതിന്റെ സി സി ടി വി ദൃശ്യങ്ങളടക്കമാണ് യുവതി പോലീസിൽ പരാതിപ്പെട്ടത്.
എന്നാൽ പരാതിയിന്മേൽ യുവതിയെ മർദിച്ചതിനും ദേഹോപദ്രവം ഏൽപ്പിച്ചതിനും പോലീസ് കേസ് എടുത്തെങ്കിലും കൃത്യമായി അന്വേഷണം നടത്താതെ അജിത്തിനെ രക്ഷിക്കാൻ പോലീസ് ശ്രമിക്കുകയാണെന്നാണ് യുവതിയുടെ ആരോപണം.
ഈ മാസം 8ാം തീയതിയാണ്യുവതി കലൂരിലെ സ്ഥാപനത്തിൽ ജോലിയിൽ പ്രവേശിച്ചത്. ഇതിനിടയിൽ അജിത്ത് യുവതിയോട് പല തവണ പണം ആവശ്യപ്പെടുകയും മോശമായി പെരുമാറുകയും ചെയ്യുമായിരുന്നു. ഇത് സ്ഥാപനമേധാവിയോട് പരാതിപ്പെട്ടിരുന്നെങ്കിലും യാതൊരു നടപടിയും കൈക്കൊണ്ടിരുന്നില്ലെന്നും യുവതി പറയുന്നു.
എന്നാൽ യുവതിയുടെ പരാതിയെ തുടർന്ന് പോലീസ് കേസ് രജിസ്റ്റർ ചെയ്തിട്ടുണ്ടെന്നും പ്രതി ഒളിവിലാണെന്നും എറണാകുളം നോർത്ത് പോലീസ് എസ് എച്ച് ഒ മാതൃഭൂമി ഡോട്ട് കോമിനോട് പറഞ്ഞു.
അതേസമയം നോർത്ത് പോലീസ് പ്രതിയെ പിടികൂടാതെ ഒളിച്ചുകളിക്കുകയാണെന്ന് ആരോപിച്ച് കൊച്ചി ഡെപ്യൂട്ടി കമ്മിഷണർക്ക് പരാതി നൽകിയിട്ടുണ്ട്. യുവതിയുടെ പരാതിയെ തുടർന്ന് അജിത്ത് നാരായണനെ പുറത്താക്കിയതായി ആയുർവേദ തിരുമ്മൽ കേന്ദ്രം വ്യക്തമാക്കി.
Content Highlights: Assault on womanemployee of an Ayurvedic massage center by collegue
