കൊവിഡ് വ്യാപനം: കൂടുതൽ നിയന്ത്രണങ്ങൾ വരുമോ? മന്ത്രിസഭായോഗം ഇന്ന്

തിരുവനന്തപുരം: സംസ്ഥാനത്ത് കൊവിഡ് വ്യാപനം തീവ്രമായി തുടരുന്ന സാഹചര്യത്തിൽ കൂടുതൽ നിയന്ത്രണങ്ങൾ ഉണ്ടാകുമോയെന്ന് ഇന്നറിയാം. നിലവിൽ ജില്ലകളെ മൂന്ന് വിഭാഗമായി തിരിച്ചാണ് നിയന്ത്രണം ഏർപ്പെടുത്തിയിരിക്കുന്നത്. ഇതിൽ മാറ്റങ്ങൾ വരുത്തണമോയെന്ന് ഇന്ന് ചേരുന്ന മന്ത്രിസഭാ യോഗം ചർച്ച ചെയ്തേക്കുമെന്ന് ഏഷ്യാനെറ്റ് ന്യൂസാണ് റിപ്പോർട്ട് ചെയ്തത്.

നിലവിൽ ജില്ലകളെ എ, ബി, സി എന്നിങ്ങനെ മൂന്ന് കാറ്റഗറികളായി തിരിച്ചാണ് നിയന്ത്രണങ്ങൾ ഏർപ്പെടുത്തിയിരിക്കുന്നത്. ഇതിന്‍റെ പുരോഗതി വിലയിരുത്തിയാകും തുടർ തീരുമാനങ്ങളിലേക്ക് യോഗം എത്തുക. പരിശോധനകളുടെ എണ്ണം കൂട്ടുന്നത് മുതലുള്ള തീരുമാനങ്ങളും യോഗത്തിൽ ഉണ്ടായേക്കും.

Also Read :
അതേസമയം സ്കൂളുകളുടെ പ്രവർത്തനം സംബന്ധിച്ച് തീരുമാനമെടുക്കാൻ വിദ്യാഭ്യാസ വകുപ്പ് വിളിച്ചുചേർത്ത ഉന്നതതലയോഗവും ഇന്ന് നടക്കും. നിലവിൽ ഓൺലൈനിലേക്ക് മാറ്റിയ ക്ലാസുകളുടെ നടത്തിപ്പ്, വാക്സിനേഷൻ പുരോഗതി തുടങ്ങിയവ യോഗം ചർച്ച ചെയ്യും. ഒന്ന് മുതൽ 9 വരെയുള്ള ഓൺലൈൻ ക്ലാസുകളുടെ നടത്തിപ്പ്, പത്ത്, പതിനൊന്ന്, പന്ത്രണ്ട് ക്ലാസുകളുടെ ക്രമീകരണം, പരീക്ഷാ നടത്തിപ്പ്, കുട്ടികളുടെ വാക്സിനേഷൻ പുരോഗതി, എന്നിവയാകും ഉന്നതതലയോഗത്തിലെ പ്രധാന ചർച്ച. ഡി ഡി, ആർ ഡി ഡി, എ ഡി തലത്തിലെ ഉദ്യോഗസ്ഥരാണ് യോഗത്തിൽ പങ്കെടുക്കുക.

അതേസമയം സംസ്ഥാനത്ത് ഇന്നലെ 49,771 പേര്‍ക്കായിരുന്നു കൊവിഡ്-19 സ്ഥിരീകരിച്ചത്. എറണാകുളം 9567, തിരുവനന്തപുരം 6945, തൃശൂര്‍ 4449, കോഴിക്കോട് 4196, കൊല്ലം 4177, കോട്ടയം 3922 എന്നിങ്ങനെയാണ് കേസുകൾ. നിലവില്‍ 3,00,556 കോവിഡ് കേസുകളില്‍, 3.6 ശതമാനം വ്യക്തികള്‍ മാത്രമാണ് ആശുപത്രി/ഫീല്‍ഡ് ആശുപത്രികളില്‍ പ്രവേശിപ്പിക്കപ്പെട്ടിട്ടുള്ളത്. രോഗം സ്ഥിരീകരിച്ച് ചികിത്സയിലായിരുന്ന 34,439 പേര്‍ രോഗമുക്തി നേടുകയും ചെയ്തിരുന്നു.

Also Read :
മന്ത്രിസഭാ യോഗത്തിൽ ലോകായുക്ത നിയമ ഭേദഗതി ഓർഡിനൻസിന് മേലുള്ള വിവാദങ്ങളും ചർച്ചയാകാൻ സാധ്യതയുണ്ട്. കഴിഞ്ഞദിവസം സിപിഐ സംസ്ഥാന സെക്രട്ടറി കാനം രാജേന്ദ്രനും വിഷയത്തിൽ പ്രതികരണം നടത്തിയിരുന്നു. ബില്ലായി നിയമഭയിൽ കൊണ്ടുവരാമായിരുന്നുവെന്ന് കാനം രാജേന്ദ്രന്‍ മാധ്യമങ്ങളോട് പറഞ്ഞത്.