മറ്റൊരു രാജ്യത്തും ഇല്ലാത്ത വിധത്തിൽ വിപുലമായ സാംസ്കാരിക വൈവിധ്യമാണ് ഇന്ത്യയിലുള്ളതെന്നും ഈ വലിയ ഭൂപ്രദേശത്തെ അന്തേവാസികളെ ഒരു മാലയിലെന്ന പോൽ കോര്‍ത്തിട്ട പട്ടുനൂലാണ് ഭരണഘടനയെന്നും മുഖ്യമന്ത്രി പറഞ്ഞു. ഇന്ത്യ എന്ന ആശയത്തെ മൂര്‍ത്തവത്കരിക്കുന്നത് ഭരണഘടനയാണ്. വിഭാഗീയതയിൽ വേരുകളാഴ്ത്തി വളരുന്ന വര്‍ഗീയ രാഷ്ട്രീയം ഭരണഘടനയുടെ അന്തഃസത്തയെ തകര്‍ക്കാൻ ശ്രമിക്കുകയാണെന്നും അത് സംസ്ഥാനങ്ങളുടെ അധികാരത്തെയും ഫെഡറലിസത്തെയും ദുര്‍ബലപ്പെടുത്തുകയാണെന്നും മുഖ്യമന്ത്രി വിമര്‍ശിച്ചു.
Also Read:
“ഭരണഘടന കേവലം ഒരു നിയമ പുസ്തകമല്ല. ജീവിതത്തിൻ്റെ ചാലകശക്തിയാണ്. അതിൽ തുടിക്കുന്നത് ഒരു കാലഘട്ടത്തിൻ്റെ ആത്മാവാണ്” എന്ന ഡോ. ബി ആര്‍ അംബേദ്കറുടെ വാക്കുകളും മുഖ്യമന്ത്രി ചൂണ്ടിക്കാട്ടി. ജനാധിപത്യത്തിൻ്റെ അര്‍ത്ഥം തന്നെ പകുത്ത ചോര്‍ത്തുകയാണെന്നും ഈ വിപത്തുകള്‍ക്കെതിരെ ജനാധിപത്യ വിശ്വാസികള്‍ കരുത്തോടെ പോരാടണമെന്നും മുഖ്യമന്ത്രി ആവശ്യപ്പെട്ടു. ഭരണഘടനയുടെ അന്തസത്ത നഷ്ടപ്പെടാതെ സൂക്ഷിക്കുമെന്ന് റിപബ്ലിക് ദിനത്തിൽ പ്രതിജ്ഞ ചെയ്യണമെന്നും മുഖ്യമന്ത്രി ആവശ്യപ്പെട്ടു.
കൊവിഡ് മഹാമാരിയുടെ ആഘാതത്തിനു ശേഷം നാടിൻ്റെ പുരോഗതിയ്ക്കു വേണ്ടി കൈകോര്‍ത്തു നിൽക്കണമെന്ന് മുഖ്യമന്ത്രി പറഞ്ഞു. “കോവിഡ് മഹാമാരിയേൽപ്പിച്ച ആഘാതങ്ങളിൽ നിന്നും മുക്തി നേടി നമ്മുടെ സംസ്ഥാനം പുരോഗതിയുടെ പാതയിൽ കൂടുതൽ വേഗത്തിൽ കുതിക്കേണ്ട ഈ ഘട്ടത്തിൽ അത്തരത്തിലുള്ള ഐക്യമനോഭാവം കൂടുതൽ പ്രസക്തമാവുകയാണ്.” മുഖ്യമന്ത്രി പോസ്റ്റിൽ കുറിച്ചു. ഐക്യത്തിനും ‘പുരോഗതിയുടെ പാതയ്ക്കും’ തുരങ്കം വെക്കുന്ന വിധ്വംസക ശക്തികളെ തിരിച്ചറിഞ്ഞു പരാജയപ്പെടുത്തണമെന്നും ഇതിന് കേരളം ഒറ്റക്കെട്ടായി നിൽക്കുമെന്ന് പൂർണവിശ്വാസമുണ്ടെന്നും മുഖ്യമന്ത്രി പറഞ്ഞു. കുപ്രചാരണങ്ങൾക്കും സങ്കുചിത താത്പര്യങ്ങൾക്കും അർഹിക്കുന്ന മറുപടി നൽകാനുള്ള ആ‍ര്‍ജവം കേരളത്തിലെ ജനങ്ങൾക്കുണ്ട്. സാമൂഹികി ഉച്ചനീചത്വങ്ങൾ അവസാനിക്കാത്തിടത്തോളം കാലം ഭരണഘടന പൂര്‍ണ അര്‍ധത്തിൽ പ്രായോഗികവത്കരിക്കപ്പെടുകയില്ല എന്നും മുഖ്യമന്ത്രി വ്യക്തമാക്കി.
Also Read:
അതേസമയം, തിരുവനന്തപുരത്തു നടന്ന റിപബ്ലിക് ദിനാഘോഷങ്ങള്‍ക്ക് മന്ത്രി കെ എൻ ബാലഗോപാൽ നേതൃത്വം നൽകി. പ്രസംഗത്തിൽ ഗവ‍ണര്‍ ആരിഫ് മുഹമ്മദ് ഖാൻ മുഖ്യമന്ത്രി പിണറായി വിജയനെ അഭിനന്ദിച്ചു. നീതി ആയോഗ് വികസനസൂചികകളിൽ കേരളം നടത്തിയ മികച്ച പ്രകടനത്തിൻ്റെ പേരിലാണ് അഭിനന്ദനം.
സംസ്ഥാന സർക്കാർ വിഭാവനം ചെയ്യുന്ന കെ റെയിൽ സെമി ഹൈസ്പീഡ് പദ്ധതിയ്ക്കെതിരെ യുഡിഎഫും ബിജെപി അടക്കമുള്ള വലതുപക്ഷ പാർട്ടികളും കടുത്ത പ്രതിഷേധവുമായി മുന്നോട്ടു പോകുന്നതിനിടെയാണ് മുഖ്യമന്ത്രിയുടെ വാക്കുകൾ. പദ്ധതി കേരളത്തെ സാമ്പത്തികവും പാരിസ്ഥിതികവുമായി തകർക്കുമെന്നാണ് പ്രതിപക്ഷത്തിൻ്റെ വാക്കുകൾ. വികസന പദ്ധതികളിൽ നിന്ന് സർക്കാർ പിന്നോട്ടു പോകില്ലെന്നു മുൻപും മുഖ്യമന്ത്രി വ്യക്തമാക്കിയിരുന്നു.
