കേസിൽ പ്രതികളുടെയും സാക്ഷികളുടെയും മൊഴികള്‍ തമ്മിൽ പൊരുത്തക്കേടുകള്‍ ഉണ്ടെന്നാണ് റിപ്പോര്‍ട്ടുകള്‍. കേസിലെ തെളിവായ ശബ്ദരേഖയിലെ ശബ്ദം ദിലീപിൻ്റേതെന്നു സ്ഥിരീകരിക്കാനാണ് അന്വേഷണസംഘം ചിലരെ വിളിച്ചു വരുത്തിയത്. പലരും ശബ്ദം ദിലീപിൻ്റേതാണെന്നു തിരിച്ചറിഞ്ഞിട്ടുണ്ടെന്നാണ് റിപ്പോര്‍ട്ടുകള്‍. ശബ്ദരേഖ ശാസ്ത്രീയപരിശോധനയ്ക്ക് അയച്ച് റിപ്പോര്‍ട്ട് ലഭിക്കാനുള്ള കാലതാമസം ഒഴിവാക്കാനാണ് ക്രൈം ബ്രാഞ്ച് സാക്ഷിമൊഴികളെ ആശ്രയിക്കുന്നത്.
Also Read:
ആദ്യ രണ്ട് ദിവസവും ദിലീപ് നൽകിയ മൊഴികളിലെ പൊരുത്തക്കേടുകള്‍ സംബന്ധിച്ച ചോദ്യങ്ങളായിരുന്നു മൂന്നാം ദിവസം ഉണ്ടായിരുന്നത്. കൂടാതെ വീഡിയോ തെളിവുകള്‍ ഉപയോഗിച്ചും ചോദ്യം ചെയ്തു. എന്നാൽ ഹൈക്കോടതിയിൽ പ്രതിഭാഗം സമര്‍പ്പിച്ച സത്യവാങ്മൂലത്തിലെ വാദങ്ങളോടു ചേര്‍ന്നു നിൽക്കുന്നതായിരുന്നു ദിലീപിൻ്റെ മറുപടികള്‍. ദിലീപിനു മുന്നിൽ അന്വേഷണസംഘം നിരത്തിയ തെളിവുകള്‍ സംവിധായകൻ ബാലചന്ദ്ര കുമാര്‍ കെട്ടിച്ചമച്ചതാണെന്നാണ് ദിലീപിന്‍റെ നിലപാട്. അവസാന ദിവസം ക്രൈം ബ്രാഞ്ച് എസ്പി എസ് ശ്രീജിത്ത് അടക്കമുള്ള ഉന്നത ഉദ്യോഗസ്ഥരും ചോദ്യം ചെയ്യലിനായി എത്തിയിരുന്നു. മൂന്ന് ദിവസത്തെ ചോദ്യം ചെയ്യലിൽ നിന്നു ലഭിച്ച വിവരങ്ങളും ഉദ്യോഗസ്ഥര്‍ അപഗ്രഥിച്ചു.
ശബ്ദരേഖയിൽ കേള്‍ക്കുന്നത് ദിലീപിൻ്റെ ശബ്ദം തന്നെയാണെന്നു തിരിച്ചറിയാൻ സുഹൃത്തും സംവിധായകനുമായ വ്യാസൻ എടവനക്കാടിനെയും പോലീസ് വിളിച്ചുവരുത്തിയിരുന്നു. തനിക്ക് കേസിനെക്കുറിച്ച് അറിവില്ലെന്നായിരുന്നു വ്യാസൻ മാധ്യമങ്ങളോടു പ്രതികരിച്ചത്. അതേസമയം, ഇദ്ദേഹം ദിലീപിൻ്റെ ശബ്ദം തിരിച്ചറിഞ്ഞതായാണ് റിപ്പോര്‍ട്ടുകള്‍.
Also Read:
ശബ്ദരേഖയിൽ കേള്‍ക്കുന്നത് ദിലീപ് അടക്കം അഞ്ച് പേരുടെ ശബ്ദമാണെന്ന് സ്വതന്ത്രമൊഴികളിലൂടെ സ്ഥിരീകരിക്കാൻ കഴിഞ്ഞെന്നാണ് റിപ്പോര്‍ട്ടുകള്‍. തെളിവുകള്‍ക്ക് ബലം പോരെന്ന കാരണം ചൂണ്ടിക്കാട്ടിയാണ് കഴിഞ്ഞ ദിവസം കോടതി ദിലീപിൻ്റെ അറസ്റ്റ് തടഞ്ഞത്. എന്നാൽ ഗൂഢാലോചന സംബന്ധിച്ച വിവരങ്ങള്‍ പ്രോസിക്യൂഷൻ കൈമാറിയതോടെ കോടതി ചോദ്യം ചെയ്യലിന് അനുമതി നൽകുകയായിരുന്നു. ചോദ്യം ചെയ്യലിനു ശേഷം ലഭിച്ച പുതിയ കണ്ടെത്തലുകള്‍ കോടതി അംഗീകരിച്ചാൽ പ്രതിഭാഗത്തിനു തിരിച്ചടിയാകും. എന്നാൽ ശാസ്ത്രീയ തെളിവുകളുടെ അഭാവത്തിൽ കേസ് മുന്നോട്ടുകൊണ്ടുപോകുക എന്നതാണ് ക്രൈം ബ്രാഞ്ചിനു മുന്നിലെ വെല്ലുവിളി.
ദിലീപിൻ്റെ സഹോദരൻ അനൂപ്, സഹോദരീഭര്‍ത്താവ് സൂരജ്, സുഹൃത്ത് ബൈജു ചെങ്ങമനാട്, അപ്പു എന്നിവരെയും ചോദ്യം ചെയ്തിട്ടുണ്ട്. മൊഴിയെടുപ്പിനായി സംവിധായകരായ അരുൺ ഗോപി, റാഫി, വ്യാസൻ എടവനക്കാട്, ദിലീപിൻ്റെ സ്ഥാപനത്തിലെ ജീവനക്കാര്‍ എന്നിവരെയും പോലീസ വിളിച്ചു വരുത്തി. ശബ്ദരേഖ ശാസ്ത്രീയ പരിശോധനയ്ക്കു കൂടി വിധേയമാക്കാനാണ് അന്വേഷണസംഘത്തിൻ്റെ തീരുമാനം.
അതേസമയം, പ്രതികള്‍ കേസിലെ തളെവിനു നശിപ്പിച്ചെന്നും ഗൂഢാലോചനക്കേസ് രജിസ്റ്റര്‍ ചെയ്തതിനു പിന്നാലെ പ്രതികള്‍ ഫോണുകള്‍ മാറ്റിയത് തെളിവുകള്‍ ഇല്ലാതാക്കാനാണെന്നുമാണ് അന്വേഷണ ഉദ്യോഗസ്ഥര്‍ പറയുന്നത്. ക്രൈം ബ്രാഞ്ചിനു മുന്നിൽ ഹാജരാക്കിയത് പുതിയ മൊബൈൽ ഫോണുകളായിരുന്നു. പഴയ ഫോണുകള്‍ ഹാജരാക്കാൻ പ്രതികള്‍ക്ക് നോട്ടീസ് നൽകിയിട്ടുണ്ടെന്നും ക്രൈം ബ്രാഞ്ച് എസ് പി മോഹനചന്ദ്രൻ പറഞ്ഞതായി മാതൃഭൂമി ന്യൂസ് റിപ്പോര്‍ട്ട് ചെയ്തു.
