നടിയെ ആക്രമിച്ച കേസിന്റെ വിചാരണ പൂർത്തിയാക്കാൻ ആറ് മാസത്തെ സമയംകൂടി അനുവദിക്കണമെന്ന് ആവശ്യപ്പെട്ട് സംസ്ഥാന സർക്കാർ നൽകിയ അപേക്ഷ നാളെ സുപ്രീംകോടതി പരിഗണിക്കാനിരിക്കെയാണ് ദിലീപ് കോടതിയെ സമീപിച്ചിരിക്കുന്നത്. കേസിൽ അന്വേഷണ ഉദ്യോഗസ്ഥന്റെ വിചാരണ മാത്രമാണ് ഇനി അവശേഷിക്കുന്നത്. അദ്ദേഹം വിചാരണ ഒഴിവാക്കാൻ ശ്രമിക്കുന്നതിന്റെ ഭാഗമാണ് സർക്കാരിന്റെ അപേക്ഷയെന്നും ദിലീപ് ആരോപിക്കുന്നു.
ബാലചന്ദ്രകുമാർ എന്നയാളെ അന്വേഷണ സംഘം വാടകയ്ക്കെടുത്ത സാക്ഷിയാണ്. ബാലചന്ദ്രകുമാറിന്റെ വെളിപ്പെടുത്തലുകളെ വിശ്വസിക്കാനാകില്ല. വിചാരണ ജഡ്ജിയെ മാറ്റുകയെന്ന ഗൂഢ ഉദ്ദേശവും സംസ്ഥാന സർക്കാരിനുണ്ട്. നേരത്തെ ജഡ്ജിയെ മാറ്റണമെന്ന് സംസ്ഥാനസർക്കാർ ആവശ്യപ്പെട്ടത് ചൂണ്ടിക്കാട്ടിയാണ് ദിലീപിന്റെ ആരോപണം- മറുപടി സത്യവാങ്മൂലത്തിൽ ദിലീപ് ആരോപിക്കുന്നു.
വിചാരണ ജഡ്ജിയാണ് കൂടുതൽ സമയം ആവശ്യപ്പെടേണ്ടത്. എന്നാൽ ജഡ്ജി അക്കാര്യം ആവശ്യപ്പെട്ടിട്ടില്ല. ഇപ്പോൾ ബാലചന്ദ്രകുമാർ നടത്തിയ വെളിപ്പെടുത്തലുകൾ എന്തുകൊണ്ട് നേരത്തെ നടത്തിയില്ല എന്ന ചോദ്യത്തിന് കൃത്യമായ മറുപടി നൽകിയിട്ടില്ലെന്നും സത്യവാങ്മൂലത്തിൽ ദിലീപ് പറയുന്നു.
