തിരുവനന്തപുരം മെഡിക്കൽ കോളേജിലെ 25 ഡോക്ടർമാർക്ക് കൊവിഡ് സ്ഥിരീകരിച്ചു. ഇവർ ഉൾപ്പെടെ ആശുപത്രി ജീവനക്കാരായ 107 പേർക്കാണ് കൊവിഡ് സ്ഥിരീകരിച്ചത്.
തിരുവനന്തപുരം ജനറൽ ആശുപത്രിയിലെ 10 ഡോക്ടർമാക്കും 17 ആരോഗ്യ പ്രവർത്തകർക്കും കൊവിഡ് ബാധിച്ചു. അത്യാഹിത വിഭാഗത്തിൽ മാത്രം മൂന്ന് ഡോക്ടർമാർക്കാണ് രോഗം സ്ഥിരീകരിച്ചത്. വൈറസ് വ്യാപനത്തെ തുടർന്ന് ഡെന്റൽ, ഇഎൻടി വിഭാഗങ്ങൾ അടച്ചു.
നേമം താലൂക്ക് ആശുപത്രിയിൽ മൂന്ന് ഡോക്ടർമാർ അടക്കം 21 പേർക്കാണ് രോഗബാധ റിപ്പോർട്ട് ചെയ്യപ്പെട്ടിരിക്കുന്നത്.
എറണാകുളം ജില്ലയിലെ കളമശേരി മെഡിക്കൽ കോളേജിലും കൊവിഡ് പ്രതിസന്ധി രൂക്ഷമാണ്. 22 ഡോകർമാർ ഉൾപ്പെടെ 75 ജീവനക്കാർക്കാണ് ഈ ആശുപത്രിയിൽ കൊവിഡ് ബാധിച്ചിരിക്കുന്നത്. ഡോക്ടർമാരിൽ 17 പേർ ഹൗസ് സ‍ര്‍ജൻമാരാണ്. 11 നഴ്സുമാ‍ര്‍, 29 മെഡിക്കൽ വിദ്യാ‍ര്‍ത്ഥികൾ, 13 ജീവനക്കാ‍ര്‍ എന്നിവരാണ് മറ്റുള്ളവ‍ര്‍. ആശുപത്രി സൂപ്രണ്ട് ഗണേശ് മോഹനനും രോഗം സ്ഥിരീകരിച്ചിട്ടുണ്ട്.
കോഴിക്കോട് മെഡിക്കൽ കോളേജിൽ ഏഴ് ഡോക്ട‍ര്‍ക്കും നാല് മെഡിക്കൽ വിദ്യാ‍ര്‍ത്ഥികൾക്കും കൊവിഡ് സ്ഥിരീകരിച്ചു. ആശുപത്രി കൊവിഡ് രോഗികളാൽ നിറഞ്ഞിരിക്കുകയാണെന്നാണ് ഏഷ്യാനെറ്റ് റിപ്പോര്‍ട്ട് ചെയ്യുന്നത്.
അതേസമയം സംസ്ഥാനത്ത് കൊവിഡ് വ്യാപനം രൂക്ഷമായ സാഹചര്യത്തിൽ കൂടുതൽ നിയന്ത്രണങ്ങൾക്ക് സാധ്യത ഏറിയിരിക്കുകയാണ്. വ്യാഴാഴ്ച മുഖ്യമന്ത്രി പിണറായി വിജയന്റെ നേതൃത്വത്തിൽ കൊവിഡ് അവലോകന യോഗം ചേരും. മുഖ്യമന്ത്രിയെ കൂടാതെ ആരോഗ്യ വകുപ്പ് മന്ത്രി, തദ്ദേശ സ്വയംഭരണ വകുപ്പ് മന്ത്രി, വകുപ്പു സെക്രട്ടറിമാർ അടക്കമുള്ളവർ യോഗത്തിൽ പങ്കെടുക്കും.
സെക്രട്ടറിയേറ്റിലും കെഎസ്ആ‍ര്‍ടിസി ജീവനക്കാര്‍ക്കിടയിലും പോലീസുകാര്‍ക്കിടയിലും കൊവിഡ് വ്യാപനം രൂക്ഷമാണ്. ആശുപത്രിയിൽ എത്തുന്ന രോഗികളുടെ എണ്ണത്തിൽ വ‍ര്‍ദ്ധനവുണ്ട്. ചികിത്സയ്ക്കായി കൂടുതൽ സിഎഫ്എൽടിസികൾ തുറക്കുന്നത് സ‍ര്‍ക്കാരിന്റെ പരിഗണനയിലുണ്ട്. ഡോക്ടറുടെ സേവനം ആവശ്യമില്ലാത്ത ആളുകളെ ഈ കേന്ദ്രങ്ങളിലേക്ക് മാറ്റും.
