ഒന്ന് മുതൽ ഒൻപത് വരെയുള്ള ക്ലാസുകൾ ഈ മാസം 21 മുതൽ രണ്ടാഴ്ചത്തേക്ക് ഓൺലൈൻ മുഖേനെയാക്കാൻ സർക്കാർ തീരുമാനമെടുത്തിരുന്നു. ഇതിൻ്റെ ഭാഗമായിട്ടാണ് പുതിയ മാർഗരേഖ സർക്കാർ പുറത്തിറക്കുന്നത്. 10, 11, 12 ക്ലാസുകൾ ഓഫ് ലൈൻ രീതിയിൽ തുടരുമെങ്കിലും പ്രത്യേക പ്രത്യേക നിർദേശങ്ങൾ നൽകിയേക്കും. പത്താം ക്ലാസ് വിദ്യാർഥികൾക്ക് കൂടുതൽ നേരം ക്ലാസ് നൽകുന്ന കാര്യവും ആലോചനയിലുണ്ട്.
മന്ത്രിയുടെ അധ്യക്ഷതയിൽ ചേരുന്ന ഉന്നതാധികാരസമിതിയോഗത്തിൽ പത്താം ക്ലാസിലെ കുട്ടികൾക്ക് കൂടുതൽ ക്ലാസ് സമയം നൽകാനുള്ള സാധ്യതയുണ്ട്. ഉച്ചവരെ മാത്രമായിരിക്കും ക്ലാസുകൾ. കുട്ടികൾ തമ്മിൽ സമ്പർക്കം കൂടുന്നത് രോഗവ്യാപനത്തിന് കാരണമാകുന്നതിനാൽ ഗ്രൂപ്പുകളായി തിരിച്ച് ക്ലാസുകൾ നടത്തുന്ന കാര്യവും സർക്കാരിൻ്റെ ആലോചനയിലുണ്ട്.
കൊവിഡ് കേസുകൾ വർധിക്കുന്ന പശ്ചാത്തലത്തിൽ ഒന്ന് മുതൽ ഒൻപതാം ക്ലാസ് വരെ ഓൺലൈൻ ക്ലാസ് മാത്രമാക്കാൻ മുഖ്യമന്ത്രി പിണറായി വിജയൻ്റെ അധ്യക്ഷതയിൽ ചേർന്ന കൊവിഡ് അവലോകന യോഗത്തിൽ തീരുമാനമായിരുന്നു. ജനുവരി 21ന് ശേഷം ഒമ്പതാം ക്ലാസ് വരെയുള്ള കുട്ടികൾക്ക് ക്ലാസ് ഉണ്ടായിരിക്കില്ല. എന്നാൽ, പത്താം ക്ലാസ് മുതൽ പ്ലസ് ടു വരെയുള്ള ക്ലാസുകൾ പതിവ് പോലെ നടക്കും. ഒമ്പതാം ക്ലാസ് വരെയുള്ള കുട്ടികൾക്ക് ഓഫ് ലൈൻ ക്ലാസുകൾ തുടരും. ഫെബ്രുവരി രണ്ടാം വാരം ഇത് തുടരണമോയെന്ന് പരിശോധിക്കും. വിദ്യാഭ്യാസ സ്ഥാപനങ്ങളിൽ ക്ലസ്റ്ററുകൾ രൂപപ്പെട്ടാൽ രണ്ടാഴ്ചവരെ അടച്ചിടാൻ പ്രിൻസിപ്പൽ/ഹെഡ്മാസ്റ്റർക്ക് അധികാരം നൽകും.
കൊവിഡ് വ്യാപനം രൂക്ഷമായാൽ അതാത് സ്ഥാപനങ്ങൾ അടച്ചിടാമെന്ന് മുഖ്യമന്ത്രിയുടെ അധ്യക്ഷതയിൽ ചേർന്ന യോഗത്തിൽ തീരുമാനമായി. മേലാധികാരികൾക്ക് ഇക്കാര്യത്തിൽ തീരുമാനമെടുക്കാം. സ്കൂളുകൾ, കോളേജുകൾ അടക്കമുള്ള എല്ലാ സ്ഥാപനങ്ങളും കൊവിഡ് വ്യാപനം രൂക്ഷമാവുകയോ കൂടുതൽ രോഗികളുണ്ടെന്ന് കണ്ടെത്തുകയോ ചെയ്താൻ മേലാധികാരികൾക്ക് അടച്ചിടാം. സർക്കാർ പരിപാടികൾ പരാമാവധി ഓൺലൈൻ ആക്കാനും അവലോകന യോഗത്തിൽ തീരുമാനമായിരുന്നു.
