“കൊവിഡ് വ്യാപനം രൂക്ഷമായ സാഹചര്യത്തില്‍ ജനുവരി 16 മുതല്‍ 31 വരെ കോണ്‍ഗ്രസിന്റെ എല്ലാ പൊതുപരിപാടികളും മാറ്റിവച്ചതായി കെപിസിസി പ്രസിഡന്റ് കെ സുധാകരന്‍ എംപി അറിയിച്ചു. മറ്റു പരിപാടികള്‍ കൊവിഡ് വ്യവസ്ഥകള്‍ പാലിച്ചു മാത്രമേ നടത്താവൂ എന്നും അദ്ദേഹം നിര്‍ദേശിച്ചു. ജനുവരി 17ന് 5 സര്‍വകലാശാലകളിലേക്കു നടത്താനിരുന്ന യുഡിഎഫ് മാര്‍ച്ചും മാറ്റിവച്ചിട്ടുണ്ട്.” കെപിസിസി ഫേസ്ബുക്ക് പോസ്റ്റിൽ അറിയിച്ചു.
കേരളത്തിൽ കൊവിഡ് വ്യാപനം ശക്തമായ സാഹചര്യത്തിലാണ് കെപിസിസിയുടെ തീരുമാനം. അടുത്ത മൂന്നാഴ്ചയ്ക്കുള്ളിൽ കേരത്തിൽ കൊവിഡിൻ്റെ അതിതീവ്ര വ്യാപനം ഉണ്ടാകാനുള്ള സാധ്യത നിലനിൽക്കുന്നുണ്ടെന്ന് ആരോഗ്യമന്ത്രി വീണാ ജോർജ് വ്യക്തമാക്കിയിരുന്നു. നിലവിൽ 78 സജീവ കൊവിഡ് ക്ലസ്റ്ററുകൾ സംസ്ഥാനത്തുണ്ട്. ഡെൽറ്റയും ഒമിക്രോണും ഒരു പോലെയുണ്ടെന്നുള്ളതാണ് കേരളത്തിലെ സാഹചര്യമെന്നും മന്ത്രി പറഞ്ഞു.
എല്ലാവരും ജാഗ്രത പാലിക്കേണ്ട സമയമാണിത്. സ്ഥാപനങ്ങൾ കേന്ദ്രീകരിച്ചാണ് കൊവിഡ് വ്യാപനം ഉണ്ടാകുന്നതെന്നും മന്ത്രി പറഞ്ഞു. സി പി എം അടക്കം രാഷ്ട്രീയ പാർട്ടികളുടെ സമ്മേളനങ്ങളിൽ കൊവിഡ് മാനദണ്ഡങ്ങൾ പാലിക്കുന്നുണ്ട്. തിരുവനന്തപുരം സമ്മേളനത്തിൽ കൊവിഡ് ബാധയുണ്ടായ സാഹചര്യത്തിൽ പ്രോട്ടോക്കോൾ പ്രകാരമുള്ള നടപടികൾ സ്വീകരിക്കും. സമ്പർക്കത്തിൽ വന്ന മുഴുവൻ ആളുകളും ക്വാറൻ്റൈനിൽ പോകണം. സംസ്ഥാനത്ത് ഒരു മരുന്നിനും ക്ഷാമമില്ലെന്നും മന്ത്രി കൂട്ടിച്ചേർത്തു.
