മെക്സിക്കോയിലെ ഗ്വാഡലജാറയിലെ പ്രശസ്തമായ റസ്റ്റോറന്റായ കർനെ ഗരിബാൾഡിയാണ് 13.5 സെക്കൻഡിൽ ഭക്ഷണം വിളമ്പി ഗിന്നസ് വേൾഡ് റെക്കോർഡ് സ്വന്തമാക്കിയത്. ഏറ്റവും വേഗത്തിൽ വിളമ്പാൻ കഴിയുക ആർക്ക് എന്നറിയാൻ വെയിറ്റർമാർ തമ്മിലുള്ള ഒരു ഗെയിമായിട്ടാണ് എല്ലാം ആരംഭിച്ചത്. മത്സരം മുറുകിയപ്പോൾ 1996 ഓഗസ്റ്റ് 31-ന് കർനെ ഗരിബാൾഡിയിലെ വെയിറ്റർമാർ 13.5 സെക്കൻഡിനുള്ളിൽ ഒരു തീന്മേശയിൽ ഭക്ഷണം വിളമ്പി.
ഇപ്പോൾ പക്ഷെ 13.5 സെക്കൻഡിനുള്ളിൽ കർനെ ഗരിബാൾഡിയിലെ വെയിറ്റർമാർക്ക് ഭക്ഷണം വിളമ്പാൻ സാധിക്കാറില്ല. എങ്കിലും ഒരു മിനിറ്റിനുള്ളിൽ ഭക്ഷണം മേശയിലെത്തും, അത് ഗ്യാരണ്ടി. എന്താ ഇത്ര ഉറപ്പ് എന്നല്ലേ? ഹോട്ടലിൽ ഒരു പ്രധാന കോഴ്‌സ് മാത്രമേയുള്ളൂ – കാർനെ എൻ സു ജുഗോ എന്ന് പേരുള്ള ഗ്വാഡലജാരയിലും പടിഞ്ഞാറൻ സംസ്ഥാനമായ ജാലിസ്കോയിലും പ്രശസ്തമായ വിഭവം. ഈ പരമ്പരാഗത മെക്സിക്കൻ ഭക്ഷണത്തിന് മണിക്കൂറുകളോളം പാചകം ആവശ്യമാണ്. അതിനാൽ, റെസ്റ്റോറന്റ് തുറക്കുന്നതിന് വളരെ മുമ്പുതന്നെ വിഭവങ്ങൾ തയ്യാറാക്കുന്നു. ഓർഡർ ലഭിച്ചാൽ ഉടനെ ചൂടാക്കി പാത്രത്തിൽ വിളമ്പി ഉപഭോക്താവിന്റെ മേശയിലേക്ക്, അതാണ് കർനെ ഗരിബാൾഡിയിലെ രീതി.
ഗിന്നസ് വേൾഡ് റെക്കോർഡ് സ്ഥാപിച്ചതിൽ പിന്നെ മെക്സിക്കോ, അമേരിക്ക, യൂറോപ്പ് എന്നിവിടങ്ങളിൽ നിന്നുള്ള വിനോദസഞ്ചാരികൾ ഗ്വാഡലജാറയിലെത്തിയാൽ കർനെ ഗരിബാൾഡിയിൽ കയറാതെ മടങ്ങാറില്ല. ഇതോടെ ഒരു മിനിറ്റിനുള്ളിൽ ഉപഭോകതാവിന് ഭക്ഷണം വിളമ്പുക എന്നത് തങ്ങളുടെ ലക്ഷ്യമാക്കി മാറ്റിയിരിക്കയാണ് .
