സിപിഐ ബ്രാഞ്ച് കമ്മിറ്റി അംഗമായ ജയശങ്കർ സമൂഹമാധ്യമങ്ങളിലും ചാനൽ ചർച്ചയിലും സർക്കാരിനേയും നേതാക്കളേയും നിരന്തരം വിമർശിക്കുന്നത് പാർട്ടിക്കും മുന്നണിക്കും ദോഷമാണെന്ന വിലയിരുത്തലിനെത്തുടർന്നാണ് പുറത്താക്കാൻ തീരുമാനമെടുത്തത്. ഇതേ തുടർന്ന് ജയശങ്കറിന്റെ പാർട്ടി അംഗത്വം പുതുക്കി നൽകേണ്ടെന്ന് തീരുമാനിച്ചിരുന്നു.
2020 ജുലൈയിൽ ബ്രാഞ്ച് പൊതുയോഗത്തിൽ ജയശങ്കറിന്റെ അച്ചടക്ക ലംഘനം ചൂണ്ടിക്കാട്ടി ശാസിച്ചിട്ടും അദ്ദേഹം അനുസരിച്ചില്ല. പാർട്ടിയുടേയും പാർട്ടി ബഹുജന സംഘടനകളുടേയും യോഗങ്ങളിലും പ്രവർത്തനങ്ങളിലും കാമ്പെയിനുകളിലും പങ്കെടുത്തില്ല. തുടങ്ങിയ കാര്യങ്ങൾ ചൂണ്ടിക്കാട്ടിയാണ് ജയശങ്കറിന് പാർട്ടി അംഗത്വം പുതുക്കി നൽകേണ്ടതില്ലെന്ന് തീരുമാനിച്ചത്.
എന്നാൽ ബ്രാഞ്ച് കമ്മിറ്റിയുടെ തീരുമാനത്തിനെതിരെ ജയശങ്കർ പരാതി നൽകി. തുടർന്ന് സംസ്ഥാന കൺട്രോൾ കമ്മീഷൻ അധ്യക്ഷൻ സി പി മുരളിയുടെ നേതൃത്വത്തിൽ തെളിവെടുപ്പ് നടത്തി. അന്വേഷണത്തിൽ ജയശങ്കറിന്റെ ഭാഗത്ത് വീഴ്ചയില്ലെന്നാണ് കണ്ടെത്തൽ. തുടർന്ന് അംഗത്വം പുനഃസ്ഥാപിക്കണമെന്ന് ഏകകണ്ഠമായി പാർട്ടിക്ക് റിപ്പോർട്ട് നൽകി. ഇത് സിപിഐ സംസ്ഥാന എക്സിക്യൂട്ടീവ് അംഗീകരിക്കുകയായിരുന്നു.
