ഓൺലൈനായി മന്ത്രിസഭ ചേരുമെന്നും ഇ ഫയൽ സംവിധാനത്തിലൂടെ അത്യാവശ്യ ഫയലുകളിൽ താൻ തീരുമാനമെടുക്കുമെന്നും ഇന്നലത്തെ യോഗത്തിൽ മുഖ്യമന്ത്രി സൂചിപ്പിച്ചെന്നും മനോരമ റിപ്പോർട്ടിലുണ്ട്. അടുത്ത മന്ത്രിസഭാ യോഗം 19ന് തന്നെ ഓൺലൈനായി ചേരും. ഇന്നലെ സിപിഎം കോഴിക്കോട് ജില്ലാ സമ്മേളനത്തിലായിരുന്ന മുഖ്യമന്ത്രി കോഴിക്കോട് നിന്നാണ് ഓൺലൈൻ മന്ത്രിസഭ യോഗത്തിൽ അധ്യക്ഷത വഹിച്ചത്.
Also Read :
മുഖ്യമന്ത്രി ചികിത്സയ്ക്കായി വിദേശത്തേക്ക് പോകുമ്പോൾ ചുമതല മറ്റാർക്കെങ്കിലും കൈമാറണമെന്ന ആവശ്യം നേരത്തെ ഉയർന്നിരുന്നു. മുതിർന്ന നേതാവായ എംവി ഗോവിന്ദൻ മാസ്റ്റർക്ക് ചുമതല കൈമാറണമെന്ന് കോൺഗ്രസ് നേതാവ് ചെറിയാൻ ഫിലിപ്പും ആവശ്യപ്പെട്ടിരുന്നു. മുഖ്യമന്ത്രി ചുമതല കൈമാറുമോയെന്ന ആകാംക്ഷ അവസാനിപ്പിച്ചുകൊണ്ടാണ് ഒടുവിൽ തീരുമാനം വന്നിരിക്കുന്നത്.
ജനുവരി 15 നാണ് ചികിത്സയ്ക്ക് പോകുന്നത്. ഈ മാസം 29 വരെയാണ് മുഖ്യമന്ത്രി അമേരിക്കയിൽ തുടരുകയെന്നാണ് ചീഫ് സെക്രട്ടറി പുറത്തിറക്കിയ ഉത്തരവിൽ പറയുന്നത്. ചികിത്സയുമായി ബന്ധപ്പെട്ട എല്ലാ ചെലവുകളും സംസ്ഥാന സർക്കാർ വഹിക്കുമെന്ന് ഉത്തരവിലുണ്ട്. നേരത്തെ 2018ലും മുഖ്യമന്ത്രി ചികിത്സയ്ക്കായി അമേരിക്കയിൽ പോയിരുന്നു. അന്നും മറ്റാർക്കും ചുമതല കൈമാറിയിരുന്നില്ല.
Also Read :
മിനിസോട്ടയിലെ മായോ ക്ലിനിക്കിലാണ് മുഖ്യമന്ത്രി ചികിത്സ നടത്തുന്നത്. തുടർ ചികിത്സയ്ക്കായി നേരത്തെ തന്നെ അദ്ദേഹം അമേരിക്കയിലേക്ക് പോകേണ്ടിയിരുന്നതാണെങ്കിലും കൊവിഡ് സാഹചര്യവും മറ്റും കണക്കിലെടുത്ത് യാത്ര മാറ്റിവയ്ക്കുകയായിരുന്നു. മുഖ്യമന്ത്രിയ്ക്കൊപ്പം ഭാര്യ കമല, പേഴ്‌സണല്‍ അസിസ്റ്റന്‍റ് സുനീഷ് എന്നിവരും അമേരിക്കയിലേക്ക് പോകുമെന്നാണ് റിപ്പോർട്ട്. ജനുവരി 30നാണ് അദ്ദേഹം നാട്ടില്‍ തിരിച്ചെത്തുക.
