പൈനാവ് > ഇടുക്കി പൈനാവ് എൻജിനീയറിങ് കോളേജിൽ എസ്എഫ്ഐ പ്രവർത്തകൻ ധീരജ് രാജേന്ദ്രനെ കുത്തിക്കൊന്നത് യൂത്ത് കോൺഗ്രസ് ക്രിമിനൽ മണിയാറംകുടി സ്വദേശി നിഖിൽ പൈലിയാണെന്ന് ഇടുക്കി ജില്ലാ പഞ്ചായത്ത് അംഗം കെ ജി സത്യൻ. കുത്തേറ്റ ധീരജിനെ ആശുപത്രിയിലെത്തിച്ചത് സത്യന്റെ കാറിലായിരുന്നു.
ജില്ലാ പഞ്ചായത്തിലേക്ക് പോകുന്ന വഴിയാണ് ധീരജിനെ ആശുപത്രിയിൽ എത്തിക്കാൻ കുട്ടികൾ വിളിക്കുന്നത്. കാറുമായി സംഭവ സ്ഥലത്തേക്ക് പോകുമ്പോൾ നിഖിൽ ഓടി വരുന്നത് കണ്ടുവെന്നും സത്യൻ പറഞ്ഞു. ധീരജുമായി ആശുപത്രിയിലേക്ക് പോകുമ്പോൾ ബസ് സ്റ്റോപ്പിൽ നിന്നിരുന്ന നിഖിലും സുഹൃത്തും കലക്ട്രേറ്റ് ഭാഗത്തേക്ക് ഓടിപ്പോയതായും സത്യൻ പറഞ്ഞു.
യൂത്ത് കോൺഗ്രസിന്റെ സജീവ പ്രവർത്തകനാണ് നിഖിൽ പൈലി. കെപിസിസി പ്രസിഡന്റ് കെ സുധാകരൻ, പ്രതിപക്ഷ നേതാവ് വി ഡി സതീശൻ തുടങ്ങി കോൺഗ്രസിന്റെയും യൂത്ത് കോൺഗ്രസിന്റെയും സംസ്ഥാന‐ജില്ലാ നേതാക്കളുമായി അടുത്ത ബന്ധമുള്ളയാളാണ് നിഖിൽ. ഇത് തെളിയിക്കുന്ന ചിത്രങ്ങളും പുറത്തുവന്നു. നവമാധ്യമങ്ങളിൽ നിരന്തരം പ്രാകോപനപരമായ പോസ്റ്റുകളും നിഖിൽ ഇട്ടിരുന്നു.
