മാഡ്രിഡ്
കരീം ബെൻസെമയുടെയും വിനീഷ്യസ് ജൂനിയറുടെയും ഗോളടിയിൽ റയൽ മാഡ്രിഡ് കുതിക്കുന്നു. വലെൻസിയയെ 4–-1ന് തകർത്ത് സ്പാനിഷ് ഫുട്ബോൾ ലീഗിൽ ഒന്നാംസ്ഥാനത്ത് എട്ട് പോയിന്റ് ലീഡായി. ബെൻസെമയും വിനീഷ്യസും ഇരട്ടഗോൾ നേടി. ലീഗിൽ ഗോൾവേട്ടക്കാരിലും ഇരുവരുമാണ് മുന്നിൽ. 17 ഗോളോടെ ബെൻസെമ ഒന്നാമതും 12 എണ്ണവുമായി വിനീഷ്യസ് രണ്ടാമതുമുണ്ട്. റയലിനായി ആകെ 300 ഗോളും തികച്ചു ബെൻസെമ.
മറ്റൊരു മത്സരത്തിൽ ബാഴ്സലോണയെ ഗ്രനഡ 1–-1ന് തളച്ചു. ലൂക്ക് ഡിയോങ്ങിലൂടെ മുന്നിലെത്തിയ ബാഴ്സയെ 89–-ാംമിനിറ്റിൽ അന്റോണിയോ പുയെർടാസിലൂടെ ഗ്രനഡ ഒപ്പംപിടിക്കുകയായിരുന്നു. 21 കളിയിൽ 49 പോയിന്റുമായാണ് റയൽ കുതിക്കുന്നത്. രണ്ടാമതുള്ള സെവിയ്യയ്ക്ക് 19ൽ 41ഉം മൂന്നാമതുള്ള റയൽ ബെറ്റിസിന് 33 പോയിന്റുമാണ്. 32 പോയിന്റുള്ള ബാഴ്സ ആറാമതാണ്.
