ആറുവരി ഹൈവേയുടെ പകുതി കല്ല് മതി കെ-റെയിലിന്; നീരൊഴുക്ക് തടസ്സപ്പെടില്ല: തോമസ് ഐസക്

തിരുവനന്തപുരം: കെ-റെയിൽ സിൽവര്‍ലൈൻ പദ്ധതിയ്ക്കെതിരെ പ്രതിഷേധം ശക്തമാകുന്നതിനിടെ ആശങ്കകള്‍ക്ക് മറുപടിയുമായി മുൻ ധനമന്ത്രി തോമസ് ഐസക്. കെ-റെയിൽ പാതയ്ക്കെതിരെ ഉയരുന്ന എല്ലാ ആശങ്കകളും മുൻകാല ചരിത്രം വെച്ചുനോക്കിയാൽ അടിസ്ഥാന രഹിതമല്ലെന്നും എന്നാൽ പ്രശ്നങ്ങള്‍ പരിഹരിക്കാനാണ് ശ്രമിക്കുന്നതെന്നും തോമസ് ഐസക് ഫേസ്ബുക്ക് പോസ്റ്റിൽ പറഞ്ഞു.

പദ്ധതി വിഭാവനം ചെയ്തിരിക്കുന്നത് പരമാവധി പാരിസ്ഥിതിക ആഘാതം കുറയ്ക്കാൻ പറ്റുന്ന രീതിയിലാണെന്ന് തോമസ് ഐസക് പറഞ്ഞു. എന്നാൽ ഓരോ പ്രദേശത്തെയും നീര്‍ച്ചാലുകളും ഭൂപ്രകൃതിയും കണക്കിലെടുത്ത് വിശദമായ ഹൈഡ്രോഗ്രഫിക് സര്‍വേ വേണ്ടിവരുമെന്നും തോമസ് ഐസക് പറഞ്ഞു. സിൽവര്‍ലൈലിൻ്റെ നാലിൽ മൂന്ന് ഭാഗവും കടന്നു പോകുന്നത് നിലവിലുള്ള റെയിൽവേയ്ക്ക് സമാനമായ തരത്തിൽ എംബാങ്ക്മെന്‍റിലൂടെയാണെന്നും ഇതിനിടയിൽ ആവശ്യത്തിനു കലുങ്കുകള്‍ ഉണ്ടാകുമെന്നും അദ്ദേഹം പറഞ്ഞു.

കേരളത്തെ രണ്ടായി പിളര്‍ക്കുമെന്ന വാദം അടിസ്ഥാന രഹിതമാണെന്ന് തോമസ് ഐസക് പറഞ്ഞു.
കാസര്‍കോട് മുതൽ തിരൂര്‍ വരെ പാത പോകുന്നത് നിലവിലെ പാതയ്ക്ക് സമാന്തരമായാണെന്നും അതിനാൽ ഇവിടെ പുതുതായി ഒരു പിളര്‍പ്പും ഉണ്ടാക്കുന്നില്ലെന്നും അദ്ദേഹം പറഞ്ഞു. എന്നാൽ അതിവേഗപ്പാതയിലേയ്ക്ക് മനുഷ്യരോ മൃഗങ്ങളോ കടക്കുന്നത് തടയാൻ ഫെൻസിങ് വേണ്ടിവരുമെന്നും അദ്ദേഹം വ്യക്തമാക്കി. 500 മീറ്റര്‍ കൂടുമ്പോള്‍ ആളുകള്‍ക്ക് കുറുകെ കടക്കാൻ വഴിയുണ്ടാകും.

Also Read:

ഇന്ത്യൻ റെയിൽവേ നിയമം അനുസരിച്ചാണ് ഇത്തരത്തിൽ ഫെൻസിങ് നടത്തുന്നതെന്നും ഇപ്പോള്‍ ആറുവരി ഹൈവേകള്‍ക്കു പോലും ഫെൻസിങ് നടത്തുന്നുണ്ടെന്നും തോമസ് ഐസക് ചൂണ്ടിക്കാട്ടി. ആ അര്‍ത്ഥത്തിൽ ആറുവരിപ്പാതകളും കേരളത്തെ രണ്ടായി ഭാഗിക്കുമെന്നു വാദിക്കാമെന്നും തോമസ് ഐസക് പറഞ്ഞു.

നീരൊഴുക്ക് തടസ്സപ്പെടുമെന്നും വെള്ളപ്പൊക്കമുണ്ടാകുമെന്നുമുള്ള ആരോപണങ്ങളും അദ്ദേഹം തള്ളി. വെള്ളം കിഴക്കു നിന്ന് പടിഞ്ഞാറേയ്ക്ക് പരന്നൊഴുകുകയല്ലെന്നും പുഴകളിലൂടെയും നീര്‍ച്ചാലുകളിലൂടെയുമാണ് ഒഴുകുന്നതെന്നും അദ്ദേഹം ചൂണ്ടിക്കാട്ടി. ഇവയ്ക്ക് തടസ്സമുണ്ടാകാത്ത തരത്തിലായിരിക്കും നിര്‍മാണം. കഴിഞ്ഞ നൂറുവര്‍ഷത്തെ വെള്ളപ്പൊക്കവും വേലിയേറ്റവും കണക്കിലെടുത്താണ് പദ്ധതി രൂപകൽപന ചെയ്തിരിക്കുന്നതെന്നും തോമസ് ഐസക് പറഞ്ഞു.

Also Read:

പദ്ധതി യാഥാര്‍ഥ്യമാകുന്നതോടെ കാര്‍ബൺ ബഹിര്‍ഗമനത്തിൽ 2.8 ലക്ഷം ടണ്ണിൻ്റെ കുറവുണ്ടാക്കാൻ കഴിയുമെന്ന് തോമസ് ഐസക് പറഞ്ഞു. അതേസമയം, ആറുവരി ദേശീയപാതയുണ്ടാക്കാൻ വേണ്ടി വരുന്ന ഭൂമി, കല്ല്, മണ്ണ്, മണൽ എന്നിവയുടെ പകുതി മാത്രമാണ് കെ റെയിലിനു വേണ്ടി വരികയെന്നും അദ്ദേഹം പറഞ്ഞു. വന്യജീവി മേഖലകളിലൂടെയോ പരിസ്ഥിതിലോല പ്രദേശങ്ങളിലൂടെയോ പദ്ധതി കടന്നുപോകുന്നില്ലെന്നും തോമസ് ഐസക് വ്യക്തമാക്കി.

മുൻകാല അനുഭവങ്ങള്‍ വെച്ച് പാരിസ്ഥിതിക അവകാശവാദങ്ങൾ ഉന്നയിക്കുന്നവരെ താൻ പഴിക്കില്ലെന്നും എന്നാൽ ഇതിൻ്റെ മറവിൽ വിശദമായ പഠനം നടത്താൻ പോലും അനുവദിക്കില്ലെന്ന നിലപാട് വികസനവിരുദ്ധമാണെന്നും തോമസ് ഐസക് പറഞ്ഞു.