സിഐഐ, ക്രെഡായ് തുടങ്ങിയ വ്യവസായ സംഘടനകളുടെ പ്രതിനിധികളും മറ്റു പ്രമുഖ വ്യവസായികളും പരിപാടിയിൽ പങ്കെടുത്തതായി മുഖ്യമന്ത്രി പറഞ്ഞു. ഐടി, ഫാര്‍മസ്യൂട്ടിക്കൽ മേഖലകളിലെ പ്രമുഖരും പരിപാടിയിൽ സംബന്ധിച്ചു. വ്യവാസികളുമായി കേരളത്തിലെ നിക്ഷേപസാധ്യതകളെക്കുറിച്ച് ചര്‍ച്ച നടത്തിയെന്നും മുഖ്യമന്ത്രി വ്യക്തമാക്കി.
പരിസ്ഥിതി സുസ്ഥിരതയ്ക്ക് കോട്ടം തട്ടാത്ത തരത്തിൽ വ്യവസായങ്ങള്‍ വളര്‍ത്താനും രാജ്യത്തെ ഏറ്റവും മികച്ച നിക്ഷേപ സൗഹൃദസംസ്ഥാനമാകാനുമാണ് കേരളം ശ്രമിക്കുന്നതെന്ന് മുഖ്യമന്ത്രി പറഞ്ഞു. സാമ്പത്തിക വികസനത്തിൽ ഏറ്റവും ചലനാത്മകമായ ഘട്ടത്തിലൂടെയാണ് കേരളം കടന്നു പോകുന്നത്.രാജ്യത്തെ വിവിധ ഭാഗങ്ങളിലുള്ള നിക്ഷേപകരെ ഇതിൻ്റെ ഭാഗമാക്കേണ്ടതുണ്ടെന്നും മുഖ്യമന്ത്രി പറഞ്ഞു.
Also Read:
രാജ്യത്തെ മികച്ച നിക്ഷേപസൗഹൃദ സംസ്ഥാനമാക്കി മാറ്റുമെന്ന് കേരളത്തിലെ ജനങ്ങള്‍ക്ക് സര്‍ക്കാര്‍ രണ്ടാമതും തെരഞ്ഞെടുപ്പിൽ വിജയിച്ചപ്പോള്‍ വാക്കു നല്‍കിയിരുന്നു എന്ന് മുഖ്യമന്ത്രി പറഞ്ഞു. ഉത്തരവാദിത്തമുള്ള വ്യവസായികളെയും നിക്ഷേപകരെയുമാണ് സംസ്ഥാനത്തേയ്ക്ക് ആകര്‍ഷിക്കുന്നതെന്ന് അദ്ദേഹം പറഞ്ഞു. കേരളത്തെ വ്യവസായ സൗഹൃദമാക്കാൻ സര്‍ക്കാര്‍ നടപ്പാക്കിയ നടപടികള്‍ മുഖ്യമന്ത്രി വിശദീകരിച്ചു. വ്യവസായങ്ങളെ പരിസ്ഥിതി സൗഹൃദമായും നിയമപരമായും മുന്നോട്ടു കൊണ്ടുപോകാൻ ആവശ്യമായ നടപടികളും സ്വീകരിച്ചിട്ടുണ്ട്. വ്യവസായികള്‍ക്കു വേണ്ടി ഏകജാലകസംവിധാനം രൂപീകരിച്ച ആദ്യ സംസ്ഥാനവും കേരളമാണെന്ന് മുഖ്യമന്ത്രി പറഞ്ഞു.
Also Read:
രാജ്യത്ത് ലഭ്യമായ ഏറ്റവും മികച്ച സൗകര്യങ്ങള്‍ നിക്ഷേപകര്‍ക്ക് നൽകാൻ സാധിക്കുമെന്ന് കേരളത്തിന് ഉറപ്പുണ്ടെന്നും ഇതിനായുള്ള വിഭവങ്ങള്‍ കേരളത്തിൽ സമൃദ്ധമാണെന്നും മുഖ്യമന്ത്രി വ്യക്തമാക്കി. വികസിത രാജ്യങ്ങളുമായി താരതമ്യം ചെയ്യാൻ കഴിയുംവിധം രാജ്യത്തെ തന്നെ ഏറ്റവും സാക്ഷരരും വിദ്യാസമ്പന്നരുമായ തൊഴിലാളികളെ നൽകാൻ കേരളത്തിനു സാധിക്കുമെന്നും മുഖ്യമന്ത്രി പറഞ്ഞു.
മുൻപ് സംസ്ഥാന സര്‍ക്കാരുമായി കൊമ്പുകോര്‍ത്ത കിറ്റക്സ് എംഡി സാബു എം ജേക്കബ് തെലങ്കാന സര്‍ക്കാരുമായി ചര്‍ച്ച നടത്തിയത് വാര്‍ത്തയായിരുന്നു. കിറ്റക്സ് കേരളം വിടുമെന്നും തെലങ്കാനയിൽ വ്യവസായം തുടങ്ങുമെന്നുമായിരുന്നു സാബു എം ജേക്കബ് പ്രഖ്യാപിച്ചത്.
