നിലവിലുള്ള റെയിൽപാത ഉപയോഗിച്ചു കൊണ്ടു തന്നെ സബര്ബൻ റെയിൽപാത നിര്‍മിക്കാൻ 300 ഏക്കര്‍ ഭൂമിയും പതിനായിരം രൂപ മാത്രം ചെലവുമാണ് വരുന്നതെന്ന് ഉമ്മൻ ചാണ്ടി ചൂണ്ടിക്കാട്ടി. എന്നാൽ കെ റെയിൽ പദ്ധതിയ്ക്ക് രണ്ട് ലക്ഷം രൂപയോളം വേണ്ടി വരുമെന്ന് അവകാശപ്പെട്ട അദ്ദേഹം 20,000 കുടുംബങ്ങളെ കുടിയൊഴിപ്പിക്കേണ്ടി വരുമെന്നും ആരോപിച്ചു. കെ-റെയിലിലായി 1383 ഹെക്ടര്‍ സ്ഥലമാണ് ഏറ്റെടുക്കേണ്ടി വരിക. കെ റെയിലിനെതിരെ ഉന്നയിക്കുന്ന എല്ലാ ആക്ഷേപങ്ങള്‍ക്കും പരിഹാരമാണ് സബര്ബൻ റെയിൽ പാത എന്നും അദ്ദേഹം വിശദീകരിച്ചു.
Also Read:
യുഡിഎഫ് സര്‍ക്കാരിൻ്റെ കാലത്ത് ആലോചിച്ചെങ്കിലും പിന്നീട് വേണ്ടെന്നു വെച്ച സബര്ബൻ റെയിൽപാത സിൽവര്‍ലൈൻ പാതയ്ക്ക് ബദലാകുമെന്നാണ് മുൻ മുഖ്യമന്ത്രിയുടെ അവകാശവാദം. വിഎസ് സര്‍ക്കാരിൻ്റെ കാലത്ത് ബജറ്റിൽ അതിവേഗ റെയിൽപാത പ്രഖ്യാപിക്കുകയും സാധ്യതാപഠനത്തിനായി ഡിഎംആര്‍സിയെ നിയോഗിക്കുകയും ചെയ്തിരുന്നു. എന്നാൽ യുഡിഎഫ് സര്‍ക്കാരിൻ്റെ കാലത്താണ് പഠന റിപ്പോര്‍ട്ട് കിട്ടിയത്. എന്നാൽ ഭീമമായ ബാധ്യത കണക്കിലെടുത്ത് പദ്ധതി യുഡിഎഫ് സര്‍ക്കാര്‍ വേണ്ടെന്നു വെക്കുകയായിരുന്നു. എന്നാൽ ഇതിനു പകരമായി വ്യക്തമായ നിര്‍ദേശം മുന്നോട്ടു വെച്ചിരുന്നുവെന്നും അദ്ദേഹം ചൂണ്ടിക്കാട്ടി.
സബര്ബൻ പദ്ധതിയുടെ പൈലറ്റ് ഘട്ടമെന്ന നിലയ്ക്ക് 1943 കോടിരൂപ ചെലവിൽ ചെങ്ങന്നൂര്‍ വരെയുള്ള 125 കിലോമീറ്റര്‍ പാത ഏറ്റെടുക്കുകയായിരുന്നു. ഇതിനു വേണ്ടത് 70 ഏക്കര്‍ സ്ഥലം മാത്രമാണ്. നിലവിലുള്ള റെയിൽവേ ലൈനുകളാണ് ഉപയോഗിക്കുക. ചെങ്ങന്നൂര്‍ വരെ ഇരട്ടപ്പാതയുണ്ടെന്നതും ശബരിമലയുടെ സാന്നിധ്യവും പരിഗണിച്ചാണ് തുടക്കത്തിൽ ഇവിടം പരിഗണിച്ചത്. എല്ലാ അനുമതിയും ലഭിച്ചാൽ ഇത് മൂന്ന് വര്‍ഷം കൊണ്ട് നടപ്പാക്കാൻ സാധിക്കുമെന്നും ഉമ്മൻ ചാണ്ടി പറഞ്ഞു.
Also Read:
നിലവിലുള്ള സിഗ്നൽ സംവിധാനം മെച്ചപ്പെടുത്തുകുയും വളവുകള്‍ നിവര്‍ത്തുന്നതും പ്ലാറ്റ്ഫോമുകള്‍ പുതുക്കിപ്പണിയുന്നതുമാണ് പദ്ധതിയുടെ ഭാഗമായി വരുന്ന ജോലികള്‍. പദ്ധതി യാഥാര്‍ഥ്യമായാൽ നിലവിലുള്ള ട്രെയിനുകള്‍ വേഗത്തിൽ ഓടിക്കാനും സാധിക്കും. ഘട്ടം ഘട്ടമായി കണ്ണൂര്‍ വരെ നീട്ടാനായിരുന്നു പദ്ധതി തയ്യാറാക്കിയതെന്ന് ഉമ്മൻ ചാണ്ടി പറഞ്ഞു. മെമു മാതൃകയിലുള്ള ട്രയിനുകള്‍ 20 മിനിട്ട് ഇടവേളയിൽ 160 കിലോമീറ്റര്‍ വരെ വേഗത്തിൽ ഓടാൻ സാധിക്കുമെന്നും അദ്ദേഹം അവകാശപ്പെട്ടു. പദ്ധതിയ്ക്ക് മൊത്തത്തിൽ പതിനായിരം കോടി രൂപ ചെലവും 300 ഏക്കര്‍ ഭൂമിയും മാത്രമാണ് വേണ്ടിവരികയെന്നും അദ്ദേഹം പറഞ്ഞു.
ഇന്ത്യൻ റെയിൽവേയുമായി ചേര്‍ന്ന് യുഡിഎഫ് സര്‍ക്കാര്‍ കമ്പനി രജിസ്റ്റര്‍ ചെയ്തെങ്കിലും 2014ൽ ഭരണം നഷ്ടപ്പെട്ടതോടെ കേന്ദ്ര പിന്തുണ കുറഞ്ഞെന്നും ഉമ്മൻ ചാണ്ടി പറഞ്ഞു. ഈ പദ്ധതിയും വിഎസ് സര്‍ക്കാരിൻ്റെ കാലത്തെ അതിവേഗ റെയിൽപാത പദ്ധതിയും ഒഴിവാക്കിയാണ് പിണറായി സര്‍ക്കാര്‍ കെ റെയിലുമായി മുന്നോട്ടു പോകുന്നത്. വൻകിട വികസന പദ്ധതികള്‍ക്ക് യുഡിഎഫ് എതിരല്ലെന്നും എന്നാൽ കേരളത്തെ തകര്‍ക്കുന്ന പദ്ധതികള്‍ വരികയും ബദൽ സാധ്യതകള്‍ പരിഗണിക്കാതിരിക്കുകയും ചെയ്താൽ ജനങ്ങളോടൊപ്പം ചേര്‍ന്ന് പദ്ധതിയെ പ്രതിരോധിക്കുമെന്നും ഉമ്മൻ ചാണ്ടി പറഞ്ഞു.
