സിൽവർലൈനിൽ സിപിഎം ലക്ഷ്യം അഞ്ച് ശതമാനം കമ്മിഷനിലാണെന്ന് കെപിസിസി പ്രസിഡൻ്റ് കുറ്റപ്പെടുത്തി. സിൽവർലൈനിന് വേണ്ടി മുഖ്യമന്ത്രി വാശി പിടിക്കുന്നത് ലാവലിൻ നേട്ടം ഓർത്താണ്. പണ്ട് കാലം മുതൽ പിണറായി വിജയന് കമ്മീഷൻ ഇഷ്ടമാണ്. ലാവലിൻ അഴിമതിക്കാലത്ത് ഇക്കാര്യം തെളിഞ്ഞതാണ്. ഒരു കാരണവശാലും പദ്ധതി നടപ്പാക്കാൻ സമ്മതിക്കില്ല. വീടുകൾ സന്ദർശിച്ച് കോൺഗ്രസ് പ്രചാരണം നടത്തും. ലഘുലേഖകൾ നൽകി ജനങ്ങളെ ബോധ്യപ്പെടുത്തുമെന്നും സുധാകരൻ പറഞ്ഞു.
കോടതി വിധിപോലും മാനിക്കാതെയാണ് കല്ലുകൾ സ്ഥാപിച്ചത്. കേരളം അഭിമുഖീകരിക്കുന്ന രാഷ്ട്രീയ പ്രശ്നമാണ് സിൽവർലൈൻ. പദ്ധതി കടന്നുപൊകുന്ന പ്രദേശത്ത് മാത്രമല്ല പ്രശ്നങ്ങളുള്ളത്. കാലഹരണപ്പെട്ട പദ്ധതിയാണ് സർക്കാർ നടപ്പാക്കാൻ ശ്രമിക്കുന്നത്. സിപിഎം – സിപിഐ അണികൾ പോലും പദ്ധതിക്ക് എതിരാണ്.
ജനങ്ങളുടെ സമാധാനം തകർത്ത സംഭവമായി സിൽവർ ലൈൻ മാറി. ട്രാക്ക് പോകുന്ന പരിസരത്തുള്ളവരും പ്രതിസന്ധിയിലാകും. ക്രമസമാധാന തകർച്ച മുഖ്യമന്ത്രിക്ക് വിളിച്ചുവരുത്താം. കടുത്ത നിലപാടാണ് വിഷയത്തിൽ കെപിസിസിയുടേത്. കോൺഗ്രസിനെ വികസനം പഠിപ്പിക്കാൻ പിണറായി വരേണ്ട. വേണ്ട എന്ന് തന്നെയാണ് കെപിസിസി നിലപാട്. തൻ്റേടമുണ്ടെങ്കിൽ മുഖ്യമന്ത്രി ഞങ്ങളെ ബോധ്യപ്പെടുത്തണം. എന്നിട്ട് സംസാരിക്കാമെന്നും സുധാകരൻ പറഞ്ഞു.
അതേസമയം, കെ റെയിൽ പദ്ധതിയുമായി ബന്ധപ്പെട്ട് ഭൂമിയും വീടും നഷ്ടപ്പെടുന്നവർക്കുള്ള പുനരധിവാസ പാക്കേജ് സർക്കാർ പുറത്തുവിട്ടു. അതിവേഗറയിൽ പദ്ധതിയായ സിൽവർലൈൻ കടന്ന് പോകുന്ന പ്രദേശങ്ങളിലുള്ളവർക്കുള്ള നഷ്ടപരിഹാരം അടക്കമുള്ള വിവരങ്ങളാണ് കേരള സർക്കാർ പുറത്തുവിട്ടത്.
സിൽവർ ലൈൻ പദ്ധതിക്ക് 13,265 കോടി രൂപയുടെ നഷ്ടപരിഹാര പാക്കേജ് സർക്കാർ പ്രഖ്യാപിച്ചു. 1730 കോടി രൂപ പുനരധിവാസത്തിന് നൽകും. 4460 കോടി രൂപ വീടുകൾക്കായി മാറ്റിവെക്കും. പദ്ധതി സംബന്ധിച്ച ആശങ്കകൾ പരിഹരിക്കുന്നതിൻ്റെ ഭാഗമായി ചേർന്ന അവലോകന യോഗത്തിൽ മുഖ്യമന്ത്രി പിണറായി വിജയനാണ് പാക്കേജ് പ്രഖ്യാപിച്ചത്. വീട് നഷ്ടപ്പെടുകയോ ഭൂമി നഷ്ടപ്പെടുകയോ ചെയ്താൽ അതിദാരിദ്രരായ ആളുകൾക്കടക്കമുള്ളവർക്ക് എത്ര രൂപ നഷ്ടപരിഹാരമായി നൽകുമെന്ന് വ്യക്തമാക്കുന്നതാണ് സർക്കാർ പുറത്തിറക്കിയ പുനരധിവാസ പാക്കേജ്.
