തിരുവനന്തപുരം: ആലപ്പുഴ ഇരട്ടക്കൊലപാതകത്തിൻ്റെ പശ്ചാത്തലത്തിൽ കേരളത്തിലെ 140 സ്ഥലങ്ങളിൽ വരും ദിവസങ്ങളിൽ പ്രക്ഷോഭ പരിപാടികൾക്ക് ഒരു വിഭാഗം സംഘടനകൾ തയാറെടുക്കുന്നതായി . റിപ്പോർട്ടിൻ്റെ അടിസ്ഥാനത്തിൽ ജില്ലാ പോലീസ് മേധാവിമാർക്ക് നിർദേശം നൽകി. ഏതൊക്കെ സംഘടനകളാണ് പ്രതിഷേധിക്കാൻ സാധ്യതയുള്ളതെന്ന വിവരം ഇൻ്റലിജൻസിന് ലഭ്യമായെങ്കിലും ഇതുമായി ബന്ധപ്പെട്ട വിവരം പുറത്തുവിട്ടിട്ടില്ല.
ബുധൻ, വ്യാഴം ദിവസങ്ങളിലാണ് സംസ്ഥാനത്ത് പ്രക്ഷോഭ പരിപാടികൾ നടക്കുകയെന്നാണ് റിപ്പോർട്ട്. പ്രക്ഷോഭ പരിപാടികൾ സംഘർഷത്തിലേക്ക് എത്താൻ സാധ്യതയുള്ളതിനാൽ ജാഗ്രത ശക്തമാക്കണമെന്നാണ് ജില്ലാ പോലീസ് മേധാവിമാർക്ക് നൽകിയിരിക്കുന്ന നിർദേശം. സംസ്ഥാനത്ത് എല്ലായിടത്തും ശ്രദ്ധ വേണമെന്നും തിരുവനന്തപുരത്ത് മാത്രം 21 ഇടങ്ങളിൽ പ്രക്ഷോഭ സാധ്യതയുണ്ടെന്നും രഹസ്യാന്വേഷണ വിഭാഗത്തിൻ്റെ മുന്നറിയിപുണ്ട്.
ഒരു വിഭാഗം ആളുകൾ കൂടുതലായി താമസിക്കുന്ന പ്രദേശങ്ങൾ കേന്ദ്രീകരിച്ച് പ്രക്ഷോഭം നടന്നാൽ സാഹചര്യം കൈവിട്ട് പോയേക്കാമെന്ന ആശങ്ക പോലീസിനുണ്ട്. ഇതോടെയാണ് സംസ്ഥാനത്താകെ കർശന നിരീക്ഷണം ഏർപ്പെടുത്താൻ നിർദേശം നൽകിയിരിക്കുന്നത്. പ്രതിഷേധവുമായി രംഗത്തുവരാൻ സാധ്യതയുള്ള സംഘടനകളുടെ വിവരങ്ങൾ ഇൻ്റലിജൻസിന് ലഭ്യമായിട്ടുണ്ട്.
