കൊല്ലത്ത് ഏഴുവയസുകാരന്റെ മുന്നിലിട്ട് ഭർത്താവ് ഭാര്യയെ വെട്ടിക്കൊന്നു

കടയ്ക്കൽ: കടയ്ക്കലിൽ ഭാര്യയെ ഭർത്താവ് വെട്ടി കൊന്നു. ഏഴ് വയസ് പ്രായമുള്ള മകന്റെ മുന്നിൽ വെച്ചാണ് ഭർത്താവ് ക്രൂരകൃത്യം നടത്തിയത്. കോട്ടപ്പുറം ലതാമന്ദിരത്തിൽ ജിൻസിയാണ് കൊല്ലപ്പെട്ടത്. പ്രതി ദീപുവിനെ പോലീസ് കസ്റ്റഡിയിലെടുത്തു. ശനിയാഴ്ച വൈകിട്ട് അഞ്ച് മണിയോടെയാണ് പ്രതി കൃത്യം നടത്തിയത്.

കുടുംബ കലഹത്തെത്തുടർന്ന് കഴിഞ്ഞ ഒരു മാസമായി ജിൻസിയും ദീപുവും പിരിഞ്ഞു താമസിക്കുകയായിരുന്നുവെന്നാണ് മാതൃഭൂമി ഡോട്ട് കോം റിപ്പോർട്ട് ചെയ്തിരിക്കുന്നത്. ജിൻസി സ്വന്തം വീട്ടിലും ദീപു ദീപുവിന്റെ വീട്ടിലുമാണ് താമസിച്ചിരുന്നത്. വൈകിട്ടോടെ ജീൻസിയുടെ വീട്ടിലെത്തിയ പ്രതി ജിൻസിയുടെ തലയിൽ വെട്ടുകയായിരുന്നു. അമ്മയെ ആക്രമിക്കുന്നത് തടയാൻ ശ്രമിച്ച മകനേയും ദീപും ആക്രമിച്ചു.

പ്രതിയിൽ നിന്നും രക്ഷപെട്ട മകൻ പ്രദേശത്തെ കടയിലെത്തി നാട്ടുകാരെ വിവരം അറിയിച്ചു. നാട്ടുകാർ എത്തിയപ്പോഴേക്കും 25 ൽ അധികം വെട്ടുകൾ ജിൻസിയുടെ ശരീരത്തിലേറ്റിരുന്നു. ജിൻസിയുടെ വീട് ഉൾപ്രദേശത്ത് ആയതിനാൽ ആശുപത്രിയിൽ എത്തിക്കുന്നത് വൈകി. താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ആക്രമണത്തിനു ശേഷം പോലീസ് സ്റ്റേഷനിലെത്തിയ ദീപു കീഴടങ്ങി. പാരിപ്പള്ളിയിലെ കശുവണ്ടി ഫാക്ടറിയിൽ സൂപ്പർവൈസറായി ജോലി ചെയ്യുകയായിരുന്നു ജിൻസി. കുടുംബ പ്രശ്നമാകാം ആക്രമണത്തിലേക്ക് നയിച്ചതെന്ന് പോലീസ് പറഞ്ഞു. ദമ്പതികൾക്ക് രണ്ട് മക്കളുണ്ട്. ഒരാൾ ജിൻസിക്കൊപ്പവും മറ്റൊരാൾ ദീപുവിന്റെ കുടുംബത്തിനൊപ്പവുമാണ് കഴിഞ്ഞിരുന്നത്.