സംസ്ഥാനത്തെ പ്രധാന നഗര കേന്ദ്രങ്ങളിലൊന്നും ഇത്തവണ പുതുവർഷം ആഘോഷിക്കാൻ ആൾക്കൂട്ടം ഉണ്ടായിരുന്നില്ല. പത്ത് മണിയോടെ തന്നെ തിരുവനന്തപുരം, കൊച്ചി, കോഴിക്കോട് എന്നിവിടങ്ങളിലെയെല്ലാം ആഘോഷങ്ങൾക്ക് തിരശ്ശീല വീണു. രാജ്യ തലസ്ഥാനമായ ഡൽഹി, മുംബൈ, ബെംഗളൂരു തുടങ്ങിയ നഗരങ്ങളെല്ലാം കടുത്ത നിയന്ത്രണങ്ങൾക്കിടെ തന്നെയാണ് 2022ലേക്ക് കടന്നത്.
Also Read :
കോഴിക്കോട് രാത്രി 9.30 വരെ മാത്രമായിരുന്നു ആഘോഷങ്ങൾക്ക് അനുമതിയുണ്ടായിരുന്നത്. ഒൻപത് കഴിഞ്ഞപ്പോൾ തന്നെ നിയന്ത്രണങ്ങൾ നടപ്പിലാക്കാൻ തുടങ്ങിയിരുന്നു. പുതുവർഷത്തെ ഏറെ ആവേശത്തോടെ സ്വീകരിക്കാറുള്ള കൊച്ചിയിൽ ഇത്തവണ പഴയ ആരവങ്ങളൊന്നും ഉണ്ടായില്ല. നിയന്ത്രണങ്ങള്‍ ഏര്‍പ്പെടുത്തിയതോടെ കാര്‍ണിവലും പാപ്പാഞ്ഞിയെ കത്തിക്കലും ഇല്ലാതെയാണ് കൊച്ചിക്കാർ 2022നെ സ്വാഗതം ചെയ്തത്. തിരുവനന്തപുരത്ത് കോവളം ബീച്ചിലെ ആഘോഷങ്ങൾ എട്ടരയോടെ തന്നെ അവസാനിച്ചിരുന്നു.
ലോകരാജ്യങ്ങളിലും രാജ്യത്തിന് സമാനമായ നിയന്ത്രണങ്ങൾക്കിടെ തന്നെയാണ് പുതുവർഷത്തെ സ്വാഗതം ചെയ്തത്. ഭൂരിഭാഗം രാജ്യങ്ങളിലും ഒമിക്രോൺ ഭീതി നിലനിൽക്കുന്നുമുണ്ട്. പസഫിക് സമുദ്രത്തിലെ സമോവ, ടോംഗ, കിരിബാത്തി ദ്വീപുകളിലാണ് 2022 ആദ്യം പിറന്നത്. ദ്വീപുകൾക്ക് പിന്നാലെ ന്യൂസിലൻഡും 2022ലേക്ക് കടന്നു.
Also Read :
ന്യൂസിലൻഡിലെ ഓക്‌ലന്‍ഡിലാണ് പുതുവർഷം ആദ്യം എത്തിയത്. കരിമരുന്ന് പ്രകടനത്തോടെയാണ് ന്യൂസിലൻഡ് പുതുവർഷത്തെ വരവേറ്റത്. പിന്നാലെ ഓസ്ട്രേലിയയിലേക്കും പുതുവർഷം എത്തി. ജപ്പാൻ, ദക്ഷിണ കൊറിയ, ചൈന, ഇന്ത്യ എന്നീ രാജ്യങ്ങളാണ് പിന്നാലെ പുതുവർഷത്തിലേക്ക് കടന്നത്.
