‘കൊച്ചി: മുംബൈ പൊലീസിന് ശേഷം വീണ്ടുമൊരു ഇൻവെസ്റ്റിഗേഷൻ ത്രില്ലറുമായി റോഷൻ ആൻഡ്രൂസ്- ബോബി-സഞ്ജയ് ടീം, പാൻ ഇന്ത്യൻ സൂപ്പർ സ്റ്റാർ ദുൽഖർ സൽമാൻ നായകനാകുന്ന സല്യൂട്ട് എത്തുന്നു..!
പൃഥ്വിരാജ് സുകുമാരനെ നായകനാക്കി ഒരുക്കിയ ത്രില്ലർ ‘മുംബൈ പോലീസ് ‘ റോഷൻ ആൻഡ്രൂസ് എന്ന സംവിധായകന്റെയും, ബോബി- സഞ്ജയ് എന്ന രചയിതാക്കളുടേയും കരിയറിലെ ഏറ്റവും മികച്ച ചിത്രങ്ങളിൽ ഒന്നായിരുന്നു. വലിയ പ്രേക്ഷക പ്രശംസയും നിരൂപക ശ്രദ്ധയും നേടിയിരുന്നു. ഇതേ ടീം വീണ്ടുമൊരു പോലീസ് ഇൻവെസ്റ്റിഗേഷൻ ത്രില്ലറുമായി പ്രേക്ഷകരുടെ മുൻപിലേക്ക് എത്തുകയാണ്.
ദുൽഖർ സൽമാൻ തന്നെ നിർമ്മിച്ചിരിക്കുന്ന ചിത്രം ജനുവരി പതിനാലിന് ആഗോള റിലീസ് ആയിട്ടാണ് എത്തുന്നത്. അരവിന്ദ് കരുണാകരൻ എന്ന് പേരുള്ള ഒരു പോലീസ് ഓഫീസർ ആയാണ് ദുൽഖർ അഭിനയിച്ചിരിക്കുന്നത്. ബോളിവുഡ് താരം ഡയാന പെന്റി നായികാ വേഷം ചെയ്തിരിക്കുന്ന ഈ ചിത്രത്തിൽ മനോജ് കെ ജയനും ഒരു നിർണ്ണായക വേഷം ചെയ്തിട്ടുണ്ട്. സാനിയ ഇയ്യപ്പൻ, ലക്ഷ്മി ഗോപാലസ്വാമി, സായി കുമാർ, വിജയ കുമാർ, ഗണപതി, ബിനു പപ്പു, അലെൻസിയർ, ബോബൻ ആലുമ്മൂടൻ, ഇർഷാദ്, ദീപക് എന്നിവരും കഥാപാത്രങ്ങളാകുന്നു.
ജേക്സ് ബിജോയ് സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിന് കാമറ ചലിപ്പിച്ചത് അസ്ലം പുരയില്, എഡിറ്റിംഗ് ശ്രീകര് പ്രസാദുമാണ്. വേഫറെർ ഫിലിംസിന്റെ ബാനറിൽ ദുൽഖർ സൽമാൻ നിർമ്മിക്കുന്ന അഞ്ചാമത്തെ ചിത്രമാണ് സല്യൂട്ട്. ഇതിനു തൊട്ടു മുൻപ് റിലീസ് ചെയ്തു സൂപ്പർ വിജയം നേടിയ കുറുപ്പ് നിർമ്മിച്ചതും ദുൽഖർ സൽമാൻ തന്നെയാണ്. കായംകുളം കൊച്ചുണ്ണി എന്ന മെഗാ ഹിറ്റിനു ശേഷം റോഷൻ ആൻഡ്രൂസ്- ബോബി- സഞ്ജയ് ടീം ഒന്നിക്കുന്ന ചിത്രം കൂടിയാണ് സല്യൂട്ട്.
