അതേസമയം തന്നെ അപമാനിച്ച് പുറത്താക്കുകയാണ് സിപിഎം ചെയ്തതെന്ന് എസ് രാജേന്ദ്രൻ പറഞ്ഞു. പാർട്ടിയുമായുള്ള എല്ലാ ബന്ധവും ഉപേക്ഷിക്കുകയാണ്. വിശദീകരണം ആവശ്യപ്പെട്ടിട്ട് നൽകിയില്ലെന്ന ആരോപണം തെറ്റാണ്. ആരോപണങ്ങൾക്ക് മറുപടിയായി താൻ നൽകിയ വിശദീകരണം അംഗീകരിച്ച് പാർട്ടി അംഗത്വത്തിൽ നിലനിർത്താമായിരുന്നുവെന്ന് അദ്ദേഹം പറഞ്ഞു.
പാർട്ടിക്ക് മറുപടി കത്ത് നൽകിയതിൻ്റെ അക്നോളജ്മെൻ്റ് രേഖ തൻ്റെ കൈവശമുണ്ട്. രജിസ്റ്റേർഡ് പോസ്റ്റ് ആയി ജില്ല കമ്മിറ്റിക്കാണ് അയച്ചത്. നിലവിലെ ദേവികുളം എംഎൽഎ രാജയെ നിയമസഭാ തെരഞ്ഞെടുപ്പിൽ പരാജയപ്പെടുത്താൻ ഗൂഢാലോചന നടത്തിയെന്ന കണ്ടെത്തൽ അടിസ്ഥാനരഹിതമാണ്. ചായക്കടയിൽ വെച്ച് താൻ ഗൂഢാലോചന നടത്തിയെന്നാണ് ആരോപണം. ചായക്കട എന്താ സ്വന്തമായി എടുത്തിരിക്കുകയാണോ എന്നും രാജേന്ദ്രൻ ചോദിച്ചു.
പാർട്ടിയിൽ ചിലർ തനിക്കെതിരെ പ്രവർത്തിക്കുന്നുണ്ട്. ഇക്കാര്യം ചൂണ്ടിക്കാട്ടി ജില്ലാ നേതൃത്വത്തിന് കത്ത് നൽകിയിരുന്നുവെങ്കിലും ഇതുവരെ നടപടിയുണ്ടായില്ല. മെമ്പർഷിപ്പ് നൽകുന്നതും ഒഴിവാക്കുന്നതുമെല്ലാം പാർട്ടിയുടെ അവകാശമാണ്. ഇക്കാലമത്രയും ആത്മാര്‍ത്ഥമായാണ് പാർട്ടിയിൽ പ്രവർത്തിച്ചതെന്നും എസ് രാജേന്ദ്രൻ പറഞ്ഞു.
ദേവികുളം നിയമസഭാ തെരഞ്ഞെടുപ്പ് വീഴ്ചയുമായി ബന്ധപ്പെട്ട് എസ് രാജേന്ദ്രനെ പാര്‍ട്ടിയിൽ നിന്നു പുറത്താക്കാൻ ജില്ലാ കമ്മിറ്റി കഴിഞ്ഞ ദിവസം ശുപാര്‍ശ ചെയ്തിരുന്നു. പാര്‍ട്ടി നിയോഗിച്ച കമ്മീഷൻ്റെ അന്വേഷണത്തിൽ അദ്ദേഹം കുറ്റക്കാരനാണെന്നു കണ്ടെത്തിയതിനെ തുടര്‍ന്നാണ് നടപടി. ഒന്നോ രണ്ടോ നേതാക്കന്മാരുടെ അടിമയായി ജീവിക്കാന്‍പറ്റില്ലെന്നായിരുന്നു എസ് രാജേന്ദ്രൻ്റെ നിലപാട്.
അടിമാലി, മറയൂര്‍, മൂന്നാര്‍ ഏരിയാ കമ്മിറ്റി അംഗങ്ങള്‍ അടക്കമുള്ളവര്‍ എസ് രാജേന്ദ്രനെതിരെ പരാതി നല്‍കിയിരുന്നു. ദേവികുളത്തെ എൽഡിഎഫ് സ്ഥാനാര്‍ഥിയായി അഡ്വ എ രാജയെ തെരഞ്ഞെടുത്തതിനു പിന്നാലെ എസ് രാജേന്ദ്രൻ ഇദ്ദേഹത്തെ പരാജയപ്പെടുത്താനായി പ്രവര്‍ത്തനങ്ങള്‍ നടത്തി എന്നാണ് ആരോപണം. സ്വകാര്യ യോഗങ്ങള്‍ ചേര്‍ന്ന എസ് രാജേന്ദ്രൻ എ രാജയെ തോൽപ്പിക്കാൻ ചിലരോട് ആവശ്യപ്പെട്ടെന്നാണ് ആരോപണം. തുട‍ര്‍ന്ന് ആരോപണങ്ങള്‍ അന്വേഷിക്കാൻ പാര്‍ട്ടി രണ്ടംഗ അന്വേഷണ കമ്മീഷനെ നിയമിക്കുകയായിരുന്നു.
