ശക്തനായി വന്ന് നേമത്ത് ശക്തമായി തോറ്റതിൻ്റെ വിഷമമാണ് മുരളീധരന്. മേയർ ആര്യാ രാജേന്ദ്രന് അംഗീകാരം ലഭിക്കുന്നതിൻ്റെ അസൂയയാണ് മുരളീധരനെന്നും മന്ത്രി വി ശിവൻകുട്ടി പറഞ്ഞു.
കഴിഞ്ഞ ആഴ്ച തിരുവനന്തപുരത്ത് എത്തിയ രാഷ്ട്രപതി രാംനാഥ് കോവിന്ദിൻ്റെ വാഹനവ്യൂഹത്തിലേക്ക് മേയറുടെ കാർ കടന്ന സംഭവത്തിൻ്റെ പശ്ചാത്തലത്തിലാണ് മുരളീധരൻ വിവാദ പ്രസ്താവന നടത്തിയത്.
“തിരുവനന്തപുരത്തെ ഒരു മേയറുണ്ട്. അതിനെ വിമർശിച്ചതിനാണ് എന്‍റെ പേരിൽ കേസ് വന്നത്. പക്ഷേ, ഇപ്പോ ഒരു കാര്യം മനസ്സിലായി, അതിന് വിവരമില്ലാന്ന് മനസിലായി.. ആരെങ്കിലും ചെയ്യുമോ.. രാഷ്ട്രപതിയുടെ വാഹനവ്യൂഹത്തിലേക്ക് ഇടിച്ചുകയറ്റുകയാണ് ഹോണടിച്ചിട്ട്. രാഷ്ട്രപതിയുടേയോ പ്രധാനമന്ത്രിയുടെയോ വാഹനവ്യൂഹത്തിലേക്ക് അതിക്രമിച്ചു കയറിയാൽ സ്പോട്ടിൽ വെടിവയ്ക്കുക എന്നതാണ് നയം. കീ… ന്ന് പറഞ്ഞ് ഹോണടിച്ച് അങ്ങ് കേറ്റുകയാണ്. അതിന് പിന്നെ ഠേ എന്നു പറഞ്ഞ് വെടിവച്ചാവും മറുപടി. ഇതൊക്കെ ഒന്ന് പറഞ്ഞു കൊടുക്കത്തക്കവണ്ണം ബുദ്ധിയുള്ള ഒരുത്തനും സിപിഎമ്മിൽ ഇല്ലേ ?” – എന്നായിരുന്നു കെ മുരളീധരൻ്റെ പരാമർശം.
തിരുവനന്തപുരം മേയർ ആര്യാ രാജേന്ദ്രൻ്റെ ഔദ്യോഗിക വാഹനം രാഷ്ട്രപതിയുടെ വാഹനവ്യൂഹത്തിലേക്ക് കയറിയതാണ് സുരക്ഷാ വീഴ്ചയ്ക്കിടെയാക്കിയത്. വിമാനത്താവളത്തിൽ നിന്ന് പൂജപ്പുരയിലേക്കുള്ള യാത്രയ്ക്കിടെയാണ് മേയറുടെ ഔദ്യോഗിക വാഹനവ്യൂഹം രാഷ്ട്രപതിയുടെ വാഹനവ്യൂഹത്തിലേക്ക് കയറിയത്. ഇത് പിഴവാണെന്നാണ് രഹസ്യാന്വേഷണ വിഭാഗങ്ങൾ കരുതുന്നത്.
രാഷ്ട്രപതിക്കൊപ്പം പൂജപ്പുരയിലെ ചടങ്ങിൽ പങ്കെടുക്കേണ്ടതിനാൽ മേയറുടെ വാഹനവും വിവിഐപി വാഹന വ്യൂഹത്തിലേക്ക് കയറാൻ ശ്രമിച്ചതാണ് സുരക്ഷ വീഴ്ചയ്ക്ക് കാരണമായത്. വിമാനത്താവളത്തിൽ നിന്ന് ജനറൽ ആശുപത്രിവരെയുള്ള ഭാഗംവരെ വിവിഐപി വാഹനവ്യൂഹത്തിനൊപ്പമാണ് മേയറുടെ വാഹനം സഞ്ചരിച്ചത്. പിന്നീട് രാഷ്ട്രപതിയുടെ വാഹനവ്യൂഹത്തിലേക്ക് മേയറുടെ വാഹനം കയറുകയുമായിരുന്നു. 14 വാഹനങ്ങളാണ് രാഷ്ട്രപതിയുടെ വാഹനവ്യൂഹത്തിൽ ഉണ്ടായിരുന്നത്. ഇതിലൊന്നിലാണ് മുഖ്യമന്ത്രി പിണറായി വിജയനടക്കം ഉണ്ടായിരുന്നത്. ഈ വാഹനവ്യൂഹത്തില്‍ എട്ടാമത്തെ വാഹനത്തിന്‍റെ പുറകിലായാണ് മേയറുടെ വാഹനം കയറിയത്.
