പിണറായിക്ക് പിടിയോട് വാത്സല്യമുണ്ടായിരുന്നു; വിലകൂടിയ മരുന്നുകൾ എത്തിക്കാൻ എല്ലാവരും ഇടപെട്ടു: ഉമ തോമസ്

കൊച്ചി: രാഷ്ട്രീയത്തിനപ്പുറത്ത് മുഖ്യമന്ത്രി പിണറായി വിജയന് പി ടിയോട് വാത്സല്യമുണ്ടായിരുന്നെന്ന് പിടി തോമസിന്‍റെ ഭാര്യ ഉമ തോമസ്. വിലകൂടിയ മരുന്നുകൾ എത്തിക്കാൻ എല്ലാവരും സഹായിച്ചിരുന്നെന്നും അവർ മാതൃഭൂമി ന്യൂസിന് അനുവദിച്ച അഭിമുഖത്തിൽ പറഞ്ഞു. തൃക്കാക്കര ഉപതെരഞ്ഞെടുപ്പുമായി ബന്ധപ്പെട്ട ചോദ്യങ്ങളോടും പ്രതികരിച്ചു.

രാഷ്ട്രീയത്തിനപ്പുറത്ത് മുഖ്യമന്ത്രി പിണറായി വിജയന് പി ടിയോട് വാത്സല്യമുണ്ടായിരുന്നു. വ്യക്തികളോട് ഒരിക്കലും പി ടിയ്ക്ക് വൈരാഗ്യമുണ്ടായിരുന്നില്ലെന്നും ഉമ അഭിമുഖത്തിൽ പറഞ്ഞു. അസുഖ സമയത്ത് വിലകൂടിയ മരുന്നുകൾ എത്തിക്കാൻ എല്ലാവരും ഇടപെടുകയും വിളിച്ച് അന്വേഷണം നടത്തുകയും ചെയ്തിരുന്നു. ശ്രീരാമകൃഷ്ണൻ, രമേശ് ചെന്നിത്തല, കെ സി ജോസഫ് തുടങ്ങിയവരൊക്കെ വളരെ ഏറെ സഹായിച്ചു. എല്ലാരും ഒന്നിച്ച് നിന്നാണ് സഹായം ചെയ്ത് തന്നതെന്നും ഉമ വ്യക്തമാക്കി.

Also Read :
തൃക്കാക്കര ഉപതെരഞ്ഞെടുപ്പിൽ മത്സരിക്കുമോയെന്ന ചോദ്യത്തിന് അതിനെക്കുറിച്ച് താൻ നിലവിൽ ചിന്തിച്ചിട്ടില്ലെന്നാണ് ഉമ തോമസ് മറുപടി നൽകിയത്. പി ടിക്ക് ശേഷം ഒരു തെരഞ്ഞെടുപ്പ് എന്ന കാര്യം ആലോചിക്കാൻ പോലും തോന്നുന്നില്ല. അതിലേക്ക് താൻ എത്തിയിട്ടില്ലെന്നും അവർ കൂട്ടിച്ചേർത്തു.

മണ്ഡല രൂപീകരണത്തിന് ശേഷം നടന്ന മൂന്ന് തെരഞ്ഞെടുപ്പുകളിലും കോൺഗ്രസിനെ മാത്രം വിജയിപ്പിച്ച മണ്ഡലമാണ് തൃക്കാക്കര. 2011ൽ ആദ്യം നടന്ന തെരഞ്ഞെടുപ്പിൽ കോൺഗ്രസ് നേതാവ് ബെന്നി ബഹനാനെ 22,046 വോട്ടുകളുടെ ഭൂരിപക്ഷം നൽകിയായിരുന്നു തൃക്കാക്കര നിയമസഭയിലേക്ക് അയച്ചത്. പിന്നീട് 2016ലും 2021ലും പി ടി തോമസിനെയും മണ്ഡലം തെരഞ്ഞെടുത്തു. 2016ൽ 11,966 വോട്ടുകളുടെയും 2021ൽ 14,329 വോട്ടുകളുടെയും ഭൂരിപക്ഷമാണ് മണ്ഡലത്തിൽ നിന്ന് പി ടി തോമസിന് ലഭിച്ചത്.

Also Read :
പി ടിയുടെ മരത്തിന് പിന്നാലെ അടുത്ത സ്ഥാനാർഥിയാരാകുമെന്ന ചർച്ചകൾ ആരംഭിച്ചിട്ടുണ്ട്. എന്നാൽ പാർട്ടി ഇത്തരം ആലോചനകളിലേക്ക് കടന്നിട്ടില്ലെന്നാണ് റിപ്പോർട്ടുകൾ.