കാസർകോട് > സംസ്ഥാനത്ത് എസ്എസ്എൽസി, പ്ലസ്ടു, വിഎച്ച്എസ്ഇ പരീക്ഷാ തീയതികൾ മന്ത്രി വി ശിവൻകുട്ടി വാർത്താ സമ്മേളനത്തിൽ പ്രഖ്യാപിച്ചു. എസ്എസ്എൽസി പരീക്ഷ മാർച്ച് 31ന് തുടങ്ങി ഏപ്രിൽ 29ന് അവസാനിക്കും. പ്ലസ് ടു, വിഎച്ച്എസ്ഇ പരീക്ഷകൾ മാർച്ച് 30ന് തുടങ്ങി ഏപ്രിൽ 22 ന് അവസാനിക്കും. എസ്എസ്എൽസി മോഡൽ പരീക്ഷ മാർച്ച് 21ന് തുടങ്ങി 25ന് അവസാനിക്കും. പ്ലസ് ടു, വിഎച്ച്എസ്ഇ മോഡൽ പരീക്ഷകൾ മാർച്ച് 16ന് തുടങ്ങി 21ന് അവസാനിക്കും. എസ്എസ്എൽസി പ്രാക്ടിക്കൽ പരീക്ഷ മാർച്ച് 10ന് തുടങ്ങി 19ന് അവസാനിക്കും. പ്ലസ് ടു പ്രാക്ടിക്കൽ പരീക്ഷ ഫെബ്രുവരി 21 ന് തുടങ്ങി മാർച്ച് 15ന് അവസാനിക്കും. വിഎച്ച്എസ്ഇ പ്രാക്ടിക്കൽ പരീക്ഷ ഫെബ്രുവരി 15ന് തുടങ്ങി മാർച്ച് 15ന് അവസാനിക്കും.
നിലവിലെ സ്കൂൾ സമയം മാറ്റില്ല. സംസ്ഥാനത്ത് പൊതുവിദ്യാലയങ്ങളില് കൂടുതല് കുട്ടികളെത്തി. ഒമ്പത് ലക്ഷത്തോളം കുട്ടികള് പതുതായി അഡ്മിഷനെടുത്തു. ബോയ്സ്, ഗേൾസ് സ്കൂളുകൾ കുറയ്ക്കും. പിടിഎ തീരുമാനിച്ചാൽ മിക്സഡ് സ്കൂളിന് അംഗീകാരം നൽകും. ജൻഡർ ന്യൂട്രൽ യൂണിഫോമിനും സ്കൂൾ പിടിഎയുടെ തീരുമാനം മതി. കുട്ടികൾ ഒന്നിച്ചിരുന്ന് പഠിക്കുന്നതിനെ പ്രോത്സാഹിപ്പിക്കുമെന്നും മന്ത്രി പറഞ്ഞു.
