തിരുവനന്തപുരത്ത് ട്രാന്‍സ്‌ജെന്‍ഡേഴ്‌സിന് മര്‍ദനം; മരക്കഷ്ണം കൊണ്ട് തല അടിച്ചുപൊട്ടിച്ചു

പരിക്കേറ്റ ആൽബിൻ
|Photo: Special arrangement

തിരുവനന്തപുരം: ശ്രീകാര്യത്ത് ട്രാൻസ്ജെൻഡർ സഹോദരന്മാർക്ക് മർദനം. ചെറുവയ്ക്കൽ ശാസ്താംകോണത്ത് വാടകയ്ക്ക് താമസിക്കുന്ന ലൈജുവിനും സഹോദരന്മാർക്കുമാണ് സമീപവാസികളുടെ മർദനമേറ്റത്. മർദനത്തിൽ ട്രാൻസ്മെനായ ഇടുക്കി സ്വദേശി ആൽബിന്റെ തലയ്ക്ക് ഗുരുതരമായി പരിക്കേറ്റു. 24-ാം തീയതിയാണ് സംഭവം.

ലൈജുവും ആൽബിനും ആൽബിന്റെ സഹോദരനും ഒരുമിച്ചാണ് വാടകയ്ക്ക് താമസിക്കുന്നത്. രാത്രി പുറത്തേക്കിറങ്ങിയ ഇവരെ സമീപവാസികൾ ചോദ്യം ചെയ്യുകയും വാഗ്വാദമുണ്ടാവുകയും ചെയ്തു. ഇതിനു പിന്നാലെയാണ് അഞ്ചംഗസംഘം ഇവരെ മർദിച്ചത്. അക്രമികൾ തടികൊണ്ട് അടിച്ചതിനാൽ ആൽബിന്റെ തലയ്ക്ക് ഗുരുതര പരിക്കുണ്ട്. ആൽബിനെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

അഞ്ചംഗ അക്രമിസംഘം മദ്യലഹരിയിൽ ആയിരുന്നെന്നാണ് വിവരം. ശ്രീകാര്യം പോലീസിൽ പരാതി നൽകിയെങ്കിലും നടപടിയുണ്ടായില്ലെന്നാണ് മർദനമേറ്റവർ പറയുന്നത്. തുടർന്ന് ഇവർ പോലീസ് സ്റ്റേഷനിലെത്തി സംസാരിച്ചതിന് പിന്നാലെയാണ് വധശ്രമത്തിന് കേസ് എടുത്തതെന്ന് പരിക്കേറ്റവർ പറഞ്ഞു. അക്രമിസംഘത്തിലെ അഞ്ചുപേരിൽ രണ്ടുപേർ അറസ്റ്റിലായിട്ടുണ്ട്. ചെറുവയ്ക്കൽ ശാസ്താംകോണം സ്വദേശികളായ അനിൽ കുമാർ, രാജീവ് എന്നിവരെയാണ് പോലീസ് അറസ്റ്റ് ചെയ്തത്.

അക്രമസംഘത്തിൽപ്പെട്ടവർ ലൈജുവിന്റെയും ആൽബിന്റെയും സമീപവാസികളാണ്. ഇവർ മുൻപും ആൽബിനെയും ലൈജുവിനെയും ശല്യംചെയ്യുകയും പുറത്തിറങ്ങുമ്പോഴും മറ്റും മോശമായി സംസാരിക്കുകയും ചെയ്യാറുണ്ടായിരുന്നു. 24-ാം തീയതിയും ഇത്തരത്തിൽ ഇവരോട് മോശമായി പെരുമാറി. ഇത് ചോദ്യം ചെയ്തതിന് പിന്നാലെയാണ് ആക്രമണമുണ്ടായത്.

content highlights:transgendersattacked in thiruvananthapuram