ക്രിസ്മസ് കരോളിനോട് അനുബന്ധിച്ച് നടന്ന തര്‍ക്കമാണ് സംഘര്‍ഷത്തിൽ കലാശിച്ചതെന്നാണ് റഏഷ്യാനെറ്റ് ന്യൂസ് റിപ്പോര്‍ട്ട്. ആക്രമണത്തിൽ അഞ്ച് പോലീസുകാര്‍ക്കും പരിക്കേറ്റു. കുന്നത്തുനാട് സിഐ വിടി ഷാജൻ്റെ തലയ്ക്കും കൈയ്ക്കും പരിക്കേറ്റിട്ടുണ്ട്. കിറ്റക്സ് ഗാര്‍മൻ്റ്സിലെ തൊഴിലാളികളാണ് അക്രമസംഭവങ്ങള്‍ക്ക് പിന്നിൽ എന്നാണ് ഏഷ്യാനെറ്റ് ന്യൂസ് റിപ്പോര്‍ട്ടിൽ പറയുന്നത്.
Also Read:
സംഭവവുമായി ബന്ധപ്പെട്ട് 150ഓളം തൊഴിലാളികളെ പോലീസ് കസ്റ്റഡിയിലെടുത്തിട്ടുണ്ട്. സ്ഥലത്ത് വൻ പോലീസ് സംഘവും തമ്പടിച്ചിട്ടുണ്ട്. സ്ഥലത്ത് തൊഴിലാളികള്‍ തമ്മിൽ സംഘര്‍ഷമുണ്ടായെന്നും ഇവര്‍മദ്യലഹരിയിലായിരുന്നു എന്നും എറണാകുളം റൂറൽ എസ്പി കെ കാര്‍ത്തിക് സ്ഥിരീകരിച്ചു. ഉദ്യോഗസ്ഥര്‍ കോലഞ്ചേരി മെഡിക്കൽ കോളേജ് ആശുപത്രിയിൽ ചികിത്സയിലാണെന്നും ഇവരുടെ നില തൃപ്തികരമാണെന്നും അദ്ദേഹം വാര്‍ത്താ ചാനലിനോടു പറഞ്ഞു. ഇപ്പോള്‍സ്ഥിതി നിയന്ത്രണവിധേയമായിട്ടുണ്ട്. കുറച്ചു പേരെ അറസ്റ്റ് ചെയ്തിട്ടുണ്ടെന്നും അന്വേഷണം പുരോഗമിക്കുകയാണെന്നും അദ്ദേഹം കൂട്ടിച്ചേര്‍ത്തു.
ഇന്നലെ അര്‍ധരാത്രിയോടു കൂടിയാണ് സംഭവം നടന്നതെന്നാണ് പ്രദേശവാസികളെ ഉദ്ധരിച്ചുള്ള ഏഷ്യാനെറ്റ് ന്യൂസ് റിപ്പോര്‍ട്ട്. മദ്യലഹരിയിലായിരുന്ന തൊഴിലാളികള്‍ പരസ്പരം ചേരിതിരിഞ്ഞ് തമ്മിൽത്തല്ലുകയായിരുന്നുവെന്നും തുടര്‍ന്ന് സ്ഥലത്തെത്തിയ പോലീസിനു മര്‍ദ്ദനമേൽക്കുകയായിരുന്നു എന്നുമാണ് നാട്ടുകാര്‍ പറയുന്നത്. ഉദ്യോഗസ്ഥർ എത്തിയ വാഹനം അക്രമികൾ തകർത്തു. തൊഴിലാളികളോടു പിരിഞ്ഞു പോകാൻ പോലീസ് ആവശ്യപ്പെട്ടെങ്കിലും കൂട്ടാക്കാത്ത തൊഴിലാളികള്‍ പോലീസിനെ കയ്യേറ്റം ചെയ്യുകയായിരുന്നു. വിവരമറിഞ്ഞ് കൂടുതൽ പോലീസ് സ്ഥലത്തെത്തിയെങ്കിലും ഇവരും ആക്രമണം നേരിട്ടു. സംഭവം അന്വേഷിക്കാനെത്തിയ കുന്നത്തുനാട് പോലീസ് സ്റ്റേഷനിലെ വാഹനമാണ് അഗ്നിക്കിരയാക്കിയതെന്നാണ് മാതൃഭൂമി റിപ്പോർട്ട്.
150ഓളം വരുന്ന അന്യസംസ്ഥാന തൊഴിലാളികളാണ് ആക്രമണം നടത്തിയതെന്നും ഇവര്‍ ലഹരിവസ്തുക്കള്‍ ഉപയോഗിച്ചിരുന്നതായും നാട്ടുകാര്‍ ആരോപിച്ചു. സ്ഥലത്ത് കല്ലേറും നടന്നു. അപ്രതീക്ഷിതമായി വന്ന ആക്രമണം നേരിടാൻ പോലീസ് സമീപത്തെ വീടുകളിൽ നിന്ന് ഹെൽമറ്റ് വാങ്ങിയ ശേഷമാണ് സ്ഥലത്തെത്തിയതെന്നും എന്നാൽ പോലീസിനെ തൊഴിലാളികളിൽ നിന്ന് രക്ഷിച്ചത് നാട്ടുകാരാണെന്നും ഒരു പ്രദേശവാസി ഏഷ്യാനെറ്റ് ന്യൂസിനോടു പറഞ്ഞു. സംഭവത്തിൻ്റെ ദൃശ്യങ്ങൾ പകർത്താൻ ശ്രമിച്ച നാട്ടുകാരെയും തൊഴിലാളികൾ ആക്രമിച്ചെന്നാണ് മാതൃഭൂമി ന്യൂസ് റിപ്പോർട്ട്. ഒടുവിൽ റൂറൽ എസ്പി കാർത്തിക്കിൻ്റെ നേതൃത്വത്തിൽ സ്ഥലത്തെത്തിയ അഞ്ഞൂറോളം പോലീസുകാരുടെ സംഘം ക്യംപിനുള്ളിൽ കയറി തൊഴിലാളികളെ ബലം പ്രയോഗിച്ച് അറസ്റ്റ് ചെയ്യുകയായിരുന്നു.
Also Read:
ആക്രമണം നടന്ന സ്ഥലത്തെ ദൃശ്യങ്ങള്‍ മാധ്യമങ്ങള്‍ പുറത്തു വിട്ടിട്ടുണ്ട്. മൊത്തം മൂന്ന് വാഹനങ്ങള്‍ തകര്‍ക്കപ്പെട്ടെന്നണ് പോലീസ് പറയുന്നത്. കല്ലേറിൽ തകര്‍ന്ന ഒരു വാഹനത്തിലാണ് സിഐ അടക്കമുള്ള ഉദ്യോഗസ്ഥരെ ആശുപത്രിയിലെത്തിച്ചത്. സംഭവസ്ഥലത്ത് ഒരു പോലീസ് വാഹനം പൂര്‍ണമായി കത്തിയ നിലയിലാണ്. മറ്റൊരു വാഹനത്തിനും സാരമായ കേടുപാടുകളുണ്ട്.
