രഞ്ജിത്തിനെ കൊലപ്പെടുത്തിയവർക്ക് രക്ഷപെടാൻ സഹായം ചെയ്തു നൽകിയത് പോലീസാണ്. എസ്ഡിപിഐ കേന്ദ്രങ്ങളിൽ പരിശോധപോലും നടത്തിയില്ല. കേസ് കേന്ദ്ര ഏജൻസിക്ക് നൽകണമെന്നും സുരേന്ദ്രൻ ആവശ്യപ്പെട്ടു.
പോപ്പുലർ ഫ്രണ്ടിനെ സർക്കാരിന് ഭയമാണ്. പോപ്പുലർ ഫ്രണ്ട് തീവ്രവാദികൾ ആയുധ പരിശീലനം നടത്തുന്ന സ്ഥലത്തെക്കുറിച്ച് അറിയാമെങ്കിലും സർക്കാർ സംരക്ഷണം നൽകുന്നവരെ പോലീസിന് ഒന്നും ചെയ്യാൻ കഴിയുന്നില്ല. പ്രതികളെക്കുറിച്ച് വ്യക്തമായ വിവരങ്ങൾ ഉണ്ടെങ്കിലും സേനയെ സർക്കാർ കൂച്ചുവിലങ്ങിട്ടിരിക്കുകയാണെന്ന് ബിജെപി സംസ്ഥാന അധ്യക്ഷൻ പറഞ്ഞു.
പ്രതികൾക്ക് അമ്പലപ്പുഴ എംഎൽഎ എച്ച് സലാമിന്റെ സഹായം കിട്ടി. ബിജെപി ഒഴികെയുള്ള പ്രസ്ഥാനങ്ങളിൽ പോപ്പുലർ ഫ്രണ്ടുകാർ നുഴഞ്ഞു കയറി. ഡിവൈഎഫ്ഐ ഏതാ പോപ്പുലർ ഫ്രണ്ട് ഏതാ എന്ന് തിരിച്ചറിയാൻ സാധിക്കുന്നില്ലെന്നും സുരേന്ദ്രൻ ആരോപിച്ചു.
കേരളാ പോലീസ് ആസ്ഥാനത്ത് പ്രവർത്തിക്കുന്നവർക്ക് പോപ്പുലർ ഫ്രണ്ടുമായി അടുപ്പമുണ്ട്. സ്ലീപ്പർ സെൽ പ്രവർത്തിക്കുന്നുവെന്നതിന്റെ ഉദ്ദാഹരണമാണിത്. നേരത്തെ സസ്പെൻഷനിലായ ഷാജഹാൻ എന്ന പോലീസ് ഉദ്യോഗസ്ഥനെ സ്ഥാനക്കയറ്റം നൽകി പോലീസ് ആദരിച്ചു. കൈ വെട്ട് കേസിലേയും അഭിമന്യു വധക്കേസിലേയും പ്രതികൾ ഒളിവിൽ കഴിഞ്ഞ സ്ഥലങ്ങൾ പോലീസിന് അറിയാമെങ്കിലും പോലീസ് ഇരുട്ടിൽ തപ്പുകയായിരുന്നുവെന്ന് സുരേന്ദ്രൻ ആരോപിച്ചു.
സ്വന്തം പാർട്ടിയിലുള്ളവരെ കൊലപ്പെടുത്തിയവർക്ക് സംരക്ഷണം നൽകിയവരാണ് സർക്കാർ. അപ്പോൾ ബിജെപിക്കാരുടെ കാര്യം പറയാനുണ്ടോയെന്നും സുരേന്ദ്രൻ ചോദിച്ചു.
