എവി ഗോപിനാഥ് കോൺഗ്രസിലേക്ക് മടങ്ങുന്നു? പാർട്ടി ചടങ്ങിൽ പങ്കെടുത്തു; പ്രതികരണം ഇങ്ങനെ

പാലക്കാട്: കോൺഗ്രസ് വിട്ടെന്ന് കാണിച്ച് നേതൃത്വത്തിന് രാജിക്കത്ത് നൽകിയ പാലക്കാട് മുൻ ഡിസിസി പ്രസിഡന്‍റ് എ വി ഗോപിനാഥ് പാർട്ടിയിലേക്ക് തന്നെ മടങ്ങിയെത്തുമെന്ന് സൂചന. കഴിഞ്ഞ ദിവസം കോൺഗ്രസ് മണ്ഡലം കമ്മിറ്റി സംഘടിപ്പിച്ച കെ കരുണാകരൻ അനുസ്മരണ ചടങ്ങിൽ അദ്ദേഹം പങ്കെടുത്തതോടെയാണ് പാർട്ടിയിലേക്ക് മടങ്ങാൻ സാധ്യതയെന്ന റിപ്പോർട്ടുകൾ പുറത്ത് വന്നത്.

കോൺഗ്രസ് പെരിങ്ങോട്ടുകുറിശ്ശി മണ്ഡലം കമ്മിറ്റി സംഘടിപ്പിച്ച കെ കരുണാകരൻ അനുസ്മരണ ചടങ്ങിലാണ് ഗോപിനാഥ് ആദ്യാവസാനം പങ്കെടുത്തത്. പരിപാടി ഉദ്ഘാടനം ചെയ്ത മുൻ എംഎൽഎ സി പി മുഹമ്മദ് ഗോപിനാഥിനെ പുകഴ്ത്തി സംസാരിക്കുകയും ചെയ്തിരുന്നു. ഗോപിനാഥിനുള്ള ജനപിന്തുണ ആർക്കും വിസ്മരിക്കാൻ കഴിയുന്നതല്ലെന്നായിരുന്നു പ്രതികരണം.

Also Read :
അതേസമയം ചടങ്ങിൽ മുഖ്യപ്രഭാഷണം നടത്തിയ അഡ്വ. ജയശങ്കർ ഗോപിനാഥിന് നൽകിയ ഉപദേശം ശ്രദ്ധേയമാവുകയും ചെയ്തു. കയ്യാലപ്പുറത്തിരിക്കാതെ ഏതെങ്കിലും ഭാഗത്തേക്ക് മറിയണമെന്നായിരുന്നു അദ്ദേഹത്തിന്‍റെ വാക്കുകൾ.

ഗോപിനാഥിനെ തന്നെ മുൻ നിർത്തി അനുസ്മരണ പരിപാടി സംഘടിപ്പിച്ചതോടെയാണ് ഇദ്ദേഹം പാർട്ടിയിലേക്ക് മടങ്ങിയെത്തുമോയെന്ന ചർച്ചകൾ ആരംഭിച്ചത്. എന്നാൽ പ്രവർത്തകരുടെ അഭ്യർഥന മാനിച്ചാണ് താൻ ചടങ്ങിനെത്തിയതെന്നും ഇത് മടങ്ങിവരവായി കണക്കാക്കേണ്ടെന്നുമാണ് ഗോപിനാഥിന്‍റെ പ്രതികരണം.

Also Read :
നേരത്തെ ഡിസിസി അധ്യക്ഷ പട്ടിക സംബന്ധിച്ച പ്രതിഷേധത്തിന് പിന്നാലെയായിരുന്നു ആലത്തൂർ മുൻ എംഎൽഎയും കെപിസിസി സംസ്ഥാന സമിതി അംഗവുമയിരുന്ന എവി പ്രാഥമിക അംഗത്വം രാജിവെച്ചത്. തുടർന്ന് നടത്തിയ വാർത്താ സമ്മേളനത്തിൽ അദ്ദേഹം നടത്തിയ പരാമർശങ്ങൾ ഏറെ ചർച്ചയായിരുന്നു.