കഴിഞ്ഞ ദിവസം മുതലാണ് മുഖ്യമന്ത്രി പിണറായ വിജയനെതിരെ കെ കെ രമ നടത്തിയത് എന്ന പേരിൽ ഒരു കമൻ്റിൻ്റെ സ്ക്രീൻഷോട്ട് സമൂഹമാധ്യമങ്ങളിൽ പ്രചരിക്കുന്നത്. കെ കെ രമയുടെ പേരിലുള്ള വേരിഫൈഡ് പ്രൊഫൈലിൽ നിന്ന് ഒരാളുടെ കമൻ്റിനുള്ള മറുപടി എന്ന നിലയിൽ വടകര എംഎൽഎ കുറിച്ചതായാണ് ചിത്രത്തിലുള്ളത്. ”അത് നിനക്ക് പാണനായി വിജയന്റെ മോന്ത മാത്രം കണ്ട് ശീലിച്ചത് കൊണ്ട് തോന്നുന്നതാ” എന്നാണ് പ്രചരിക്കുന്ന സ്ക്രീൻഷോട്ടിലുള്ളത്. എന്നാൽ ഈ സ്ക്രീൻഷോട്ട് വ്യാജമാണെന്നും ഇത്തരത്തിൽ ഒരു പരാമ‍ര്‍ശം താൻ നടത്തിയിട്ടില്ലെന്നും കെകെ രമ വ്യക്തമാക്കി.
Also Read:
എന്നാൽ ഈ പ്രചാരണം സിപിഎം സൈബര്‍ സംഘങ്ങള്‍ നടത്തുന്നതാണെന്നും സമൂഹമാധ്യമങ്ങള്‍ വഴി ഹീനമായ സംഘടിത പ്രവര്‍ത്തനമാണ് നടത്തി വരുന്നതെന്നും കെ കെ രമ ഫേസ്ബുക്ക് പോസ്റ്റിൽ കുറിച്ചു. ടിപി ചന്ദ്രശേഖരൻ്റെ കൊലപാതകത്തിനു ശേഷം കൊലയാളികള്‍ക്കും കൊല്ലിച്ചവര്‍ക്കുമെതിരെ താൻ നിര്‍ഭയം നിലയുറപ്പിച്ചതു മുതൽ സിപിഎം നേതൃത്വത്തിൻ്റെ അറിവോടെ താൻ നിര്‍ഭയം ക്രൂരമായ വ്യക്തിഹത്യയും വ്യാജ ആരോപണങ്ങളുമാണ് നേരിടുന്നതെന്നും ഈ പട്ടികയിൽ അവസാനത്തേതാണ് പുതിയ പ്രചാരണമെന്നും കെ കെ രമ പറഞ്ഞു.
Also Read:
“ഇക്കാര്യത്തില്‍ എനിക്ക് അത്ഭുതമൊന്നുമില്ല.2016ലെ നിയമസഭാ തെരഞ്ഞെടുപ്പ് വേളയില്‍ ഞാന്‍ ഒരു പെണ്‍കുട്ടിയെ അസഭ്യം പറഞ്ഞതായി ആരോപിച്ച് സിപിഎം ഉന്നതനേതൃത്വത്തിന്റെ ഗൂഢാലോചനയില്‍ ഒരു വ്യാജശബ്ദരേഖയുണ്ടാക്കി തെരഞ്ഞെടുപ്പിന്റെ തലേന്നാള്‍ പാര്‍ട്ടി ചാനലുപയോഗിച്ച് ഒരു മുഴുദിനം പ്രക്ഷേപണം ചെയ്യാന്‍ മനസ്സറപ്പില്ലാത്തവര്‍ക്ക് എന്താണ് ചെയ്തുകൂടാത്തത്?!!” കെ കെ രമ ചോദിച്ചു. തനിക്കെതിരെ നടന്ന വ്യാജപ്രചാരണങ്ങളിൽ ഇക്കാലമത്രയും പോലീസിൽ പരാതിയുമായി എത്തിയിട്ടും പ്രയോജനം ഉണ്ടായിട്ടില്ലെന്നും പരാതികള്‍ക്കെല്ലാം എന്തു സംഭവിച്ചു എന്നു ഊഹിക്കാവുന്നതേയുള്ളൂ എന്നും കെ കെ രമ കുറിച്ചു. സിപിഎം ഈ കടന്നാക്രമണങ്ങളെല്ലാം നടത്തുന്നത് ഭരണത്തിൻ്റെ സൗകര്യങ്ങള്‍ ഉപയോഗിച്ചു കൊണ്ടാണെന്നും അവര്‍ ആരോപിച്ചു. ഇത്തരത്തിൽ മുഖ്യമന്ത്രിയ്ക്കെതിരെ താൻ എഴുതുമെന്ന് സാമാന്യബുദ്ധിയുള്ളവര്‍ ആരും വിശ്വസിക്കില്ലെന്നും എന്നാൽ സിപിഎം തനിക്കെതിരെ നിരന്തരം വ്യാജപ്രചാരണങ്ങള്‍ നടത്തുകയാണെന്ന് ഓര്‍മിപ്പിക്കാൻ വേണ്ടി മാത്രമാണ് ഈ ഫേസ്ബുക്ക് പോസ്റ്റ് കുറിക്കുന്നതെന്നും രമ വ്യക്തമാക്കി.
“ഏറ്റവും ജനാധിപത്യമാന്യതയുള്ള ഭാഷയുമായി കഴിഞ്ഞ ഒരു പതിറ്റാണ്ട് കാലമായി ആ വിമര്‍ശനങ്ങള്‍ കണിശമായും കൃത്യമായും രേഖപ്പെടുത്തിപ്പോരുന്ന ഞങ്ങള്‍ക്ക് എതിര്‍പ്പുകള്‍ പ്രകടിപ്പിക്കുന്നതിന് സിപിഎം സൈബര്‍ശൈലി കടംകൊള്ളേണ്ട കാര്യമില്ലെന്ന് മാത്രം വ്യക്തമാക്കട്ടെ.” തനിക്കെതിരെ സിപിഎം നടത്തിയിട്ടുള്ള വ്യാജപ്രചാരണങ്ങൾക്ക് ഇന്നേവരെ സിപിഎം ഖേദപ്രകടനം നടത്തിയിട്ടില്ലെന്നും കെ കെ രമ ആരോപിച്ചു.
