മരണത്തിൽ പോലും കമ്മ്യൂണിസ്റ്റുകാരന്റെ കരണം പുകച്ചുകൊണ്ടാണ് പോകുന്നതെന്ന് നഹാസ് പറഞ്ഞു. അയ്യങ്കാളിക്കും ശ്രീനാരായണ ഗുരുവിനുമൊപ്പം പിണറായി വിജയനെ തിരുകി കയറ്റി നവോത്ഥാന നായകൻ ആക്കാൻ ശ്രമിക്കുമ്പോഴാണ് വിജയൻ നവോത്ഥാന നായകനല്ല അധോലോക നായകനാണെന്ന് പി ടി വിളിച്ചു പറഞ്ഞത്. അദ്ദേഹത്തിന്റെ വിയോഗത്തിന്റെ ആഴം ചങ്കിൽ പേറി നിൽക്കുമ്പോഴാണ് സകല രാഷ്ട്രീയ മര്യാദകളും ലംഘിച്ച് ഒരു പരേതനെതിരെ പോലും അസഭ്യവും ആഭാസവും വർഷിക്കുന്ന പ്രൊഫൈലുകൾ ശ്രദ്ധയിൽ പെടുന്നത്. അത്തരക്കാർക്കെതിരെ നിയമപരമായ നടപടികളുമായി മുന്നോട്ടു പോകുമെന്നും അഴിയെണ്ണിക്കുമെന്നും നഹാസ് പറഞ്ഞു.
“ഇന്ന് രാവിലെ അന്തരിച്ച കെപിസിസി വർക്കിങ് പ്രസിഡന്റും നിയമസഭാ സാമാജികനുമായ പി ടി തോമസ് എംഎൽഎയെ സമൂഹമാധ്യമങ്ങളിലൂടെ അപമാനിക്കാൻ ചില തൽപര കക്ഷികൾ നടത്തുന്ന ശ്രമങ്ങൾ അപലപനീയമാണ്. ചില ഫേസ്ബുക്ക് പ്രൊഫൈലുകളിൽ നിന്നും പോസ്റ്റ് ചെയ്ത കമന്റുകൾ അദ്ദേഹത്തെ മാത്രമല്ല സാംസ്കാരിക കേരളത്തെക്കൂടിയാണ് അപമാനിക്കുന്നത്. ഇത്തരക്കാർക്കെതിരെ നടപടി സ്വീകരിക്കണമെന്ന് അഭ്യർത്ഥിക്കുന്നു.” നഹാസ് പത്തനംതിട്ട പോലീസ് മേധാവിക്ക് നൽകിയ പരാതിയിൽ പറയുന്നു.
അതേസമയം പി ടി തോമസിന്റെ മൃതദേഹം വഹിച്ചുകൊണ്ടുള്ള വാഹനം ഇടുക്കി തോപ്പുംപടിയിലുള്ള വീട്ടിൽ അർദ്ധരാത്രിയോടെ എത്തിച്ചേരുമെന്ന് കെപിസിസി പ്രസിഡന്റ് കെ സുധാകരൻ പറഞ്ഞു. ഇവിടെ നിന്നും പുലർച്ചെ ആറിന് മുമ്പായി പാലാരിവട്ടത്തെ വീട്ടിൽ എത്തിക്കും. ഏഴ് മണിക്ക് ശേഷം ഡിസിസിയിൽ പൊതുദർശനത്തിനു വെക്കും. എട്ടരയോടെ ടൗൺ ഹാളിൽ രാഹുൽ ഗാന്ധി അന്തിമോപചാരം അ‍ര്‍പ്പിക്കും. ഉച്ചയ്ക്ക് ഒന്നരയോടെ തൃക്കാക്കര കമ്മ്യൂണിറ്റി ഹാളിൽ എത്തിക്കുകയും അഞ്ചരയോടെ രവിപുരം ശ്മശാനത്തിൽ സംസ്കാര ചടങ്ങുകൾ നടക്കുകയും ചെയ്യും. പി ടി തോമസിന്റെ അന്ത്യാഭിലാഷം അനുസരിച്ചാണ് രവിപുരത്ത് സംസ്കാരം നടത്തുന്നതെന്ന് സുധാകരൻ പറഞ്ഞു.
ഇന്ന് രാവിലെ 10.10 ഓടെയായിരുന്നു പിടി തോമസിൻ്റെ മരണം. അർബുധ ബാധയെത്തുടർന്ന് ദീർഘനാളായി അദ്ദേഹം ചികിത്സയിലായിരുന്നു.
