നവംബർ മാസം പെയ്ത കനത്ത മഴ മൂലം ഡാമിലെ ജലനിരപ്പ് 142 അടിയായി തുടരുന്നതിനിടെയാണ് ബേബി ഡാമിലെ ചോര്‍ച്ച സംബന്ധിച്ച റിപ്പോര്‍ട്ട്. ബേബി ഡാമിൻ്റെ ബലക്ഷയം കേരളം ഏറെക്കാലമായി ഉന്നയിക്കുന്ന വിഷയമാണ്. ഇക്കാര്യം തമിഴ്നാടും അംഗീകരിച്ചിട്ടുണ്ടെങ്കിലും ഇരുസംസ്ഥാനങ്ങളും തമ്മിലുള്ള തര്‍ക്കം മൂലം അറ്റകുറ്റപ്പണി അനന്തമായി നീളുകയാണ്.
Also Read:
മുല്ലപ്പെരിയാര് ഡാമിൽ 115 അടിയായി ജലനിരപ്പ് ഉയരുമ്പോഴാണ് ബേബി ഡാമിൻ്റെ അടിത്തട്ടോളം വെള്ളമെത്തുന്നത്. ജലനിരപ്പ് കൂടുന്നതോടെ ബേബി ഡാമിൽ നിന്നുള്ള ചോര്‍ച്ചയും വര്‍ധിച്ചെന്നാണ് റിപ്പോര്‍ട്ട്. ഡാമിൻറെ അടിത്തട്ടിനോടു ചേര്‍ന്ന് വെള്ളമൊഴുകുന്നത് വ്യക്തമായി കാണാൻ കഴിയുമെന്നും റിപ്പോര്‍ട്ടിൽ വ്യക്തമാക്കുന്നുണ്ട്. അതേസമയം, നിലവിൽ മഴ കുറഞ്ഞതോടെ ഡാമിലേയ്ക്കുള്ള നീരൊഴുക്കും കുറഞ്ഞിട്ടുണ്ടെന്നും ഈ സാഹചര്യത്തിൽ തത്കാലം ബേബി ഡാമിനു ഭീഷണിയില്ലെന്നുമാണ് തമിഴ്നാടിൻ്റെ വാദം. എന്നാൽ ദീര്‍ഘകാലാടിസ്ഥാനത്തിൽ ബേബി ഡാം ബലപ്പെടുത്തണമെന്നതാണ് തമിഴ്നാടിൻ്റെയും ആവശ്യം.
മുൻപ് ബേബി ഡാം ബലപ്പെടുത്തുന്നതിൻ്റെ ഭാഗമായി പരിസരത്തെ മരങ്ങള്‍ വെട്ടാൻ കേരള വനംവകുപ്പ് തമിഴ്നാടിന് അനുമതി നല്‍കിയത് വലിയ വിവാദമായിരുന്നു. ഉദ്യോഗസ്ഥര്‍ മരം വെട്ടാൻ തമിഴ്നാട് സര്‍ക്കാരിന് അനുമതി നല്‍കിയത് മന്ത്രിമാരുടെയോ മുഖ്യമന്ത്രിയുടെയോ അറിവില്ലാതെയാണെന്നായിരുന്നു സര്‍ക്കാര്‍ വാദം. എന്നാൽ കേരളം അനുമതി നല്‍കിയതിൽ നന്ദി പറഞ്ഞ് തമിഴ്നാട് മുഖ്യമന്ത്രി എംകെ സ്റ്റാലിൻ രംഗത്തെത്തുകയും ചെയ്തിരുന്നു. ബേബി ഡാം ബലപ്പെടുത്തിയാൽ മുല്ലപ്പെരിയാറിലെ ജലനിരപ്പ് 152 അടിയായി വര്‍ധിപ്പിക്കുമെന്ന് ഡാം സന്ദര്‍ശിച്ച തമിഴ്നാട് മന്ത്രിതല സംഘം മാധ്യമങ്ങളോട് പ്രതികരിച്ചു ദിവസങ്ങള്‍ക്കു ശേഷമായിരുന്നു വനംവകുപ്പ് അനുമതി നല്‍കിയ വിവരം പുറത്തു വന്നത്. വിവാദത്തിൻ്റെ പശ്ചാത്തലത്തിൽ അനുമതി മുഖ്യമന്ത്രി ഇടപെട്ട് റദ്ദാക്കുകയും ചെയ്തിരുന്നു.
Also Read:
അതേസമയം, ബേബി ഡാം ബലപ്പെടുത്താൻ കേരളത്തിൻ്റെ സഹകരണം ആവശ്യപ്പെട്ട് തമിഴ്നാട് സര്‍ക്കാര്‍ സുപ്രീം കോടതിയെ സമീപിച്ചിട്ടുണ്ട്. കേരള സര്‍ക്കാര്‍ അനുമതി റദ്ദാക്കിയ നടപടി കോടതിയലക്ഷ്യമാണെന്ന് ചൂണ്ടിക്കാട്ടിയാണ് തമിഴ്നാട് കോടതിയിൽ പുതിയ അപേക്ഷ നല്‍കിയത്. ഡാം ബലപ്പെടുത്തുന്ന നടപടികളുമായി മുന്നോട്ടു പോകാൻ അനുവദിക്കണമെന്നും തടസ്സങ്ങള്‍ നീക്കണമെന്നും തമിഴ്നാട് ആവശ്യപ്പെട്ടു. 2006ലും 2014ലും സമാന ആവശ്യം തമിഴ്നാട് ഉന്നയിച്ചിരുന്നെങ്കിലും കേരളം സഹകരിച്ചില്ലെന്നാണ് ആരോപണം. മരംമുറി ഉത്തരവ് റദ്ദാക്കിയതിനു പിന്നാലെ കേന്ദ്രസര്‍ക്കാര്‍ കേരളത്തോടു വിശദീകരണം തേടുകയും ചെയ്തിരുന്നു.
