‘സമാധാനം ഇല്ലാതാകുന്നു, രാഷ്ട്രീയ കൊലപാതകങ്ങൾക്കെതിരെ നിയമ സംവിധാനം വേണം’; വിമർശനവുമായി കർദിനാൾ

കൊച്ചി: സംസ്ഥാനത്ത് സമാധാനം ഇല്ലാതാകുന്ന സാഹചര്യമാണ് ഇന്നുള്ളതെന്ന് കർദിനാൾ മാർ ജോർജ് ആലഞ്ചേരി. നിഷ്പ്രയാസം നടക്കാവുന്ന സംഭവങ്ങളായി കൊലപാതങ്ങൾ മാറുന്നു. കക്ഷിരാഷ്ട്രീയത്തിൻ്റെ ഭാഗമായിട്ടാണ് കൊലപാതകങ്ങൾ നടക്കുന്ന്. എന്ത് കാരണങ്ങൾ കൊണ്ടാണെങ്കിലും കൊലപാതകങ്ങൾ ന്യായീകരിക്കാൻ കഴിയില്ലെന്നും അദ്ദേഹം പറഞ്ഞു.

രാഷ്ട്രീയ കൊലപാതകങ്ങൾക്കെതിരെ ശക്തമായ നിയമ സംവിധാനങ്ങൾ പ്രാബല്യത്തിൽ വരണം. അതിനൊപ്പം പൊതുമനസാക്ഷി ഉയരുകയും വേണമെന്നും കർദിനാൾ മാർ ജോർജ് ആലഞ്ചേരി പറഞ്ഞു. രാഷ്ട്രീയ നേതാക്കൾ കൊലപാതകത്തിന് എതിരെ ശക്തമായ നിലപാട് സ്വീകരിക്കണമെന്നും അദ്ദേഹം കൂട്ടിച്ചേർത്തു. കുർബാന ഏകീകരണത്തിൽ സിനഡിൻ്റെ തീരുമാനം അംഗീകരിക്കണം എന്നത് സഭയുടെ പൊതുവായ തീരുമാനമാണ്. ഇതിനെ ആർക്കും എതിർക്കാൻ കഴിയില്ല. നിലവിലെ എതിർപ്പുകൾ കാലക്രമേണ മാറുമെന്നും കർദിനാൾ വ്യക്തമാക്കി.

പെൺകുട്ടികളുടെ വിവാഹപ്രായം ഉയർത്തുന്നതിൽ നിലവിൽ സഭയ്ക്ക് അഭിപ്രായമില്ല. 18 വയസ് എന്നത് കനോൻ നിയമപ്രകാരമുള്ള പ്രായമാണ്. സർക്കാർ ഇതിൽ മാറ്റം വരുത്തിയാൽ അതനുസരിക്കുമെന്നും കർദിനാൾ പറഞ്ഞു.

ആലപ്പുഴയിലെ ഇരട്ട രാഷ്ട്രീയ കൊലപാതകങ്ങളുടെ പശ്ചാത്തലത്തിലാണ് പ്രതികരണവുമായി കർദിനാൾ നേരിട്ട് രംഗത്തുവന്നത്.
സംസ്ഥാനത്ത് അടുത്ത മൂന്ന് ദിവസത്തേക്ക് ജാഗ്രതാ നിർദേശമാണുള്ളത്. ഈ ദിവസങ്ങളിൽ കർശന പരിശോധനകൾ നടത്താൻ ജില്ലാ പോലീസ് മേധാവിമാർക്ക് നിർദേശം നൽകി. അവധിയിലുള്ള പോലീസ് ഉദ്യോഗസ്ഥരോട് തിരികെ ജോലിയിൽ പ്രവേശിക്കാൻ നിർദേശം നൽകി.

സംഘർഷ സാധ്യതയുള്ള പ്രദേശങ്ങളിൽ പോലീസ് പരിശോധന ശക്തമാക്കും. ഗുണ്ടാ ലിസ്റ്റിൽ ഉൾപ്പെട്ടവരെ നിരീക്ഷിക്കുന്നതിനൊപ്പം അടുത്ത മൂന്ന് ദിവസം വാഹനപരിശോധന കർശനമാക്കാനും നിർദേശമുണ്ട്. സംഘർഷ സാധ്യത നിലനിൽക്കുന്നതിനാൽ പാർട്ടി ഓഫീസുകൾക്ക് സുരക്ഷ ഏർപ്പെടുത്തണമെന്നും നിർദേശമുണ്ട്. രാത്രിയും പകലും വാഹനപരിശോധന കർശനമാക്കും. ക്രിമിനലുകളുടെ പട്ടിക തയ്യാറാക്കി കൃത്യമായ പരിശോധന നടത്തും. അടുത്ത് മൂന്ന് ദിവസത്തേക്ക് സംസ്ഥാനത്ത് ജാഥ നടത്തുന്നതിനും ഉച്ചഭാഷിണി ഉപയോഗിക്കുന്നതിനും നിയന്ത്രണം ഏർപ്പെടുത്തിയിട്ടുണ്ട്. വാറന്‍റ് നിലവിലുളള സാമൂഹ്യവിരുദ്ധരെ പിടികൂടാന്‍ പ്രത്യേക പദ്ധതി നടപ്പിലാക്കും.