സംഘർഷ സാധ്യതയുള്ള പ്രദേശങ്ങളിൽ പോലീസ് പരിശോധന ശക്തമാക്കും. ഗുണ്ടാ ലിസ്റ്റിൽ ഉൾപ്പെട്ടവരെ നിരീക്ഷിക്കുന്നതിനൊപ്പം അടുത്ത മൂന്ന് ദിവസം വാഹനപരിശോധന കർശനമാക്കാനും നിർദേശമുണ്ട്. സംഘർഷ സാധ്യത നിലനിൽക്കുന്നതിനാൽ പാർട്ടി ഓഫീസുകൾക്ക് സുരക്ഷ ഏർപ്പെടുത്തണമെന്നും നിർദേശമുണ്ട്.
രാത്രിയും പകലും വാഹനപരിശോധന കർശനമാക്കും. ക്രിമിനലുകളുടെ പട്ടിക തയ്യാറാക്കി കൃത്യമായ പരിശോധന നടത്തും. അടുത്ത് മൂന്ന് ദിവസത്തേക്ക് സംസ്ഥാനത്ത് ജാഥ നടത്തുന്നതിനും ഉച്ചഭാഷിണി ഉപയോഗിക്കുന്നതിനും നിയന്ത്രണം ഏർപ്പെടുത്തിയിട്ടുണ്ട്. വാറന്‍റ് നിലവിലുളള സാമൂഹ്യവിരുദ്ധരെ പിടികൂടാന്‍ പ്രത്യേക പദ്ധതി നടപ്പിലാക്കും.
സംസ്ഥാനത്തെ സാഹചര്യങ്ങൾ വിലയിരുത്തുന്നതിനായി മുതിർന്ന പോലീസ് ഉദ്യോഗസ്ഥർ 24 മണിക്കൂറും അവരവരുടെ ഓഫീസുകളിൽ ഉണ്ടായിരിക്കണം. പോലീസ് ആസ്ഥാനത്ത് മേലുദ്യോഗസ്ഥർ ചുമതലയിൽ ഉണ്ടായിരിക്കണം. അത്യാവശ്യമല്ലാത്ത അവധികൾ അടുത്ത ദിവസങ്ങളിൽ ഒഴിവാക്കണമെന്നും ഡിജിപി നിർദേശിച്ചിട്ടുണ്ട്. ആലപ്പുഴയിൽ ആദ്യ കൊലപാതകം ഉണ്ടായ ശേഷം പോലീസിന് മുൻകരുതൽ എടുത്തിരുന്നെങ്കിൽ രണ്ടാമത്തെ കൊലപാതകം തടയാനാകുമായിരുന്നുവെന്ന വിമർശനം പോലീസിൽ തന്നെ ശക്തമായ സാഹചര്യം നിലനിൽക്കെയാണ് നിർദേശങ്ങളുമായി ഡിജിപി എത്തിയത്.
ഇരട്ട കൊലപാതകങ്ങളുടെ പശ്ചാത്തലത്തില്‍ നിരോധനാജ്ഞ നിലനില്‍ക്കുന്നതിനിടെ ആലപ്പുഴയില്‍ ഗുണ്ടാ ആക്രമണം നടന്നത് പോലീസിനെ പ്രതിരോധത്തിലാക്കി. ആര്യാട് കൈതകത്ത് ഇരുവിഭാഗങ്ങൾ തമ്മിൽ നടന്ന ഏറ്റുമുട്ടലില്‍ യുവാവിന് വെട്ടേറ്റു. ഞായറാഴ്ച രാത്രിയാണ് സംഭവം. ആര്യാട് സ്വദേശി വിമലിനാണ് വെട്ടേറ്റതെന്ന് വിവിധ മാധ്യമങ്ങൾ റിപ്പോർട്ട് ചെയ്തു.
വിമലിന്‍റെ തലയ്ക്കും കാലിനുമാണ് വെട്ടേറ്റത്. അക്രമണത്തിന് പിന്നിൽ ഗുണ്ടാ നേതാവ് ടെമ്പർ ബിനുവാണെന്നാണ് പോലീസ് പറയുന്നത്. ബിനുവുമായി വിമലിന് പ്രശ്‌നങ്ങളുണ്ടായിരുന്നുവെന്നാണ് റിപ്പോർട്ട്. ബിനുവിന്‍റെ സഹോദരനെ മാസങ്ങൾക്ക് മുമ്പ് വിമൽ ആക്രമിച്ചിരുന്നെന്നും ഇതിന്‍റെ പ്രതികാരമെന്നോണമാണ് കഴിഞ്ഞദിവസത്തെ സംഭവമെന്നാണ് റിപ്പോർട്ട്.
എസ്ഡിപിഐ സംസ്ഥാന സെക്രട്ടറി കെ എസ് ഷാനും ഒബിസി മോർച്ച സംസ്ഥാന സെക്രട്ടറി രഞ്ജിത്ത് ശ്രീനിവാസനുമാണ് 12 മണിക്കൂറിനിടെ ജില്ലയിൽ കൊല്ലപ്പെട്ടത്. ആലപ്പുഴ മണ്ണഞ്ചേരിയിൽ ശനിയാഴ്ച രാത്രിയായിരുന്നു ആദ്യ കൊലപാതകം ഉണ്ടായത്. ഷാൻ സഞ്ചരിച്ച ബൈക്കിനെ പിന്നിൽ നിന്ന് ഇടിച്ചുവീഴ്ത്തിയ ശേഷം ആക്രമിക്കുകയായിരുന്നു. പിറ്റേന്ന് പുലർച്ചെയാണ് രഞ്ജിത്ത് ശ്രീനിവാസൻ കൊല്ലപ്പെട്ടത്.
