ശനിയാഴ്ച രാത്രി 9.30 ഓടെ വീട്ടിലേക്ക് പോകുന്നതിനിടെയാണ് ബിന്ദു അമ്മിണിയെ ഓട്ടോറിക്ഷ ഇടിച്ചത്. അപകടത്തിൽ സാരമായി പരിക്കേറ്റ ബിന്ദു അമ്മിനിയെ കൊയിലാണ്ടി താലൂക്ക് ആശുപത്രിയിൽ പ്രവേശിപ്പിച്ചു. മുഖത്താണ് ഓട്ടോ വന്നിടിച്ചതെന്ന് ബിന്ദു അമ്മിണി വ്യക്തമാക്കി. “വലിയ ഇടിയായിരുന്നു, ഞാൻ മരിച്ചെന്ന് കരുതിയിട്ടുണ്ടാവണം. ഇടിയുടെ ആഘാതത്തിൽ ഞാൻ നിലത്ത് വീണു. വായ്ക്കുള്ളിൽ മുറിവുണ്ടായതോടെ ചോരയൊഴുകി. സൈഡ് മിറർ ആണ് മുഖത്തിടിച്ചത്. ഇടിയുടെ ശക്തിയിൽ വണ്ടിയുടെ മിറർ ഒടിഞ്ഞ് താഴെ വീണു. രാത്രി ആയതിനാൽ കൃത്യമായി ആരാണെന്ന് മനസിലായില്ല” – എന്നും അവർ പറഞ്ഞു.
ഓട്ടോ വന്നിടിക്കുമ്പോൾ പരിസരത്ത് ആരും ഉണ്ടായിരുന്നില്ല. ഒടിഞ്ഞ മിററുള്ള ഓട്ടോ നോക്കിയും സിസിടിവി പരിശോധിച്ച് ഇടിച്ചതാരാണെന്ന് എളുപ്പം കണ്ടെത്താൻ കഴിയും. പോലീസിൻ്റെ ഭാഗത്ത് നിന്നും നല്ല രീതിയിലുള്ള സഹകരണം ലഭിച്ചു. അപകടം നടന്നയുടൻ സിഐയെ ആണ് സഹായത്തിനായി വിളിച്ചത്. ടൂവീലറിലെത്തിയ ആളാണ് ആശുപത്രിയിൽ എത്തിച്ചത്. തലയ്ക്ക് തരിപ്പും വേദനയും അനുഭവപ്പെട്ടതിനാൽ മെഡിക്കൽ കോളേജിലേക്ക് റഫർ ചെയ്തിരിക്കുകയാണ് ഡോക്ടർമാരെന്നും ബിന്ദു അമ്മിണി വ്യക്തമാക്കി.
സുപ്രീം കോടതി ഉത്തരവ് പ്രകാരം തനിക്ക് സുരക്ഷ നൽകേണ്ട ഉത്തരവാദിത്തം സ്റ്റേറ്റിനുണ്ടെങ്കിലും സുരക്ഷ ലഭിക്കുന്നില്ല. ഒരു വർഷത്തോളം കൂടെയുണ്ടായിരുന്നിട്ടും ചെറിയ രീതിയിലുള്ള അക്രമ സംഭവങ്ങൾ ഉണ്ടായി. പോലീസ് സുരക്ഷ ഇല്ലാതായതിന് ശേഷമാണ് അപായപ്പെടുത്താനുള്ള നീക്കം തുടങ്ങിയതെന്നും ബിന്ദു അമ്മിണി പറഞ്ഞു.
ശനിയാഴ്ച രാത്രി 9.25 ഓടെ പൊയിൽക്കാവ് ബസാറിലെ ടെക്സ്റ്റൈൽസ് കടയച്ച് വീട്ടിലേക്ക് പോകുമ്പോഴാണ് എതിർ ദിശയിൽ നിന്ന് എത്തിയ ഓട്ടോ ബിന്ദു അമ്മിണിയെ വന്നിടിച്ചത്. മുൻപ് കോഴിക്കോട് മിഠായിത്തെരുവിൽ വെച്ച് ബൈക്ക് യാത്രികരായ അജ്ഞാതരുടെ ഭാഗത്തു നിന്ന് ഇവർക്കെതിരെ ആക്രമണം ഉണ്ടായിട്ടുണ്ട്.
കഴിഞ്ഞ സെപ്റ്റംബറിൽ ബിന്ദു അമ്മിണിയെ പരസ്യമായി അധിക്ഷേപിച്ച ബസ് ഡ്രൈവർക്കെതിരെ കേസെടുത്തിരുന്നു. കണ്ണൂർ-കോഴിക്കോട് റൂട്ടിൽ സർവ്വീസ് നടത്തുന്ന സെയ്ൻ ബസിലെ ഡ്രൈവറാണ് ബിന്ദു അമ്മിണിയെ അധിക്ഷേപിച്ചത്. ഐപിസി 509 പ്രകാരം സ്ത്രീയെ വാക്കുകൊണ്ട് അധിക്ഷേപിച്ചതിനാണ് നടക്കാവ് പോലീസ് ഇയാൾക്കെതിരെ കേസെടുത്തത്.
