ന്യൂഡൽഹി
ചട്ടം ലംഘിച്ച് പ്രധാനമന്ത്രിയുടെ കാര്യാലയം തെരഞ്ഞെടുപ്പ് കമീഷനുമായി ഓൺലൈൻ ‘കൂടിക്കാഴ്ച’ നടത്തി. യുപി അടക്കം അഞ്ച് സംസ്ഥാനത്ത് തെരഞ്ഞെടുപ്പ് നടക്കാനിരിക്കെയാണ് ദുരൂഹ നടപടി. പ്രധാനമന്ത്രിയുടെ പ്രിൻസിപ്പൽ സെക്രട്ടറി പി കെ മിശ്രയാണ് മുഖ്യതെരഞ്ഞെടുപ്പ് കമീഷണർ സുശീൽ ചന്ദ്ര, കമീഷണർമാരായ രാജീവ് കുമാർ, അനുപ് ചന്ദ്ര പാണ്ഡെ എന്നിവരുമായി ചർച്ച നടത്തിയത്.
പൊതു വോട്ടർപട്ടിക വിഷയത്തിൽ പ്രിൻസിപ്പൽ സെക്രട്ടറി യോഗം വിളിക്കുമെന്ന് ആദ്യം നിയമമന്ത്രാലയം കമീഷനെ അറിയിച്ചിരുന്നു. എന്നാൽ, കമീഷൻ ഭരണനിർവഹണവിഭാഗത്തിൽനിന്ന് പരമാവധി അകലം പാലിക്കണമെന്ന് ചട്ടമുള്ളതിനാൽ യോഗത്തിൽ മുഖ്യതെരഞ്ഞെടുപ്പ് കമീഷണർ പങ്കെടുത്തില്ല. പിന്നാലെയാണ് അനൗപചാരികമെന്ന പേരിൽ ഓൺലൈൻ കൂടിക്കാഴ്ച. വെള്ളിയാഴ്ച പാർലമെന്റിൽ പ്രതിപക്ഷം വിഷയം ഉയർത്തി. നടപടി ഭരണഘടനാ വിരുദ്ധവും ദുരൂഹവുമാണെന്ന് പ്രതിപക്ഷം ആരോപിച്ചു. വിഷയം ചർച്ച ചെയ്യണമെന്ന് പ്രതിപക്ഷം നോട്ടീസ് നൽകിയെങ്കിലും നിരാകരിക്കപ്പെട്ടു.
