ലിംഗനീതിയുടെയും തുല്യപദവിയുടെയും ആശയങ്ങള്‍ ശക്തിപ്പെടുന്ന കാലത്ത് ബാലുശേരി സ്കൂള്‍ മാതൃകാപരമായ ചുവടുവെയ്പ്പാണ് നടത്തിയെന്ന് മന്ത്രി പറഞ്ഞു. “സമഭാവനയുടെ നവകേരളം സൃഷ്ടിക്കാനുള്ള തയ്യാറെടുപ്പുകളിലാണ് നാം. അതിന്, സ്വാതന്ത്ര്യത്തിന്റെയും സമത്വത്തിന്റെയും സ്വച്ഛന്ദമായ അന്തരീക്ഷത്തിലാണ് കുട്ടികൾ പഠിച്ചുവളരേണ്ടത്. ഒന്നിനെയുംകുറിച്ച് ആശങ്കകളില്ലാതെ പഠനം നടത്താൻ അവർക്ക് കഴിയണം.” മന്ത്രി പറഞ്ഞു.
ആൺകുട്ടികള്‍ക്ക് സൗകര്യപ്രദമായ വേഷം തെരഞ്ഞെടുക്കാൻ സാധിക്കുമ്പോള്‍ പെൺകുട്ടികളും സ്ത്രീകളും മറ്റുള്ളവരുടെ കാഴ്ചയ്ക്ക് ഇണങ്ങുന്നതും മറ്റുള്ളവരുടെ സൗന്ദര്യസങ്കൽപങ്ങള്‍ക്ക് ഇണങ്ങുന്നതുമായ വസ്ത്രം ധരിക്കാൻ നിര്‍ബന്ധിതരാകുന്ന സാഹചര്യമാണ് നിലവിലുള്ളതെന്ന് മന്ത്രി പറഞ്ഞു. സ്ത്രീകള്‍ സ്വന്തം ശരീരത്തെക്കുറിച്ചുള്ള വേവലാതികള്‍ ഉള്ളിൽ വഹിച്ച് പ്രദര്‍ശനവസ്തുക്കളായി നിൽക്കേണ്ടി വരുന്നതിനെപ്പറ്റി ചിന്തിച്ചു തുടങ്ങണമെന്നും മന്ത്രി പറഞ്ഞു. “ശരീരത്തെപ്പറ്റി അധമബോധമില്ലാതെ ഇടപെടാൻ കഴിയുന്ന സാഹചര്യം പെൺകുട്ടികൾക്ക് എല്ലായിടത്തും ഉണ്ടാക്കേണ്ടത് അനിവാര്യമാണ്. അവരുടെ കഴിവുകളും സർഗ്ഗാത്മകതകളും വികസിപ്പിക്കാനവർക്ക് കഴിയണം. ആൺ/പെൺ വിഭജനത്തിനപ്പുറം നാമെല്ലാം മനുഷ്യരാണെന്ന ആത്മവിശ്വാസം അവരിൽ ഉറയ്ക്കണം. അങ്ങനെയുള്ള അന്തരീക്ഷത്തിലാണ് അധ്യയനപ്രക്രിയ നടക്കേണ്ടത്. അതിലേക്കുള്ള ചുവടുവെപ്പാണ് ബാലുശ്ശേരിയിലേത്.” സ്കൂളിലെ ലിംഗേതര യൂണിഫോം ഉദ്ഘാടനം ചെയ്ത ശേഷം മന്ത്രി ഫേസ്ബുക്ക് പോസ്റ്റിൽ കുറിച്ചു. ഓൺലൈനായി നടന്ന പരിപാടിയിൽ പൊതുവേദികളിലെ പതിവുവേഷമായ സാരി വിട്ട് ചുരിദാര്‍ ധരിച്ചായിരുന്നു മന്ത്രി പങ്കെടുത്തത്.
Also Read:
യാഥാസ്ഥികത്വം മാറ്റങ്ങളോട് എന്നും എതിര്‍നിൽക്കുമെന്നും എന്നാൽ അതിൽ ഭയപ്പെടതരുെന്നും മന്ത്രി പറഞ്ഞു. നിലവിലെ വേഷവിധാനങ്ങളൊന്നും നൈസര്‍ഗികമായി ഉണ്ടായതല്ലെന്നും അടിച്ചേൽപ്പിച്ചതാണെന്നും മന്ത്രി വ്യക്തമാക്കി. കാലങ്ങള്‍ കൊണ്ട് വേഷവിധാനങ്ങളിൽ ഏറെ മാറ്റം വന്നിട്ടുണ്ടെന്നും മന്ത്രി പറഞ്ഞു. “ഒരുകാലത്ത് ആൺകുട്ടികളുടെ പൊതുവസ്ത്രമായിരുന്ന മുണ്ട് വിദ്യാലയങ്ങളിലും കലാലയങ്ങളിലും എത്രപേർ ഉപയോഗിക്കുന്നുണ്ട്? എൻജിനീയറിങ് മേഖല പോലെ എത്രയോ പഠനയിടങ്ങളിൽ ജൻഡർ ന്യൂട്രൽ യൂണിഫോമിലേക്ക് മാറിക്കഴിഞ്ഞു. എന്നിട്ടും എത്രയോ ഇടങ്ങളിൽ നമ്മുടെ കാലാവസ്ഥയ്‌ക്കോ കുട്ടികളുടെ ആരോഗ്യത്തിനോ ഇണങ്ങാത്ത ബ്ലെയ്‌സറുകളും ഓവർകോട്ടുകളും അടിച്ചേൽപ്പിക്കപ്പെടുന്നു!” ഇക്കാര്യങ്ങളിലൊന്നും പ്രതിഷേധമില്ലാത്തവർ സൗകര്യപ്രദമായ വേഷം കുട്ടികള്‍ക്കു വേണ്ടി കൊണ്ടുവരുമ്പോള്‍ എതിര്‍ക്കുന്നത് അസ്വാഭാവികമാണെന്നും മന്ത്രി ആര്‍ ബിന്ദു ചൂണ്ടിക്കാട്ടി. പുതിയ മാറ്റങ്ങളെ എതിര്‍ക്കുന്നവര്‍ ഉണ്ടാകുമെന്നും എന്നാൽ അവര്‍ കേരളത്തിൻ്റെയോ ഭാവിതലമുറയുടെയോ താത്പര്യങ്ങള്‍ സംരക്ഷിക്കുന്നവര്‍ അല്ലെന്നും മന്ത്രി പറഞ്ഞു. കുട്ടികളെ സ്നേഹിക്കുന്നവര്‍ ഈ മാറ്റങ്ങലെ എതിര്‍ക്കില്ലെന്നും മന്ത്രി വ്യക്തമാക്കി.
Also Read:
ശരീരത്തെക്കുറിച്ചുള്ള അപകര്‍ഷതകള്‍ മാറാനും ലിംഗസമത്വം ഉറപ്പാക്കാനും സ്കൂളുകളിലാണ് ആദ്യം അന്തരീക്ഷമുണ്ടാകേണ്ടതെന്ന് മന്ത്രി വ്യക്തമാക്കി. ലിംഗേതര യൂണിഫോം നടപ്പാക്കാൻ മുൻകൈയെടുത്ത സ്കൂള്‍ അധികൃതരെയും രക്ഷിതാക്കളെയും മന്ത്രി അഭിനന്ദിച്ചു.
