ഇടിച്ചു തെറിപ്പിച്ചില്ല, നിസാരമായ ഒരു സംഭവം; കൊയിലാണ്ടി ‘വാഹനാപകടത്തെപ്പറ്റി’ ബൽറാം

പാലക്കാട്: കൊയിലാണ്ടിയിൽ വച്ച് തന്‍റെ കാർ യുവതിയെ ഇടിച്ചുവീഴ്ത്തിയെന്ന പ്രചാരണത്തിൽ വീശദീകരണവുമായി തൃത്താല മുൻ എംഎൽഎ . പ്രാദേശിക ചാനലും ഡിവൈഎഫ്ഐക്കാരും തുടങ്ങിവച്ച ദുഷ്പ്രചാരണം വിവിധ മാധ്യമങ്ങൾ ഏറ്റെടുക്കുകയായിരുന്നെന്ന് അദ്ദേഹം പറഞ്ഞു. തെറ്റിദ്ധരിക്കപ്പെട്ട പലരും ഇതിനെക്കുറിച്ച് ചോദിക്കുന്നത് കൊണ്ടാണ് വിശദീകരണം നൽകുന്നതെന്ന് പറഞ്ഞാണ് കൊയിലാണ്ടിയിൽ സംഭവിച്ചതെന്താണെന്ന് ബൽറാം പറയുന്നത്.

കൊയിലാണ്ടിയിൽ ഒരു പരിപാടിക്കായി ഉച്ചയ്ക്ക് 3.30ഓടു കൂടി എത്തിയപ്പോഴാണ് സീബ്രാ ലൈൻ ഇല്ലാത്ത ഒരിടത്ത് വച്ച് റോഡ് മുറിച്ചുകടക്കാൻ ശ്രമിച്ച ഒരു വനിതയുടെ കയ്യിൽ എന്‍റെ വാഹനത്തിന്‍റെ സൈഡ് വ്യൂ മിറർ തട്ടിയത്. യാതൊരു വിധ പരിക്കോ മുറിവോ ആർക്കുമില്ലാത്ത തീർത്തും നിസാരമായ ഒരു സംഭവമായിരുന്നു അത്. വ്യാജ വാർത്തകളിൽ കാണുന്ന പോലെ ഇടിക്കുകയോ ഇടിച്ച് തെറിപ്പിക്കുകയോ ഇടിച്ച് വീഴ്ത്തുകയോ ചോരയൊലിപ്പിച്ച് കിടക്കുകയോ ഒന്നും അവിടെ ഉണ്ടായിട്ടില്ല.

Also Read :
യുവതിയുടെ കയ്യിൽ തട്ടിയതിന് പിന്നാലെ എന്‍റെ വാഹനം സൈഡിലേക്ക് ഒതുക്കി നിർത്തുകയും ഡ്രൈവറും കൂടെ ഉണ്ടായിരുന്ന സുഹൃത്തും ഇറങ്ങിച്ചെന്ന് അവരോട് സംസാരിക്കുകയും ചെയ്തു. വേദനയുണ്ടോ എന്ന് അന്വേഷിക്കുകയും ഇതേ വാഹനത്തിൽ ആശുപത്രിയിൽ കൊണ്ടുപോകാമെന്ന് പറയുകയും ചെയ്തു. അപ്പോൾ വേണ്ടെന്ന് പറഞ്ഞത് അവർ തന്നെയാണെന്നും പരിസരത്തുണ്ടായിരുന്ന വ്യാപാരികളും തൊഴിലാളികളുമൊക്കെ ഇതിന് സാക്ഷികളാണെന്നും ബൽറാം പറഞ്ഞു.

യുവതി അവിടെ നിന്ന് പോയതിന് ശേഷമാണ് തങ്ങൾ പരിപാടി സ്ഥലത്തേക്ക് പോയത്. അവർക്ക് എന്തെങ്കിലും തുടർ സഹായം ആവശ്യമാണെങ്കിൽ അതിനായി പ്രദേശത്തെ കോൺഗ്രസ് സഹപ്രവർത്തകരേയും ഏർപ്പാട് ചെയ്തിരുന്നെന്നും ബൽറാം ചണ്ടിക്കാട്ടി. ഈ സംഭവത്തെയാണ് “ഇടിച്ചിട്ട് വണ്ടി നിർത്തിയില്ല”, “യുവതിയെ ഇടിച്ച് വീഴ്ത്തി”, “വണ്ടിക്ക് ഇൻഷുറൻസ് ഇല്ല” എന്നൊക്കെ നുണപ്രചരണത്തിന് വേണ്ടി ഉപയോഗിച്ചത്. ഒരു വാഹനത്തിന് ഇൻഷുറൻസ് ഉണ്ടോ എന്നതന്വേഷിക്കാനൊക്കെ വിരൽത്തുമ്പുകൊണ്ട് നിമിഷങ്ങൾക്കുള്ളിൽ സാധിക്കുന്ന ഇക്കാലത്തും ഇമ്മാതിരി നുണകൾ പറയുന്നവരുടെയൊക്കെ തൊലിക്കട്ടി എത്ര മാത്രം ഉണ്ടായിരിക്കണമെന്നും മുൻ എംഎൽഎ ചോദിക്കുന്നു.

Also Read :

സഫിയ പോലീസിൽ പരാതി നൽകിയെന്ന വാർത്ത നുണയാണെന്നും ബൽറാം അവകാശപ്പെട്ടു. സംഭവത്തേക്കുറിച്ച് സഫിയ ഇന്നലെ കൊയിലാണ്ടി പോലീസിൽ വിശദമായ മൊഴി നൽകിയിട്ടുണ്ട്. അതിന്‍റെ കോപ്പി പലരും എനിക്കയച്ച് തരികയും ചെയ്തിട്ടുണ്ട്. “തനിക്ക് ഒരു പരിക്കുമില്ലെന്നും അവിടെയുണ്ടായ ട്രാഫിക് പോലീസുകാരന്‍റെ നിർദ്ദേശാനുസരണം ആശുപത്രിയിൽ കാണിച്ചു എന്നേയുള്ളൂ എന്നും വാഹനാപകടം എന്ന നിലയിൽ പരിഗണിച്ച് ആശുപത്രിയിൽ നിന്നാണ് പോലീസിന് വിവരം നൽകിയത്, തനിക്ക് ഇക്കാര്യത്തിൽ ഒരു പരാതിയുമില്ല എന്ന് അവർ വളരെ കൃത്യമായിത്തന്നെ പോലീസിനോട് രേഖാമൂലം പറയുന്നുണ്ട് എന്നിട്ടും സിപിഎമ്മുകാരുടെ പോസ്റ്ററൊട്ടിപ്പും തെറിവിളികളും തുടരുകയാണ്. എന്ത് ചെയ്യാം, അവർ സിപിഎമ്മുകാരായിപ്പോയില്ലേ!!” ബൽറാം പറയുന്നു.

രാഷ്ട്രീയ വിരോധം വച്ച് വ്യാജ വാർത്തകൾ പ്രചരിപ്പിച്ച മാധ്യമങ്ങൾക്കും ഇതൊരവസരമായി കരുതി തങ്ങളുടെ ഉള്ളിലെ വെറുപ്പ് മുഴുവൻ ഛർദ്ദിച്ചുവച്ച് തെറിവിളിച്ച് അർമ്മാദിക്കുന്ന നൂറ് കണക്കിന് സിപിഎം ഒറിജിനൽ/ഫേയ്ക്ക് പ്രൊഫൈലുകളിൽ ചിലതിനുമെതിരെ നിയമ നടപടികൾ സ്വീകരിക്കാനാണ് ഉദ്ദേശിക്കുന്നതെന്നും വിടി ബൽറാം പറഞ്ഞു.